ب سەدان پارچەیێن شوونواری ل گرێ گۆمل هاتینە دیتن
دهۆك، لەزگین جوقی:
رێڤەبەرێ شوونوار و كەلەپووری ل پارێزگەها دهۆكێ دیار كر، پڕۆژەیێ هەلكۆلینێن شوونواری ل گرێ گۆمل یێ سەر ب ناوچەداریا كەلەكچی ڤە ل دەڤەرداریا شێخان دهێتە كرن و پڕۆژە یێ هەڤپشكە د ناڤبەرا رێڤەبەریا شوونوار و كەلەپووری ل پارێزگەها دهۆكێ و زانكۆیا ئودینە یا ئیتالی.
د. بێكەس بریفكانی، رێڤەبەرێ شوونوار و كەلەپووری ل پارێزگەها دهۆكێ ئاشكرا كر، ب سەدان پارچەیێن شوونواری یێن گرنگ ل گرێ گۆمل یێ سەر ب ناوچەداریا كەلەكچی ڤە هاتینە دیتن، كو یێن چەرخێن جودانە و گۆت: «نوكە هەلكۆلینێن شوونواری یێ ل سەر دهێتە كرن، ئەڤ پڕۆژە یێ هەڤپشكە د ناڤبەرا رێڤەبەریا شوونوار و كەلەپووری ل پارێزگەها دهۆكێ و زانكۆیا ئودینە یا ئیتالی، گرێ گۆمل ئێكە ژ جهێن شوونواری یێن گرنگ ل دەشتا ناڤكۆڕێ ب رووبەرێ 35 هكتاران و بلنداهیا 40 مەتران چەندین چەرخێن مێژوویی تێدا دەربازبووینە هەر ل چەرخێ عوبەیدی و بڕۆنزی و هەتا دووماهیا سەردەمێ عوسمانیان».
ناڤهاتی گۆتژی: «گرێ گۆمل گرێدانەكا گرنگ ب شەڕێ گوگامێلا ڤە هەیە، كو مەزنترین شەڕە د مێژوویا كەڤن دا، د ناڤبەرا ئەسكەندەرێ مەقەدۆنی و داریۆشێ فارسی دا ل سالا 331 بەری زایینێ، كو ب سەركەفتنا ئەسكەندەرێ مەقەدۆنی ب دووماهی هاتبوو، نوكە هەلكۆلین ل سەر دهێنە كرن بۆ زانیاریێن زێدەتر ل سەر ڤی جهی د چەرخێن تێدا دەربازبووی».
