ل زاخۆ بەرهەڤیێن خوەپاراستن ژ كولێرایێ دهێنە كرن
زاخۆ، دلۆڤان هالۆ:
شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو دوهی 1/10/2023 گۆهدار شێخۆ، سەرپەرشتێ ئیدارەیا سەربخوە یا زاخۆ ل گەل لژنا بلندا ڕووبڕووبوونا نەخوەشیا كۆلێرایێ ل سنوورێ ئیدارەیا سەربخوە یا زاخۆ كۆمبوو.
بەرپڕسێ ڕاگەهاندنا ئیدارەیا سەربخوە یا زاخۆ ئاماژە ب وێ چەندێ ژی كر كو سەرپەرشتێ ئیدارەیا سەربخوە یا زاخۆ د كۆمبوونێ دا دیار كر، د نها دا نەخوەشیا كۆلێرایێ یا بەلاڤ دبیت، لەورا ب فەر د هێتە زانین ئەم خەلكێ خوە ل سنوورێ ئیدارەیا سەربخوە یا زاخۆ ئاگەهدار بكەین، ب تایبەت ل قوتابخانان، كو هەموو خوە ب ڕێكارێن ساخلەمیێ ب پارێزن و تووشی ڤێ نەخوەشیێ نەبن.
گۆهدار شێخۆ گۆت: «ئەوا د شیان دا بیت، وەكو ئیدارەیا سەربخوە یا زاخۆ ژ بۆ بەرژەوەندیا گشتی و خەلكێ مە، ئەم د ئامادەینە و دێ هەموو جهێن پەیوەندیدار ئاگەهدار كەین، كو ڕێنمایێن ساخلەمیێ ل سەر خەلكێ مە بهێنە بەلاڤكرن ژ بۆ چاوانیا خوەپاراستنێ ژ كۆلێرایێ، هەروەسا دووڤچوونا ژێدەرێن ئاڤا ڤەخوارنێ و جهێن فرۆتنا كەسكاتی و تەزیاتی و كافیتریا و چایخانان ژی بهێتە كرن، ژ بۆ حالەتێن زێدەبوونێ نەخوەشخانە و هەموو بنگەهێن ساخلەمیێ دێ كەڤنە د ئامادەباشیێ دا».
