چەندین كارگەهێن پیشەسازی ل زاخۆ دێ هێنە ڤەكرن
زاخۆ، دلۆڤان هالۆ:
شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو گۆهدار شێخۆ، سەرپەرشتێ ئیدارەیا سەربخوە یا زاخۆ، ل گەل هەر ئێك ژ ڕێڤەبەرێن پەیوەندیدار و لژنا گەشەپێدان و پشتگیریكرنا پڕۆژەیێن پیشەسازی و دەڤەرا پیشەسازی ل زاخۆ كۆمبوو.
بەرپڕسێ ڕاگەهاندنا ئیدارەیا سەربخوە یا زاخۆ ئاماژە ب وێ چەندێ ژی كر كو د كۆمبوونێ دا گەنگەشە ل سەر بابەتێن پڕۆژەیێن گەشەپێدانا پیشەسازی و دەڤەرا پیشەسازی ل دووڤ ماستەرپلانا نوو ل سنوورێ ئیدارەیا سەربخوە یا زاخۆ هاتە كرن.
شڤانی گوت: «د دەمەكێ نێزیك دا جهێ وان پڕۆژەیان دێ هێتە دەستنیشانكرن، كو ل پاشەڕۆژێ ئەڤ پڕۆژە بكەڤنە د خزمەتا وەلاتیان دا، بڕیارا ڕازیبوونێ بۆ ڤەكرنا چەندین كارگەهێن پیشەسازی یێن جۆراوجۆر هاتەدان».
