ئەرد ل سەر كەسوكارێن شەهید و زیندانیێن سیاسی ل دهۆكێ دێ هێتە بەلاڤكرن
پەیڤدارێ وەزارەتا كاروبارێن شەهید و ئەنفالكریان ئاشكرا كر، فەرمانا بەلاڤكرنا زێدەتری 11 هزار پارچەیێن ئەردی ل سەر كەسوكارێن شەهید و زیندانیێن سیاسی چوویە د بیاڤێ بجهئینانێ دا و بڕیارە ل دهۆكێ و هەموو پارێزگەهێن هەرێمێ كەسوكارێن شەهید و زیندانیێن سیاسی پارچەیێن ئەردی وەربگرن.
عادل حەمە سالح، پەیڤدارێ وەزارەتا شەهیدان بۆ رۆژناما ئەڤرۆ دیار كر، بەری نوكە سەرۆكایەتیا جڤاتا وەزیران فەرمان بۆ بەلاڤكرنا زێدەتری 11 هزار پارچەیێن ئەردی ل سەر كەسوكارێن شەهید و زیندانیێن سیاسی دەرئێخستیە و گۆت: «هەتا نوكە هەژمارەك ژ وان كەسێن فەرمانا وەرگرتنا پارچەیێن ئەردی هەی، ئەرد وەرگرتیە و ئەڤێن مایژی ب چەند قووناغەكان دێ ژ وەرگرتنا پارچەیێن ئەردی مفادار بن، چونكی فەرمانا حوكمەتێ بۆ بەلاڤكرنا ئەردی هەیە و مافێ وانایە وەربگرن».
عادل حەمە سالح گۆتژی: «هەتا نوكە ل هەژمارەكا دەڤەران فەرمانا بەلاڤكرنا پارچیەێن ئەردی هاتیە بجهئینان و كەسوكارێن شەهید و زیندانیێن سیاسی ژ وەرگرتنا وان مفادار بووینە، بەلێ هێشتا هەژمارەكا دی ژی ماینە و بڕیارە د داهاتی دا ئەو ژی پارچەیێن ئەردی وەربگرن، ل پارێزگەها دهۆكێ و هەمووپارێزگەهێن دی ژی دێ پرۆسا بەلاڤكرنا پارچەیێن ئەردی یا بەردەوام بیت، هەتا ئێك مالباتا شەهیدان یان زیندانیێن سیاسی مابیت دێ ئەرد بۆ هێتە دابینكرن».
