جاران خێزان ئەگەرە كچ ژ خواستیێ خوە جودا ببیت
شاهۆ فەرید:
پێكئینانا هەڤژینیێ قوناغەكا گرنگە د ژیانا هەر كچ و كورەكی دا، ئەڤ پرۆسە ژی د چەندین قوناغادا دبوریت و یا هەرە گرنگ ژی پشتی خواستنێ قوناغا دەزگریێ یە، بتایبەت بۆ كچێ، ژبەركو گەلەك گڤاشتن ل سەر دهێنە كرن ژلایێ دەوروبەران ڤە لەوما تووشی ئێشان و تێكچوونا دەروونی دبیت.
چالاكڤان جیهان خالد د دیدارەكێ دا بۆ رۆژناما ئەڤرۆ دیار كر كو ئەڤە قوناغەكا هەرە ب زەحمەتە بۆ كچێ چونكی خێزان و كەسانێن نێزیك و هەڤالێن وێ كاریگەریێ سەر دكەن، ئەگەرێ سەرەكی چاڤلێكرنە گەلەك جاران بۆیە ئەگەر ژێكڤە بوون پەیدا ببیت و گۆت:(بو نموونە جاران جودابونا كچێ ژ كوری سەرا تشتەكێ بچوك بویە، یان داخوازیێن زۆر دكەت ژبلی ئەوێن بۆ خواستنێ سەر رێككەفتین).
جیهانێ گۆتژی: (ئاستێ كچێ ژلایێ زانستی و رەوشەنبیری هەكە ژیێ كوری پتر بیت بزاڤێ دكەت خۆ ل سەر كوركی بێخیت، هەروەسان كوڕ ژی هەنە د وێ قوناغێ دا دكەڤنە دبن گڤاشتنێن مەزن ڤە ژ هەمی لایان ڤە، رۆژ بۆ رۆژ داخوازی پتر دبن دبنە بارگرانی بۆ كوڕكی، هەموو تشت نەب حەزا هەردووكانە گەلەك پشتی قوناغا دەزگریێ پەشێمان دبن و ژێكڤە دبن).
دەروونناس ژێهات حەكیم ژلایێ دەروونی ڤە دیار كر كو د جڤاكی دا پتریا جاران سەرەدەریا خێزانێ ل گەل كچێ دهێتە گۆهورین پتر توندوتیژیا زمانێ زڤر بكار دئینن و د مالباتێن مەزن دا ئەڤ چەندە روو ددەت.
ژێهات دیار كر ژی چێدبیت كچ ب كوستیرەكێ رازی بیت بەلێ خێزان دێ بێژیتێ ئەڤە دووری تیتالێن مەیە ب كێمێ رازی نەبە دا نەشكێی و گۆت: (جاران خالەت یان مەت ئەوێن گەل وان دژین كێماسیێن كوری دبێژنێ وەكو جانیا وی یان زەنگنیا وی و ئەڤ ئاخفتنە دوو دلیەكا زور دەف كچێ پەیدا دكەن كۆ یا شاش بۆ زویكا رازی بوی).
