یا ب دوگیان بووم زەلامێ من چۆ و گۆت هەكە من كوڕ بوو ناڤێ وی بكە (مەنال)
دیدار، سالار محەمەد دۆسكی
4-4
هندەك زەلام ل گەل مە بوون ئێكسەر ژ مە جوداكرن و گەلەك قوتان ب دارا و دەنگێ قوتانا زەلامان چوو بەر ئەسمانا و هەمان دەم هەر جار جار زەلام تینان و گەلەك قوتان و ئەشكەنجەدانەكا ئێكجار زوور و ئەو شەڤ بۆ سالەك وەرە ل بەر چاڤێن تە زەلام بهێنە ئێشاندن، بیرا من دهێت ل كەلها نزاركێ ل ممرەكی دا چم ئێك ژ لەشكرێن ئیراقێ حەیزەرانەك ل پشتا من دا و دا زڤرم ئێكێ دی دانا پشتا من و ئەڤە چ جارا ژ بیرا من ناچیت و نەبتنێ خەلكێ زێوێ بەلكو خەلكێ ئەڤان گوندێن دەڤەرێ هەمیێ ئینا بوونە كەلها نزاركێ، چاڤێ وی خەلكی ل دەرگەهێ كەلها نزاركێ بوو و هەر ماوە ماوە یێ بێژن ئەوێ هە فلان كەس ئینا و هەر ئێكسەر یێ دانێ و بێ دلوڤانی و دەنگێ ویێ دچیتە بەر ئەسمانا و كەسەك تەوەرێ ناهێت و بتنێ مە خودێ هەبوو هەوارا خوە بگەهینێ، هەر زەلامەكێ ئینا با دوا دگرت و دوا دقوتا، باوەریا تە ژ خودێ بهێت چاڤێن من تاری بوون و من كەسەك نەدیت و دلێ من ئاگر بەربوویێ بۆ ئەوان زەلامان هوسا بێ دلوڤانی ژلایێ ئەوی دوژمنێ زالم ڤە دهێنە قوتان و ئەشكەنجەدان، ئەو شەڤ نەشتی چ شەڤان بوو نەبوو سپێدە و گەلەكا درێژ بوو و هەتا بانگێ سپێدێ خەلكێ هشیار بوو و نڤستن نەبوو چونكە خەلكەكێ زور ل وێ كەلهێ بوو و هەتا بوویە سپێدە ئەم هەمی ئیناینە خوارێ و ب رێز كرین و گەرمەكا زور بوو و ترۆمبێل ئینانە دووف مەرا و هەمی كرینە پاسا دا و گەلەك هێلاینە ترۆمبێلان دا و ڤی خەلكی كرە هەوار ژ تهنا و برسا و ئەو خەلك مانە ل بەر تاڤێ و دەرگەهێن ترۆمبێلان گرتین و مە هەمیان كرە هەوار و كرە گری و پولیس هاتنە ترۆمبێلان دا و گەفێن قوتانێ ل مەكرن و هەمی عەرەب بوون و هەمان دەم كورد ژی ل گەل بوون و ئەگەر كوردان خیانەت نەكربا دا چەوا مە نیاسین ئەگەر كوردان نەگۆتبایێ ئەوا هەڤژینا پێشمەرگەكی یە دا چەوا مە نیاسن و ئەو خێزان هەمی ب ئەوان ترۆمبێلان ئینانە سەلامیێ ل مویسل وێ دەڤەرێ حەفت هول بوون و ئەو هول د درێژ بوون و ئەم چار رۆژا ماینە ئەوان هولان دا نە ئاڤ و نە خوارن و ئەوان هەر چار رۆژا من ئاگەهـ ژ چ كەسان نەبوو و چ دەنگ و باسێ، هەڤژینێ خوە مە نەزانین و هەمان دەم ژی ئەوا ژی چ دەنگ و باسێن مە نەبوون و نێزیكی (20) رۆژا ماینە سەلامیێ و دووڤ دا هاتن گۆتن كەیفێ بكەن و دەواتێ بكەن سەرۆك كوماری (سەدام حسێن)ی لێبورین دەركر و ل هەوە بوری و گەلەك زەلام رابوونە دەواتێ و دەست قوتان و ستران گۆتن و گازیكرن وەرن كەیفێ بكەن و دەواتێ بكەن و سەرۆك كوماری لێبورین دەركر دێ زەلامێن هەوە ئازادكەین و كەیفا گەلەكا هات و دەست ب دەواتێ كرن و گۆتن دێ زڤرنە جهێن خوە و مە گەلەك بزافكرن سەرەدانا ئەوا زەلاما بكەین ئەوێن ژ مە هاتینە جوداكرن و هولێن جودا دابوون لێ لەشكری نەهێلا و دووڤ دا ئەم كرینە زیلان دا و ترۆمبێلەكا لەشكری ل بەرا مە چوو و ئێك ل دووماهیێ و ترۆمبێلەكا لەشكری دناڤا مە دا چوو و ئەم برینە بەحركێ و وەجبەك سپێدێ بر وەجبەك دووف مە دا ئینا و برس و ترس و ئەم برینە دناڤا چولەكی دا و هاڤێتینە دناڤا سرریان دا و تشتەك دەستێ مە دانەبوو و گەلەك خێزان خودان زارۆكێن ساڤا بوون، لێ بلا بۆ مێژوو بهێتە تۆماركرن و گۆتن خەلكێ هەولێرێ چ كێماسی وی خەلكی دا نەهێلا و هەر تشتەكێ گرێدایی ژیانێ بیت بۆ دابینكرن و گەهاندێ و خوارن و ڤەخوارن و بیرا من دهێت حوكمەتا بەعس رێگری ل وی خەلكی كر و زالگەهەك دانا بوو لێ وی خەلكی سەر زالگەهێ دا دەربازبوون و وی دەمی رژێمێ هزرەك بۆ خەلكێ هەولێر كر و نەچاربوون ئاسنكاریا بكەت و مە خودیت ئەم ب خودان ب هاریكاریا وی خەلكێ هەولێرێ یێ ب شەف و رۆژ ل گەل مە و هەر تشتەكێ پێدڤی یا ژیانێ یا رۆژانە بوومە دابینكرن.
خانم فەزیلا زێوەی زێدەتر گۆت: پشتی ئەم چووینە (بەحركێ) رژێما بەحس گەلەك لێبورین دەركرن و ب لێبورینەكێ زەلامێ من ژی هاتەدەف مە و ئەو چەند بوو ئەم ژێك دیركەفتین و ئێدی مە ژیانەكا دی دەربازكر ل (بەحركێ) و پشتی ئەو هاتیە دەف مە گۆتی ئەم سێ شەڤ و سێ رۆژا هێلاینە ل كەلها (نزاركێ) و بەردەوام ئەم دهاتینە ئەشكەنجەدان ژلایێ رژێما بەعس ڤە و برسی و تهێنی و ئەم سێ سالا ماینە (بەحركێ) و دووف دا كوچا ملیونی دروست بوو وەك هەمی خەلكێ كوردستانێ جارەكا دی ئاوارەی سنوران بووین و ئەو (12) سال بوو مە زارۆك نەبوون.
هێشتا گۆت: بەری شەرێ داعش ئەو ماوێ هەشت سالان بوو زەلامێ من پێشمەرگە بوو ل قەزا شنگال و شەرێن چەسپاندنا قانوونێ ل كوردستانێ پشكدار بوویە و دو جاران بریندار بوویە و گەلەك جاران تێنی ل كاروانێن پێشمەرگەدا هاتینە ڤەدان و لەشێ وی هەمی سەجمەبوون وی دەمی (سەربەست تروانشی) بەرپرسێ وان بوو.
خانم فەزیلا ئەو ژی گۆت: باوەركە كەسەكێ هندی خەلكێ گوندێ مە ماندیبوون و زحمەت نەدیتی یە و قوربانی نەدایە و ژن و زەلامێن ڤی گوندی گەلەك خەبات بۆ مللەتی كریە و دبەردەوامن و نە پەشێمان ل سەر وێ خەبات و بەرخودان و رێبازا هەمبەر مللەتێ خوە كری و هەمی خەلكێ زێوێ ل گەل پارتی دیموكراتی كوردستان و ئەو تاكە حزب بوویە ل گەل ڤی خەلكی ل خوەشی و نەخوشیان.
ل دووماهیێ فەزیلا زێوەی گۆت: داخازێ ژ جهێن پەیوەندار دكەم چاڤدانا خەلكێ ماندیبوون و قوربانی داین بكەن و مە گەلەك رەزالەت و زحمەت دیت لێ ئەم نەپەشێمانین چونكە مە ئەف قوربانیەدا بۆ ئازادی یا مللەتێ مە.
