بلا د ناڤبه‌را من و ته ب تنێ دا بیت
د ناڤبه‌را من و ته‌دا بیت، ئه‌ڤ شه‌ڕێ نۆكه د ناڤبه‌را حه‌شدا شه‌عبی و داعشێ دا دهێته كرن ل پارێزگه‌ها سه‌لاحه‌ددین و تكریتێ، من پێ خۆشه حه‌ش دا شه‌عبی سه‌ر نه‌كه‌ڤیت!!. لێ ئه‌ڤه وێ رامانێ ناده‌ت كو ئه‌ز حه‌ز دكه‌م داعش بسه‌ركه‌ڤیت، نه‌خێر وه‌سا نینه. به‌لكو هیڤیدارم د ڤی شه‌ڕی دا كورد سه‌ربكه‌ڤن، ره‌نگه پسیار بهێته كرن ئه‌و ژی: چاوا كورد د ڤی شه‌ڕی دا بسه‌ركه‌ڤن و نه د پشكدار؟!.
د به‌رسڤێ دا دی َ بیرا خوانده‌ڤانێن هێژا ل گۆتنه‌كا (هینڕی كیسینجه‌ر)ی، وه‌زیرێ به‌رێ یێ ده‌ڤه‌ری ئه‌مریكا، ئینم ده‌ما ل ده‌ستپێكا شه‌ڕێ عێراق و ئیرانێ دا پسیار ژێ هاتیه كرن كو چاوا ئه‌ڤ شه‌ڕه ب دووماهی بهێت بۆ ئه‌مریكا باشه، یان كی ژ ڤان هه‌ردو وه‌لاتان بسه‌ركه‌ڤیت د به‌رژه‌وه‌ندیا ئه‌مریكا دایه، د به‌رسڤێ دا گۆت: خوزی هه‌ردو وه‌لات (عێراق و ئیران) شكه‌ستنێ بخۆن و كه‌س ژ وان سه‌رنه‌كه‌ڤیت. هه‌لبه‌ت ئه‌ڤ به‌رسڤه گه‌له‌كا سیاسی و دروستبوو بۆ به‌رژه‌وه‌ندیێن ئه‌مریكا، ل وی ده‌می و ب راستی ژی ئه‌و شه‌ر وه‌سا ب دووماهی هات!.
ژ به‌ر هندێ و ل گۆر دیتنا من، د ڤی شه‌ڕێ نوكه داعش و حه‌شدا شه‌عبی ل پارێزگه‌ها سه‌لاحه‌ددین و تكریتێ دكه‌ن، هه‌ردو هێز زیانه‌كا مه‌زن ڤێ بكه‌ڤیت، هه‌ر چه‌نده پێشبینی بۆ هندێ دچن كو سۆپایێ عێراقی ب پالپشتیا ئیرانێ دێ پێشڕه‌ویێ كه‌ت، چونكو بلا ئه‌م پشتراست بین هه‌كه سۆپایێ عێراقێ شیا بێی ته‌لافه‌ت و زیانه‌كا به‌رچاڤ بسه‌ركه‌ڤیت، هینگێ دێ ب گڕۆتینه‌كا (حه‌ماس) مه‌زن به‌رێ خوه ده‌ته كه‌ركووكێ و ل به‌رامبه‌ر هێزا پێشمه‌رگه‌ی راوه‌ستیت و دێ بیته هه‌ره‌شه‌كا مه‌زن بۆ مه كوردان.
داكو ئه‌م بشێین مه‌ترسیا ل سه‌ر كه‌ركووكێ كێم بكه‌ین و نه‌هێلین، گرنگه شه‌ڕێ حه‌وێجه ب ده‌ستێن پێشمه‌رگان ئێكلایی ببیت و رزگار بیت به‌ری تكریت و فه‌للوجه رزگار بن، ئانكۆ به‌ری حه‌شدا شه‌عبی به‌رێ خوه بده‌ته سنۆرێ كه‌ركووكێ. ژ لایه‌كێ دیڤه ئه‌ڤ شه‌ڕێ نوكه سوپایێ عێراقی دكه‌ت بۆ مه كوردان ده‌لیڤه‌كا باشه ل دژی تیرۆرستێن هێزا تاری چونكو ئه‌و هێز نه‌شێت ل دو چه‌په‌ران وه‌كو پێدڤی شه‌ڕی بكه‌ت، هه‌روه‌سا حه‌شدا شه‌عبی ژی نۆكه نه‌شێت رێگریێ ل مه بكه‌ت ژ بۆ كۆنترۆلكرنا كه‌ركووكێ ب ته‌ڤاڤی و نوكه ژی ده‌مێ هاتی ل شوونا ئه‌م به‌رگیریێ بكه‌ین، ئه‌م هێرشان بكه‌ین داكو ب باشی بهێنه پاراستن، چونكو باشترین خۆپاراستن هێرشكرنه.
ل مووسلێ و ده‌وروبه‌رێن وێ ژی، گرنگه كورد ب ژیرانه، وه‌ك هه‌ر جار، سه‌ره‌ده‌ریێ ل گه‌ل بارودۆخێ شه‌ڕی بكه‌ت، ئه‌و ژی ب پشكداریپێكرنا نه‌راسته‌وخوه یا توركیێ، نه‌ك راسته‌وخوه!!. گرنگیا پشكداریا توركیا بۆ دو خالان دزڤریت، ئێك: به‌رسینگگرتنا ئیرانێ و ده‌ستدرێژیا وێ د عێراقێدا كو ل پاشه‌رۆژێ مه‌ترسیه ل سه‌ر به‌رژه‌وه‌ندیێن هه‌رێمێ، دو: ده‌ركه‌تنا توركیا ژ خاكا عێراقێ ب ساناهیتره ژ ئیرانێ ئه‌و ژی ژ به‌ر دو ئه‌گه‌ران:
ئێك: عێراقا كو شیعه حوكمڕانیێ لێ دكه‌ن پێ خۆش نینه توركیایه‌كا سونن د خاكێ وێدا هه‌بیت، دو: توركیا ئه‌ندامه د هه‌ڤپه‌یمانیا ئه‌تله‌نتی دا و نه‌شێت ل گۆر یاسایێن ڤێ هه‌ڤپه‌یمانێ بێی ره‌زامه‌ندیا حوكمه‌تا عێراقێ د ئاخا وێدا بمینیت.
هه‌كه ئه‌ڤا مه گۆتی جێبه‌جێ بیت، ب دیتنا من یا تایبه‌ت، دێ كورد قازانجێ كه‌ن..
