هزرا تە دبیتە وێنەیێ كەساتیا تە
سالح حەكیم
تاپلۆیێ ئەقلێ مرۆڤێ پێگەهشتی بۆ پڕەنسیپێن جڤاكەكێ پێشكەفتی، كەڤالەكێ بەرهەمدارە د ڕەنگ و وێنەیدا، ئەم هەموو تابلۆیا وێنەیێ چەستەیێ خوە د ئێك وێنەدا دبینین، لێ وی وێنەیێ مەژیا د ڤەژینیت، ب گەلەك ڕەنگ و شێوازێن جوداتر دهێنە دیتن ئەو یەكە ژی ل دووف شیان و هەلبژارتنا مرۆڤی دمینیت، كا ئەو ساخلەتێن مرۆڤی بۆ ژیانێ ل سەر چو بنەما درۆست بووینە یان تە چو بەهرە هەیە نیشا جڤاكی بدەی، هینگێ مێژوو دێ وێ ڕاستیێ سەلمینیت.
هەر دەمێ مەژیێن مرۆڤان بوونە بەندە و ئێخسیرێ ناخەكێ پێژانكری، هینگێ ئەستەمە مرۆڤ بشێت تاپلۆیێ وێنەیێ خۆ یێ ژیانێ ب دیوارێ هزرێن خۆ یێن جوانڤە ب هەلاویسیت و وەكو كەڤالەكێ دیرۆكی بمینیت، لەو پێدڤیە ئەلترناتیڤا مە ژیێن خۆ بەرەڤ وەراربوون و داهێنانێڤە ببەین، ب لۆژیك كاری ل سەر بكەین، داكو بشێین بیتە هاندەرێ هێزێ بۆ پەرپاكرنا كۆمەكا شیانێن دی یێن هزری د نیشادانا وێنەی دا، بۆ چاڤێن تەماشەڤانی.
ئەرێ تا چ ڕاددە ئەم شیاینە دەوروبەران ژ ئەدایا داهێنانا خۆ رازی بكەین، وەك جڤاك بۆچی هەر دێ بینە فاكتەرێ پاشكەفتنا خوە د نیشادانا وێنەی دا، ئەو داهێنانا مرۆڤ ب رێیا مەژیێ خۆ دكەت هەكە ببینین وان جڤاكێن وێنەیێ ڕوویێ وەلاتێ خوە گەش و جوانكری، تاكە كەسێ وێ دەستپێكێ كارێ سەر بزاڤا مەژین خۆ یا كری، پاشی شیانێن وی بووینە باندۆرەكا كاریگەر د درۆستكرنا وێنەی دا.
هەموو جڤاكێن دونیایێ پێدڤی ب تاكێ داهێنەر و هزرمەند هەیە، چونكی بتنێ ئەو جۆرێ مرۆڤی، دشێن ببنە كلیلا دەرگەهێ كۆمەلگایەكێ هۆشیار و ئاڤرینەر.