جەڕكێ پیرێ
عەبدولرەحمان مەحموود
ل سەرێ هەمی سحاریان دگەل ئەلندا ڕۆژێ، پیرا منا داڤەكا ڕەش نەمایە ل پرچا وێ، لێ هێشتا هیڤیێن وێ بۆ ژیانێ وەكی وێ هەیڤا چاردەشەڤی ل ئاسمانەكێ ساهی د ڕۆن و گەشن، ئەو هەر ڕۆژ بۆ ئامادەكرنا تێشتا سپێدێ ژ وێ خەوا شرین دا سەرێ خۆ هەلینیت و دەستهاڤێتە شالا پشتێ و ل پشتا خۆ باش شدینیت، مالا وێ یا لسەرێ گوندی چەندەكێ ژ كانیێ دویرە، جەڕكەك هەیە، جهێ وی بكەلەمێ دیواریڤەیە، ل هەمی سپێدەهیا وی جەڕكی دا بدەستێ خۆ گریت و بەرەف كانیێ دەتە ڕێ، نە ل زڤستانا لبەر سڕێ و نەل هاڤینا لبەر كەل كەلا گەرمێ ئەو ئێك ڕۆژ ل وێ كانیێ نەمایە ڤاڕێ، هەر ڕۆژ جەڕكێ خۆ ژ ئاڤێ مشت دكر و بۆ مال دكەفتە ڕێ، تێشت ل بەر بانكێ دكەفتە هنداڤا ئاقارێ گوندی د دانا، تێشت چ تێشتە؟! ماست و سەرتیكێ مینا كەرێ مێلاكێ و سێنیك دمشت ژ ڕوینێ پەزی و قەلی و سفرە ڕاخستی ژ نانێ گەرمێ تەنویرێ و ئاڤا تەزیا جەڕكێ داپیرێ یە، تێشتەكە تە دڤێت هەر بخۆی، ژئاڤا جەڕكێ پیرێ ژی تێر ڤەخوی.
