دەست
چیڕۆك:
ڕامۆن گۆمێز لا سیرنا*
كوردیكرن: بلند محەمەد
دختۆر ئەلیخۆ مر، ب كوشتی هاتە دیتن …ئەو ب خەندقاندنێ مر.
د سەر هندێ را كو دختۆر دەمێ دنڤست، دەرگەهێ لیوانكێ دهێلا ل تاق، ئەو ژی ب ئەگەرێن ساخلەمیێ وەدكر، لێ ئەڤە چ گۆمانان پەیدا ناكەت كو كەسەك چوو بیتە د مالا وی ڤە، چونكو ئەو ئاڤاهیێ دختۆر تێڤە دژیا، گەلەكێ بلند بوو، لەوا هەموو گۆمان بنبڕ دكرن كو كوژەك د دەرگەهێ لیوانكێ ڕا هاتبیتە ژۆر.
پۆلیسان نەشیان دەزیەكی ژ دەزیكێن تاوانێ ببینن، هند مابوو مەلەفێ ڤی دۆزێ بێ ئەنجام بهێتە گرتن، لێ ژ نشكاڤە ژنا دختۆری و خلمەتكارا وی ب سینگەكێ تژی بترس ڤە، ب ژۆر بنگەهێ پۆلیسان.
ئەو كەتە سەر مێزێ، ژ بلنداهیێ خوە هاڤێتە سەر خزینكێ، ئاوری ل مە ڤەددان، ئەم دیتن ژی دەمێ مە سەحدكرێ كو ژ ژۆرەكێ د ڕەڤی ژۆرەكا دی. ئەو بتنێ دەستەكێ زێندی بوو وەكو تەڤنپیركان بوو…مە ئەو هێلا د ژۆر ڤە پشتی مە دەرگەهـ لێ گرتی. ئەڤ چەندە بوو ئەوا ژنا دختۆری ل بنگەهێ پۆلیسان شرۆڤەكری.
هۆسا، پۆلیس و دادوەر ب دلێن تژی ترس و سەهمڤە ب لەزگینی گەهشتنە جهێ تاوانێ. ئەركێ وان بوو وی دەستی دەستەسەركەن. چەند شیانان ژ وان بخوازت ژی، ڤێت وی دەستی نێچیر بكەن. ل داویێ ئەو شیان وی دەستی دەستەسەر بكەن. پشتی هەموویان پێكڤە ئێك تل ژێ گرتی و كێشاین، ئەو گەلەكا بهێز بوو، هەتا وێ رادەیێ وان وەسا هەستپێكر كو هێزا زەلامەكێ زەبەلاح تێدا كۆمڤەبوویە.
پرسیار ئەو بوو، دێ چ ل ڤی دەستی كەن؟ و چ تشتەكێ نوو ئەڤ دەستە دێ ل سەر تاوانێ زێدەكەت؟ و چ حوكم دێ دەرحەق وی دەستی دا هێتە دان؟ پاشی… ئەڤ دەستە یێ كێ یە؟
پشتی هزركرنەكا كوور، هۆسا هاتە هزرا دادوەری كو قەلەمەكی دانتە برەخ ڤە، دا تشتەكی بنڤیست. هۆسا وی دەستی قەلەم ڕاكر و ئەڤ چەندە نڤیسی:
«ئەز دەستێ ڕامیرۆ ڕویس م، ئەوێ دختۆری ل نەخۆشخانەیێ كوشتی، و خۆشی ژ پرتپرتكرنا لەشێ وی دبر، دەمێ بریە د ژۆرا شرۆڤەیێ دا. نوكە، من ژی دادی بجهكر».
* ڕامون گۆمیز دی لا سیرنا (Ramn Gmez de la Serna 1888-1963): نڤیسەر و ڕاگەهاندكارەكێ ئەسپانی یە. ژ ئێكەمێن بزاڤا پیشەنگێن ئەسپانیایێ بوو. ل ئەسپانیایێ ژانرەكێ نوو یێ وێژەیی ئانی بوو پێش كو بناڤێ Gregueras. ژ گرنگترین كارێن وی: «زەلامێ بەرزە»، «گۆیا»، «پەرتووكا بێدەنگ». ل گەل دەستپێكرنا شەڕێ ئەهلی، چوویە ئەرژەنتین. كارتێكرنا خوە ل سەر وێژەیا ئەسپانی و لاتینی هەبوویە.
