رۆژانە بكڕێن (قەهوە یا كوردی) د زێدەبوونێ دانە
سندس سالح سلێڤانەیی:
جۆرەكێ قەهوێ ل بازارێن هەرێمێ دهێتە فرۆتن 90% ژ پێكهاتەیا وێ خۆمالی یە، لەورا خەلكەك دبێژیتێ قەهوا كوردی و ناڤێ وێ یێ دروست (قەهوا شیوخ) ە.
خالد شەمام، بەرهەمهێنەرێ وێ قەهوێ یە، د دیدارەكێ دا بۆ رۆژنامەیا ئەڤرۆ دبێژیت: قەهوا شیوخ، براندەكێ نوویە و تاما وێ یا جودایە ژ وان قەهوێن دی یێن دبازاری دا، نوكە ئەم سێ جۆران بەرهەم دئینین (ناڤنجی، چكلێت، كەزان) و د پلانا مە دایە ل پاشەرۆژێ پێنج هەتا شەش تامێن دی بەرهەم بینین، هەروەسا دێ چەندین جۆرێن دی تێكەلكەین.
هەروەسا گۆت: نوكە مە چارجۆرێن تێكەلكرنا هەنە، ب شێوەیەكێ گشتی دشێم بێژم هەموو قەهوە د ئۆرجینالن، دەربارەی بهایێ وێ ژ دۆلارەكی دەستپێدكەن هەتا (2500) دۆلاران بۆ هەر كیلۆیەكێ ل وەلاتێن جیهانێ، لێ ئەو قەهوا ئەم چێدكەین كیلۆیا وێ دگەهیتە (25) هزار دیناران و ئەڤ چەندە ل دووف جۆر و كوالیتیا وێ دمینیت و رۆژانە بكڕێن قەهوا كوردی ل سەر ئاستێ هەموو پارێزگەهێن ئیراقێ د زێدە بوونێ دانە .
