پێدڤیە کچ و کوڕ بۆ هەڤژینیێ لدووڤ ترێندان نەچن
زنار تۆڤی:
د نوكە دا ژبلی چێكرنا ئەلبۆما نیشانی و داوەتێ، ئەلبۆما بووك و زاڤا یا قەهوێ ژی دەركەفتییە و ئەڤ چەندە یا بوویە بارگرانی ل سەر ملێن وان گەنجێن دڤێن ژیانا هەڤژینیێ پێكبینن.
ڤەژین شەوكەت، مامۆستایە ل پشكا جڤاكناسییێ ل زانكۆیا دهۆكێ، دیار كر، ل هەر سەردەمەكی، هندەك گۆهورین ل سەر دابونەریتێن جڤاكی دا دهێن، ئەو ژی لدووڤ وان هەموو گۆهورینێن ل ڤێ جیهانێ روو ددەن، ئەو گۆهورینە ژی هندەك بۆ جڤاكی د باشن، هندەكێن دیتر ژی د خرابن و گۆت: ئێك ژ رێو رەسمێن گرنگ د پرانیا جڤاكان دا رێو رەسمێن پێكئینانا هەڤژینیێ نە، د هەر جڤاكەكی دا ب رەنگەكێ جودا دهێنە ئەنجامدان، د بەرێ دا جڤاكێ كوردی رێو رەسمێن كلتوری یێن گەلەگ تایبەت هەبوون، كو تێدا گرنگییەكا مەزن بو بهێز كرنا پەیوەندییێن خێزانی د هاتە دان، بەلێ نوكە و ل سەردەمێ سۆشیال میدیایێ، ئامرازێ چاڤلێكرنا كۆرە و نەرێنی دناڤا خەلكی دا گەلەك ب هێزتر لێ هات.
ڤەژینێ ئەو چەندە ژی دیار كر كو دیتنێن گەنجان بۆ پێكئینانا خێزانێ یێن بووینە كۆپیكرنا وان تشتێن نە بەر ئاقل یێن د سۆشیال میدیایێ دا دبینن و باوەر ژێ دكەن، ئەو هەموو دەنگێن بلند دبن كو دبێژنە كور و كچان، هەكە رەگەزێ بەرامبەر بۆ تە ئەڤە نەكر، رامانا وێ ئەوە كو حەز ژ تە ناكەت و ژیانا تە یا هەڤژینیێ یا سەركەفتی نابیت و گۆت: د دەمەكی دا، ئەوێن ل سەر سۆشیال میدیایێ، ئەڤ بابەتە لدەف وان ب تنێ بازرگانیەكا بێ ووژدانییە و راستی تێدا نینە و گەلەك كێم راستی تێدا هەیە.
ماموستایا زانكویێ گۆتژی: ئەڤرۆكە پێكئینانا خێزانی یا بوویە ب رەنگەكی كو دڤێت لدووڤ ترێندا بەربەلاڤ د سۆشیال میدیایێ دا بهێتە كرن، ئاریشا هەرە مەزن ئەوە كو ئەوا بەربەلاڤ بارگرانیەكا مەزن یا ئابۆرییە ل سەر ملێن ئەوی گەنجێ دڤێت ژیانا هەڤژینییێ پێك بینیت، ژ ڤەخوارنا فنجانا ئێكێ یا قەهوێ ل مالا كچێ، بۆ خوازگینییا بۆ نیشانییێ و خەنایێ و دەواتێ،، ئێدی دڤێت هەموو ب جلكێن نوو فۆتۆگرافەر و ب دیاری و شرینییان مێزێ پر بكەت و خوارن و ڤەخوارنێن ب بها بینیت، د ڤی بارێ ئابۆری یێ ب زەحمەت دا و نەبوونا دەلیڤێن كاری بۆ رێژا پتر یا گەنجان، ئەڤ هەموو مەزاختنێن زێدە و بێ رامان، مرۆڤان ژ هزرا پێكئینانا هەڤژینییێ دوور د ئێخن.
جڤاكناسێ د بەردەوامیا ئاخفتنێن خۆدا گۆت: لەوما د نوكە دا، گەنج نابێژیت، من هەڤژینی پێك نەئینایە، چونكی من كەسەكا باش نە دیتییە، بەلكی دێ بێژیت، شیانێن مندا نینە ڤان مەزاختنێن زێدە بدەم و د شیانێن مندا نینە ب ڤی رەنگی ژیانا هەڤژینییێ پێك بینم، هەروەسا پێشبینی یێن جڤاكی یێن هەردو ئالییان بۆ هندێ نە، كو كور یان كچێن وان ب كێمی نەهێنە دیتن دناڤ خێزانێن وان دا، ئەڤە فشارەكا مەزن د ئێخیتە سەر وان گەنجێن دڤێن هەڤژینییێ پێك بینن، هەروەكی بهایێ مرۆڤی د كیلۆیەكا بەقلاوێ و شریناهییان دا دهێتە دیتن.
مامۆستایا زانكۆیێ دیار كر ژی، هەرچەندە پێكئینانا هەڤژینییێ ئامادەكارییەكا ئابۆری یا باش دڤێت، بەلێ ژبۆ ژیانا هەڤژینییێ ژی ئەو تشتێ پێدڤی نەكەت، پێدڤییە كور و كچ گەلەك د هشیار بن و ژیانا وان یا تایبەت ژ ترێندێن سۆشیال میدیایێ گرنگتر بیت و گۆت: هەكە حەز بۆ مەزاختنێن مەزن ژی هەبن، یا گرنگە ب هەڤپشكی وان رێورەسمان هەموویان بكەن، داكو ل پاشەرۆژێ ژیانەكا ئارام و بێ ئاریشە ببورینن و ژبیر نەكەن كو هەر دەینەك ئاریشەكە.
