خوارنـا نـاڤ تازیان یا بوویە داوەت نەبی؟!
عەبدولرەحمان بامەرنی
ئێك ژ بابەتێن گەرمێن ل ڤێ دووماهیێ سۆشیال میدیا بخوەڤە مژویل كری، بابەتێ دروستكرنا خوارنا ناڤ تازیانە. نە بتنێ سۆشیال میدیا، بەلكو بنەمال، گوند و تا عەشیرەتێ ژی ل گەلەك جهان كرینە بریار، كو نابیت خوارن ل مالا خودانێ تازیێ بهێتە دروستكرن. هەر كەسێ دویڤچوونا بابەتی ژی كربیت و تایبەت سۆشیال دەرگەهێ دانوستاندنێ ل بەر دیتنێن جودا ڤەدكەت، هەمیان دەستخۆشی ل ڤان پێنگاڤان كرن، ژبەركو بارگرانیەكە دكەڤیتە سەر مالا تازیێ و دگەل خەمێن تازیێ و ژ دەستدانا خۆشتیڤەكی، بارگرانییا مەزاختیێ خوارنا تازیێ ژی دهێتە سەر و هەر وەكو من گۆتی سۆشیال دەرگەهێ دانوستاندنێ لبەر هەمیان ڤەدكەت، د ناڤ هندەك كۆمێنتان دا هاتبوو، ئەرێ ما چاوا بەهیچنەك ژ دویر بهێت و ئەز بێ خوران بزڤرینم؟ د كۆمێنتەكا دیدا ئاماژە ب سندۆقا بنەمالێ ددان، كو مە سندۆقا بەخشینێ یا هەی و بنەمال یان گوند هەمی تێدا پشكدارە و بارگرانی ناكەڤیتە سەر خودانێ تازیێ و ئەڤە و چەندین دیتن و كۆمێنتێن دی، كو رەنگە هەر ئێكی بارەكا مافی دگەلدا هەبیت، لێ ئەگەر ژلایەكێ دیڤە ل بابەتی بنێرین، بۆچی بابەتێ خوارنا ناڤ تازیێ خەلك دلگرانكریە و سۆشیال میدیا لێ هاتیە دەنگ؟ دێ بینین رەفتارێن هندەكان و زێدەرەوییا هندەكان ل سەر هندەك بابەتان، بووینە ئەگەر كو چاڤلێكرنێن نە د جهێ خوەدا بهێنە گۆرێ و ئەگەر هندەكێ ل سەر خورانا تازیان راوەستین و ئەو چ ئەگەر بوون كو ئەڤ بریارێن هەنێ یان ئەڤ مشتومرێن هەنێ ل سەر خورانێن تازیێ دروست ببن، ئەڤێن ل خوارێ نە: ئێك: ل ڤێ دووماهیێ دابونەریتەكی سەرهلدا، ئەو ژی برنا بەهیچنان بۆ خورانگەهان و بابەتێ خورانگەهێ ب بابەتێ (كەیس ماقیلی، خوە شەرمكرن، خوە كێمنەدیتن و ما ئەز ژكێ كێمترم)ڤە هاتە گرێدان. دو: د كوردەواریێ دا دەما تازی بۆ ئێكی دروست دبوو، مالا مری خوارن چێنەدكرن، بەلكو دەروجیرانان خوران بۆ مالێ دئینان و ئەڤێن دی هەر ئێكی قەستا مالا خوە دكرن، بتنێ ئەگەر كەسەك ژدویر هاتبا، ئەو ژی نە خوارنگەهـ هەبوون و رێورێبار نەبوون. نوكە هەمی تشت بەرۆڤاژییە و ژبەرفرەهبوونا باژێری، كەس تازیێ ل مالێ نادانیت بەلكو هۆلێن تایبەت یێن هەین، پڕانییا جاران ژی ئەو هۆل ل تاخێن دینە ژمالا خودانێ تازیێ، ل ڤێرە پرسیار تو بەهیچنی و خوە هەكە چەندێ نێزیكی خودانێ تازیێ ژی بیت، دەما دبیتە وەختێ شیڤێ، قەستا مالا خوە بكە خورنا خوە ب خۆ و پاشی هەرە مالا تازیێ! بۆ ئەڤێن ژدویر دهێن، یان درەنگ ب تازیێ دزانن، ئەرێ دێ بۆچی وەختێ خورانێ قەستا مالا خودانێ تازیێ كەیی؟ خالا دی ژی كو ب دیتنا من گەلەك یا بێ رامانە، دەما دبیتە رۆژا دوویێ ژ تازیێ و پشتی نڤێژا (مەغرەب)، دێ كۆمەكا مەزنا مرۆڤان بدویڤ مالا تازیێ كەڤن بۆ شیڤ خارنێ، پرسیار بكە؟ دێ بێژن مانێ رۆژا دووماهیێ یە و هەر وەكو خودانێ تازیێ ژی یێ وەغەركری و چ جارەكا دی نابینتەڤە و دگەل ئەڤێن من گۆتین هەمیان و گەلەك ژێ من نەگۆتین، بۆ هندەكا یا بوویە بابەتێ (داوەت نەبی)، ئێ بەهییە دێ خورانەكا خۆش خوین! ئێ بەهییە و خودانێ مالێ یێ زەنگینە، دێ مە بەتە خورانگەهێ! خودێ بێژی خوارند د مالا وان ڤە نینە، یان قەستا مالا خوە بكە و ئەگەر نەشێی قەستا مالا خوە ژی بكەی، د رێكێ دا دو لەفێن فەلافلا بخوە و پاشی هەڕە مالا بەهیێ و بۆ ئەڤێن داوەت نەبیێ نەزانن ژی، دێ وێ ژی بێژم. رۆژێن تایبەت هەبوون داوەت نەبی دگێران، ل سەر بانەكی خوران رێزدكر و هەر ئێكی كەفچكێ خوە دهەلگرت و دچوون خوران دخوار، ژبەركو خوارنەكا بەلاش و ب هزرا وی ژ یا مالێ خۆشتربوو.
