تفا پەشێمانیێ
ئەدیب عەبدوللا
تەنا تلێن وێ دناڤ دەستێن خۆ یێن لەرزۆك دا گڤاشتن، بلەز راكێشا بەر ب سینگێ خۆڤە، پشت و پشت ئێخستە سەر وێ پارچا مەحفیری، جانێ وێ ب جارەكێ ڤەشارت بتنێ دو باقێن سپی وەكی داردینكا خۆ دابوونە كێلەكا، لێڤێن وی ل جهەكی نە د سەكنین، بن گوهێن وێ مینا وان حەلانێن بۆ خوێ ددانە پەزی، تە دگۆت مێشە ل دۆر شانێ سەرێ وێ ژ ڤی ئالی بۆ ئالیێ دی د قولپاند، خوازیا وی وەكی خوناڤا سەحارییان بن گوه و گەردەنا وێ پاوان دكر، ب تلێن خۆ یێن بێ شەرم هیلاكا جلكێن وێ ئینا، دناڤ سنوورا ڤە چوو دهەمی پاوانا د گەرا تە دگۆت زارۆیێ ساڤایە هێڤێنێ شەرم و ترس و گونەهێ د سەری دا نەمابوو، دڤییا وێ سەحارێ تاما سویرەتێن وێ هندا كەت و كەربا دلێ خۆ دارێژیت.
روپێنەكێ قوقلكێن گوهێن وان هنگاڤت، هەستێ وان هەژیا ب ترس ڤە هەر ئێکی خۆ ل كوژیەكی قوتا.. ئێخسیرێ خولكێ خۆ ب جارەكێ ئێخست خاڤاتیێ، گەه و بار لێ شلكرن.
– هیڤی دكەم كەس نە زانیت، هەكە دێ مە كوژن، تو یا بچویكی لێ یا ژیر مەزن بە، هەر بتنێ ب سەر هەژاندنێ بەرسڤ لێ دا.
زوی خۆ لێكدا، پێلاڤ دا سەر پێ، خۆ دەرگەه ل دویڤ خۆ را گرت. تێزڤە بوو رێكێ. هزرێن وی قەستا كوینێ خۆ كرن، ترسێ خۆ ل دۆر بەژنا وی ئالاند، رەجڤكێ پێنگاڤێن وی كورتكرن، تفا پەشێمانیێ ل خۆ باراند، دەرگەهێ ژۆرا خۆ ڤەكر، هەر هات و چوو.. جهێ وی تێڤە نەكر، سەرێ وی بوو، دولابا هزرا هەر ئێكی خۆ ل جهێ یا دی دا، كون مشك لێ بوونە قەیسەری، هەمی مرۆڤ دیمەن بوونە هەلامەت و مویێ ملكە موتێ د جاما پەنجەرەیێ را پێش وی ڤە دهێن، هەی هاوار دێ چ بێژمە روویێن خۆ یێن قایم! بۆچی من فرێكر؟
بۆچی سەحارێ وێ تێشت ئینا؟! هەی زەنگا تێلەفونێ لێدا، خۆ ب رمەكێ هەلاڤێت، دەڤێ وی زوها بوو لێڤێن وی قەرسین.
– ه ه ه ه .. ئەلو.
– …..
ئەڤە چ قاونە .. برەڤم ، بتەقم! دەرگەهێ ژۆرا خۆ هێلا تاق، خۆ بەردا دناڤ دلێ بازاری دا، قەستا كۆلانێن تەنگ یێن كەس خۆ نە دەتێ كر.
دیارە ئەڤ كۆلانە لسەر ناڤێ من تاپوو بووینە، نێ نە ب من بوو، گەلەك جاران دەما یاری ب كچا من دكرن خۆ شۆڕ دكرە هنداڤ، سینگێ وێ یێ قیت خۆ دناڤ ئێلەكی دا نەدگرت، چاڤزلكانا چاڤ و هەستێن من دكر، ئەز ب هەمی ڤە بوو ئالیێ خۆ دبرم، ژبیرڤە دبرم وێ رۆژێ گۆت: كچا تە چەندا جوانە یا ب تەڤە چووی، خوزیا ل وێ یا ئێكا وەكی وێ ل تە ببیت..
ڤێجارێ قورتال بوون نە هندا ب سانەهی یە، دێ خویكەكا مەزن ژ من هێتە خاستن. یا قەنج ئەوە نەخشە رێیا خۆ رزگاركرنێ دارێژم، باشە گەر دەستوریێ ل جهێ كاری بخوازم بۆ چەند رۆژەكا ل دویڤ هایێ دلێ خۆ بكەڤم، گەشتەكێ بۆ جهێ بیرهاتن و كەس و كارا ببەم، دەما دەنگ ژ سوحبەتێ دهێت دا هەر زوی خۆ ل سنوورێ دەولەتەكێ وەركەم، نە هەكە ئەز یێ دەرڤەی وەلاتی بام حالێ من ئەڤە نەدبوو.. هزرەتا من نە دبوو دێمەكێ وەكی یێ وێ دا رۆژێ دەهێن ل وێ جانتر بەر من دا رازێن، نە ما دێ بوو خۆ ژێ ترسینم، هولكا وێ یە هزرەتا وێ لاوەكێ وەكی منە خۆ لێ بكەتە خودان و ئاگرێ هناڤێن وێ ب تەمرینیت، تە نە دیت وەختێ ئەز گڤاشتمە هەمبێزا خۆ من دگوت ها دێ دناڤ باوەشا خۆ دا داعیریت..
ئێڤاری سەرێ خۆ دناڤ لنگێن خۆ ڤەنا و سینگێ قیت كرە ریێا مال، هندەك جارا تەزینك د لەشی دا دچوونە خوار لێ خۆ تێنە دگەهاند، هێشتا دەست وچاڤ نە شویشتی فەرخە سێنیا خوارنێ چاڤەریێ وی دكر هەكە نڤێژ كری نە كری خۆ پان كرە ل دۆرێن فەرخە سێنیێ، دبەر خوارنێ ڕا ئاڤری ددانێ و یێن وێ ڤەدگێران، هەر وەكی داخوازا دیتنەكا دی ژێ دكەت.. بەفر فێلا خۆ نا هێلیت.. رۆژ بۆ رۆژێ ل ئێك بستەه بوون ل دەلیڤا دگەریان .
رۆژەكێ وێ سەبحێ گۆتێ: ئەز هەست ب خاڤاتی و مەزن بوونا زكێ خۆ دكەم، نەكە سوحبەت خەلەت ببیت.
هادر كەڤتە د گێژەڤانكا فهێتیا خۆ دا ل دەمێ نەخشە بۆ سەردابرنا وێ دانای یان ژی دەمێ مرۆڤێن وی دگۆتێ: جیرانێن تە زۆر دباشن و دقەدر گرن و تە ئێمانەت، وی ژی د دلێ خۆ دا گۆتی: بەس قەدر گرن! مەردێن وەكی وان هەر ئەو بخۆ نە.
– من و برایێ تە ژی بەركێن خۆ برینە بەر ئێك.
ئێكسەر جرڤ و بشكوڕینەكێ ناخێ وی نخاڤت لێ ل خۆ دیار نەكر و خۆ مرویتی كر، د دلێ خۆ دا گۆت: ئەڤە باشترین نەخشێ خۆ رزگاركرنێ یە.
بێدەنگی و مرویتیا وی كار ل هەستێ وێ ژی كر و دناخێ خۆ دا گۆت: زەلام ئەڤ زالمەنە.. ئەڤە چەندە یا دلێ وی دخوازیت تەخسیریێ ناكەت، دەمێ من بەحسا برایێ وی كری چەند تۆڕە بوو!
– ما تە نە گۆتبوو: دێ هەول دەم تو نێزیكی من ببی، من ژی ل دویڤ حەزكرنا تە ئەڤە یا كری. بەس هوین زەلام خۆ بتنێ دبینن!
چەندەك پێ چوو پولیسا دۆرێن وی گرتن بێی كو بزانیت ژبەر چییە و بیر ل تفا پەشێمانیێ بكەت، گۆتێ: ئەز نیمە برایێ منە.
