بچویكترین كارساز
ئازاد بەرواری
خورتەكێ نەهـ – دەهـ سالی، مالا وانا ل داویا تاخێ بنی یێ باژێڕی بوو، پشتا مالێن وانا بیستان و زەڤیێن كشتوكالی بوون. خودانێ ئێك ژ وان بیستانا، كابرایەكی دۆرێن پێنجی سالیێ بوو، ژنا دوێ ژی ئینا بوو، لێ خودێ چ زارۆك پێ نەبەخشی بوو. یێ هەیی بوو، بیستانەكێ مەزن هەبوو، ل دویف وەرزێ سالێ چاندن دكر. ب ڕەخ بیستانێ خۆڤە كەپركەك ئاڤا كربوو، ترازیەك و هندەك شتی و گندوور و هندەك بەرهەمێن دی یێن بیسانێ خۆ بو فرۆتنێ لێ دانا بوون. وەك زەلامەكێ بازاڕ خۆش و ئارام ودەڤ ب گڕنژین و شوكری ب ناڤ و دەنگ بوو. سپێدەهیا چەند پیكەمەك دهاتنە بەر بیستانێ وی و شتی و بەرهەمێن دن بار دكرن. یێن مایی ژی وی بخۆ دفرۆت. ئەو خورتێ دەهـ سالی، زارۆكەكێ سەیر بوو، هەر ژبچویكاتی ڕەفتارێن زەلاما لێ بوون، خلمەت خۆش بوو، هاریكار بوو هەما ب هەستی سڤكێ تاخێ هاتبوو نیاسین، هەركەسەك دنیاسی و هەمیا ژی ئەو دنیاسی.
ڕوژەكێ پارەكێ بچویك «ب دەست كەفت، بۆ میناك :پێنج سەد دینارەك» هزرێن خۆ كر چ لێ بكەت؟ چو دەڤ خودانێ بیستانی و گۆتێ: خال، ئەڤ شتییە ب چەندێ یە؟
– ب ٧ هزارایە.
– پا ئەڤە؟
– ب ٩ هزارایە.
پا ئەڤێ هەنێ ب چەندێ یە؟
خودانێ دكانی گۆتێ: خورتۆ، كا بێژە تە چەند پارە هەنە، داكو شتییەكێ ل دویف پارێ تە بدەمە تە.
كوڕكی دەستێ خۆ ڤەكر و ب تنێ پێنج سەد دینار بوون.
خودانێ بیستانی.. كرە كەنی و بەرێ كوڕكی دا بنێ شتییەكا كەڕك ل ناڤ بیستانی كو هێژ كولیلك بوو و گوتێ: ئەڤ شتییە بتنێ ب پارێ تە دهێت.
كوڕكی ژی هەما ب لەز گوتێ: باشە، ئەز ڕازیمە، و پارە دانا بەر سینگێ خودانێ بیستانی و گۆتێ بەس ژێڤە نەكە.
بۆ چەند ڕوژەكێن ل دویڤ دا هەر ڕوژ ژ مال شیشەكا ئاڤێ دبر و شتییێ خۆ ئاڤ ددا، پشتی هەفتیەكێ شتی مەزن بوو. زارۆك چو دەڤ خودانێ بیستانی و گوتێ: خال، ئەگەر ڤی شتیێ من بفرۆشی، دێ ب چەندێ چیت؟
خودانێ بیستانی بەرێ خۆدا شتی، گەلەك مەزن ببوو و ئێك ژ شتیێن هەری مەزن یێ د ناڤ بیستانێ وی دا بوو. سەرێ خۆ خوراند و گۆت: نێزیكی پازدە هزارا.
كوڕێ هێژ زارۆك گۆتێ: دێ باشە، پێنج هزار بۆ تە و من ب دەهـ هزارا داتە.
دەڤێ خودانێ بیستانی زوها بوو، كو وەسا ب لەز كەفتە ناڤ بازاڕەكێ وەسا كو نەزانیت چاوا ژێ دەركەڤیت. چ پێ نەما و هەما گوتێ: باشە و ناچار بوو دەهـ هزار دینار دانە كوڕكی.. و هێژ ئەو یێ مەمنون.
