ژ بەر قوتانـێ من ١٦ فانێلە كرنە بەر خوە
دیدار، سالار محەمەد دۆسكی:
5 – 5
ب چ رەنگا نابیت هاریكاریا پێشمەرگەی و كەسەكێ نێزیكی وان بكەی و ئەز و مەعدەن پێكڤە ئازادكرین و من گۆتێ كا ترۆمبێلەكێ بگرە هەما ب چەندێ بیت دا مە بگەهینتە دهۆكێ و ئەم چووینە گەراجی و مە گۆتێ ترۆمبێلەك تایبەت مە بگەهینتە دهۆكێ مە دیت ترۆمبێلەكا كرونا وێرێ ربوو و ئێكێ خودانێ كولاڤ و دەرسوكا خودانێ وێ بوو ئێكسەر هات و گۆت وەرن ئەزدێ هەوە بەم و مەعدەن چوو دەسپێكا ترۆمبێلێ و مە چیرۆكا خوە بۆ شوفێری گۆت و مە پێشتر پارەدابوونێ و دەمێ ئەەم گەهشتینە دهۆك و راستا مزگەڤتا مەزن ئێكسەر دەست هاڤێتە بەریكا خوە و پارێن مە ئینانە دەر و گۆت هەرن هوون سەر چاڤێن من هاتن دێ چەوا پاران ژ هەوە وەرگرم و ئەم بێ بەرامبەر ئیناینە دهۆكێ، رۆژا ئەینی بوو و بابێ من نەشیا ل مال بیت ژ قەهرا و بابێ من هات بوو مزگەڤتێ دەف مەلا شوكری یێ ناڤشكی بوو ل مزگەڤتا مەزن یا دهۆكێ بوو و خال من ل گەل بابێ من بوو دا چیت دەست نڤێژێ شووت وی گازی بابێ من كر و گۆت كورێ تە هات و دەمێ چاڤێن وی ب من كەفتین و سەحكرە من قەمیسێ من وەك داری لێ هاتیە و ناڤ چاڤێن من هەمی بووینە خوین، ئێكسەر كەفت و مەلا سمائیل هات و گۆت خێرە؟، من گۆتێ ئەڤە كورێ وی ئازاد بوو و خالێ من برمە دوكانا ئێكێ گەلناسكی و گۆتێ جلكێن وی ب گوهورن، و جلكێن پیس من هاڤێتن و جلكێن نوی كرنە بەر خوە و من گۆت دهۆك ل من حەرام بیت و من كلاشینكوفەك كری و چووم بوومە پێشمەرگە.
پێشمەرگەیێ شۆڕەشا گولانا پێشكەفتنخواز، زێدەتر گۆت: ل سالا 1984 بۆ جارا ئێكێ من چەكێ شەرەفێ هەلگرت و بوومە پێشمەرگە و پێشتر وەك ئاماژە مە پێكری مە كارێ رێكخستنێ دكر ل گەل فەریق فاروق و شەهید محەمەد سالح بۆتی، چەكێ من هەردەم ب ملێ من ڤە بوو و من ترۆمبێل هەبوو و هێشتا گەلەك مابوو بچمە لەشكریێ بەلێ ئەمنا دهۆكێ بەلا خوە ژ من ڤەنەدكر و گەلەك جاران دەستە سەركریمە و ئەشكەنجەدایمە و گەلەك جاران ل زالگەهان دا من دەستە سەركەن و بێژن شڤێدی محەمەد سالح هاتیە گوندی و تە بوو نە گۆتیە؟ جارەكێ گەلەك قوتام و پرسیارا محەمەد سالح بۆتی كر و من گۆتێ هەوە كوشتم گۆت تو ب شەڤ ل گەل وانی و ب رۆژ دهێتە دناف مەدا و جگارەك دامن و من كێشا وەختەكی ئەزێ خافل و پێنەك دانا من و ئاگرێ جگارێ چوو دناڤا جلكێن من دا، ئاخفتنێن كرێت گۆتن بۆچی تو جگارێ كێشی؟، و هەر من گۆتێ تە جگارە دامن، نە هەرێ فایدە نەكر، جارەكێ تەرەكتور من تاژوت و یا باركری بوو دهاتمە دهۆك و شاش بووم ب تەرەكتور ڤە چوومە دئەمنێ ڤە و ئەوا ئەز دەستە سەركرم و گەلەك ئێشاندم و بیرا من دهێت ژنەكا مەسیحی هەبوو و هات و گەلەك گازندە ژ زەلامێن ئەمنێ كرن و گۆتی هەما شاش هاتیە مادێ هوسا قوتن؟، هوونێ دبینن تەرەكتورا وی یا تژی بەرە و ئەگەر ئەو ژن نەما دا من كوژن، دەمێ ئەم چووین گەهشتینە پێشمەرگەی و ل داستانا كانی ماسێ دەمێ محەمەد سالح شەهید بووی ئەم چووینە ل گەل حەمیدێ برایێ وی، شەرێ گەلیێ دهۆكێ و پشتا گری، شەرێ ئاتوشێ، شەرێ سیار و سپیندار ل گەل ئەڤان هەمیان بووم، ل سەرهلدانا باژێرێ دهۆكێ بریندار بووم من ئارپیچ هاڤێتە فرۆكێ و بریندار بووم و ئەم چەند پێشمەرگە بووین و من گۆتە هەڤالێن خوە هوون هەرنە قەسیسێ دا ئەز دێ ئارپیچێ هاڤێمە فرۆكێ و گوڕیا ئارپیچێ دڤێت پشت تە هەتا 10 میترا كەسەك پشتە نەبیت و ئێكسەر بریندار بووم و د دان دەڤێ من دا نەمان و دەستێ من بریندار بوو.
هەمان پێشمەرگە گۆت: ل هەوا ئەنفالێن رەش ئەم هەر حەفت برا چووینە كەمپان دا و نێتە جێبوین و دایك و باب و زارۆكێمن من و بنەمالا مە هەمی كەفتنە دەستێ حوكمەتێ و پسمامێ من هەمسان زانی نوژدارێ پێشمەرگەی بوو و پێش چاڤێن هەمی خەلكی ئێكێ ئەمنێ چوو سەر كەلها نزاركێ و ل گەل حەیدەر گەرماڤی ب بلوكان كوشت و سەرێ وی پەقاند ، شەهید فەخری برایێ شەهید محەمەد سالح بۆتی و رۆژەكێ گۆتن لێبورین سەدام یا دەركری و حالێ مالباتا من گەلەك یا نەخوشە و بزاڤا بكە ترۆمبێلەكێ بگرە بەلكی ئەوانژی تینی و ئەژی ئێكسەر هاتمە دهۆكێ چوومە بەحركێ و رۆژا سیێ ئێكسەر ئەمن هاتەمن گۆت وەرە چەوا ژ توركی هاتی؟ من گۆتێ سەدام لێبورین دەركریە و گۆت وەرە تە چەند جندی كوشتینە؟ من گۆتێ بابوو لێبورینا هاتیە دەركرن و گۆت بخودێ تو نەبێژی تە چەند جندی كوشتینە دێ و تە ب ئەڤێ پانكێ ڤەكەم و گۆت ئەم هەمیێ زانین و گوت هەمی كاغەزێن تە دەف من هەنە و گۆت هەرە مال و سباهی وەرە بێژە كا تە چەند جندی كوشتینە، ئێكێ زیباری هەبوو دگۆتنێ رزا زێباری ئاغا بوو وی دەمی محەمەد سالح بۆتی گەلەك چوو مالا وان وەكی كورێ وان بوو و ئێڤاری چووم من گۆتە بابێ خوە و مامێ سلێمان چونكە هەر دو ل بەحركێ بوو و ئێكسەر ئەوان گۆتن دا بچینە دەف رزا زێباری و ئەم چووینە دەف رزا و گۆتن سپێدێ وەرن و ئەم پێكڤە چووینە دەف وی ئەفسەری و رزا زێباری گۆتێ ل گەل ئەڤی نە ئاخڤی و ئەگەر خەلەتیەك ژێ چێبوو تو من نیاسی و پشتی چەند رۆژەك دەرباز بووین بۆ شەرێ ئیراق و كوێتێ، من خوە هاڤێت هاتمە شندوخا و ب شەڤێ چوومە دەحلا را هەتا بوویە سەرهلدان و دەمێ دەنگ و باسێن سەرهلدانێ هەین و ئەز و شەوكەت بوتی خودانێ پانزیخانا كارزان پێكڤە چووینە دەف براهیمێ عەلی و من گۆتێ ئەمن بەلا خوە ژ من ڤەناكەت و گۆت مام نە ترسە ئەگە من و تە بتنێ سەرهلدان كریە ئەم دێ سەرهلدانێ كەین و پیچەكێ بهنا من هات و سەرهلدانێ دەست پێكر و ل فەیدیێ بریندار بووم.
ل دووماهیێ زیندانیێ سیاسی و پێشمەرگەیێ شۆڕەشا گولانا پێشكەفتنخواز گۆت: هێشتا نەهاتیمە هژمارتن زیندانیێ سیاسی و من شاهد هەنە سووند خاریە و هێشتا چ ژمالا من نەدامەزراندینە و ئەم هەر پارتی نە و لێڤەنابین و بابێ من بابێ حەفت كوران ژ قەهرا ل بەحركێ مر و دەیكا من گۆت ئێكێ ئەمنێ هات گۆتێ تو وێنێ سەدام ل هنداڤ سەرێ خوە ڤە نەكەی دێ تە سێدارێ دەین و بابێ من نەچار بوو وێنەكێ دانا خانیێ خوە ڤە و ئەمنێ بەردەوام دیفچوونا مالێن وا دكر كا وێنە داناینە یان نە.
