گـوهۆرینا سەقای و كاریگەریا وی لسەر چاندنا هـەرێما كوردستانێ
رەوشەن دنا
كوردستان ژی وەكو ئیراقێ ژ ئەگەرێ گوهۆرینا كەش و هەوای تووشی مەترسیێن زێدەتر بوویە، رودانێن بهێزێ یێن كەش و هەوایی وەكو بلندبوونا پلەیێن گەرماتیێ و كێمبوونا باران بارینێ و زێدەبوونا هشكە سالیێ مەترسی لسەر كەرتێ چاندنی پەیداكریە، كو ژێدەرەكێ سەرەكی یێ داهاتە ژبۆ پتریا خەلكێ دەڤەرێ.
چاندن ل هەرێما كوردستانێ هەتا رادەیەكێ مەزن پشتبەستنێ لسەر باران بارینێ دكەت، بەلێ ل ڤان چەند سالێن دوماهیێ رێژەیا بارانبارینێ ل دەڤەرێ ب شێوەیەكێ بەرچاڤ كێم بوویە، ئەڤە ژی بوویە ئەگەرێ كێمبوونا بەرهەمێ خومالی وەكی گەنم و جەه…هتد. هەر هۆسا كارتێكرنا هشكەسالیێ كاریگەری لسەر كێمبوونا ئاڤا بنئەرد و ئاڤا سەرئەرد هەیە.
بلندبوونا پلەیا گەرمێ دبیتە ئەگەرێ هەلمبوون و هشكبوونا ئاڤا د ناڤ ئاخێ دا و كارتێكرنێ ل سەر وی تۆڤی دكەت یێ د ناڤا ئاخێ دا و وەدكەت كو بەرهەمێ مە ب رێژەیەكا كێمتر گەشێ بكەت، هندەك ژ وان بەرهەمێ د كەشوهەوایێ مام ناڤەند دا ب رێژەیەكا باشتر گەشێ دكەن. لەورا چەندین ئاستەنگ دهێنە هەمبەری جۆتیارێن مە وەكو نەبوونا ژێدەرێن ئاڤێ یێن پێگوهۆر ژبەر كێمبوونا بارانبارینێ و كێمبوونا ئاستێ رویبار و كانیان و هەر چەندە حوكمەتا هەرێما كوردستانێ گرنگی ب كەرتێ چاندنێ و كشتوكالێ دایە و هاریكار و پشتەڤانێ جۆتیارا بوویە، بەلێ جۆتیار زێدەتر پێدڤی ب هاریكاریێ نە داكو بشێن بەردەوام بن ب تایبەت ژی د ڤێ قۆناغا پێشكەفتنێ دا كو گەلەك ئالاڤێن گرنگ هاتنە بەرهەمئینان ژبۆ ساناهیكرنا كارێن جۆتیاران.
ئەو ژی بكارئینانا ئامیرەیێن سەردەمیانە بۆ ئاڤدانێ وەكو ئاڤدانا دلۆپ دلۆپ و چاندنا بەرهەمێ بەرگە دگرن ل گەل هشكەسالیێ وەكو هندەك جۆرێن گەنم و جەهی، و گرنگە بەردوام پشتەڤانیا جۆتیاران ب شێوازیێن سەردەمیانە و ئامرازێن نوو بهێتەكرن ژبۆ هندێ ئەڤ ئاستەنگێن وان بهێنە چارەسەركرن و دگەل كەشوهەوایێ ڤێ قۆناغێ بگونجن، هەر هۆسا گرنگە جۆتیارێن مە ژی بهێنە پەروەردەكرن و فێركرن لسەر شێوازێ چاندنا سەردەم و و خۆگونجاندن دگەل بارودۆخ و كەشوهەوایێ نوو.
گوهۆرینا كەشوهەوای یا بوویە كەتوارەك كو راستەوخۆ كاریگەری لسەر كەرتێ چاندنێ ب گشتی ل هەرێما كوردستانێ و ب تایبەتی ل پارێزگەها دهۆكێ هەیە، پێدڤی ب پلانەكا ستراتیژی هەیە بۆ خۆ گونجاندن و كێمكرنا وێ هشكەسالیێ، ب وەرگرتنا چارەسەریێن بەردەوام و پشتەڤانیا جۆتیاران، دشێن ڤان مەترسیان كێم بكەین و بەرهەمێ چاندنێ ل دەڤەرێ مسۆگەر بكەین.
