هۆزانا سترانكی د ناڤبەرا داهێنان و كارتێكرنا نەرێنی دا
زێرەڤان ئۆسێ
هۆزان بەشەكێ گرنگ و سەرەكی یێ دانانا سترانێ یە، نە تنێ ئامرازەكێ دەربڕینێیە، بەلكو رێكەكا دەربڕینا هزر و هەستێن مللەتانە و سەرانسەر دیرۆكێ رۆلەكێ گرنگ گێرایە هەر ژ دەسپێكا پەیدابوونا سترانێ وەك ئامرازەكێ ئارامكرنا زارۆكان و هەتا گەهشتی ئاستێ مۆدرێن یێ نوكە. ستران ب رتم و پەیڤێن خۆ كارتێكرنێ ل رەفتارێن مرۆڤی دكەت و گوهۆرینێن كەلتووری و جڤاكی یێن بەرفرەه پەیدا دكەت. پەیڤا جوان و ب رێكوپێك و هەلگرا پەیامەكا رەسەن د سترانێدا دەربڕینێ ژ خۆشی و خەمێن مرۆڤی دكەت، و هەست و هزرێن مرۆڤی ڤەدكۆلیت، لێ دەمێ ئاستێ پەیڤان ل ئاستەكێ نزم و بێنرخ بیت، ئەڤە دبیتە ئەگەرێ داكەتنا تامە و سەلیقەیا گشتی و بەلاڤبوونا هندەك بهایێن نە گونجای كو دشێن زیانێ بگەهیننە جڤاكی. د سایا ئەڤێ كەفتنا ئاستێ پەیڤێن سترانان یا كو ئەم نوكە دبینین، پێدڤیە ئەم ل سەر كارتێكرنێن نەرێنی یێن ڤێ دیاردەیێ راوەستین، نەخاسمە ل سەر ئاستێن كەلتووری و دەروونی و جڤاكی.
ئێك: پاشڤەچوونا كەلتووری و ئاستێ سەلیقەیا گشتی
ستران بۆ هەر جڤاكەكی خۆدیكا ناسنامەیا كەلتووریە، چونكی ئەو پشكداریێ د دروستكرنا هشیاریا جوانی و هزری یا مرۆڤان دا دكەت. لێ بەلاڤبوونا سترانێن پەیڤێن وان ئاست نزم، دبیت ئەگەرێ لاوازبوونا تاما هونەری، كو پەیڤێن نە ئاڤاكەر و دەربڕینێن كۆلانكی دویر ژ جوانكاریا ئەدەبی ل سەر حسابێ پەیڤێن جوان یێن خودان واتایێن كویر بەربەلاڤ دبن. ب ڤی رەنگی، زیان نە بتنێ دگەهیت ناڤەرۆكا هونەری، بەلكو دگەهیت زمانی ژی، كو كارتێكرنەكا نەرێنی ل سەر زمانێ كوردی یێ رەسەن دكەت.
دو: كارتێكرنا دەروونی و رەفتاری
پەیڤێن مرۆڤ بەردەوام گوه لێ دبیت، كارتێكرنەكا مەزن ل سەر دروستبوونا مرۆڤی یا دەروونی و رەفتارێن مرۆڤی یێن رۆژانە هەیە. ئەو سترانێن كو خەم و بێهیڤیبوونێ بەلاڤ دكەن، هەستێن بێزاری و رەشبینیێ زێدە دكەن، كارتێكرنەكا نەرێنی ل سەر رەوشا دەروونیا مرۆڤی دكەن، كو دشێن ببنە ئەگەرێ زێدەبوونا رەوشێن خەمۆكیێ و بێزاریێ دناڤ گوهداراندا.
سێ: كارتێكرنا جڤاكی و بهایی
كارتێكرنا سترانێ نە تنێ ل سەر تاكەكەسی یە، بەلكو دگەهیتە جڤاكی ب گشتی. بەلاڤبوونا سترانێن كو تێگەهێن شاش ل سەر حەز و پەیوەندیێن دلداریێ بەلاڤ دكەن، دشێن ببینە ئەگەرێ دروستبوونا تێگەهێن نە راست ل نك گەنجان دەربارەیی پەیوەندیێن جڤاكی.
چوار: پاشڤەچوونا داهێنانا هونەری و میۆزیكی
هەردەم سترانا راستەقینە ب داهێنانێ ڤە گرێدایە، كو پێشبڕكێ دناڤبەرا هەلبەستڤان و میۆزیكڤانان دا ل سەر پێشكێشكرنا كارێن ب بها یێن جوانی و هزری بوو. لێ زالبوونا سترانێن بازرگانی یێن ب پەیڤێن سڤك و بێ واتا و پەیام و ئاوازێن دوبارە كو پرانی ژ ئاوازێن مللەتێن دی یێن دەردۆرێ هاتینە دزین، دبیت ئەگەرێ پاشڤەچوونا ئاستێ داهێنانا هونەری.
پێنج: كارتێكرنێن ئابۆری ل سەر پیشەسازیا میۆزیكێ
هەرچەندە ئەو سترانێن پەیڤێن وان ئاست نزم دشێن بەلاڤبوونەكا بەرفرەه و جەماوەرەكی زۆر بدەستڤە بینن، لێ ئەڤ سەركەفتنا زوی گەلەك جاران دەمكورتە و پشكداریێ د ئاڤاكرنا پیشەسازیەكا میۆزیكی یا بهێز دا ناكەت.
هەر وەسا هۆزانا سترانێ دەمێ لاواز و نە ل ئاست بیت گەلەك كارتێكرنێن دی یێن نەرینی و نە جوان ل سەر ئاستێ تاكەكەس و جڤاكی دكەت.. ژبەركو ستران نە بتنێ ئامرازەكا چێژوەرگرتنێ یە، بەلكو بەشەكە ژ بیرهاتن و بیردانكا هەڤپشكا جڤاكان، و دشێت هەستان بلند بكەت یان نزم بكەت. لەوما، ڕووبڕووبوونا دیاردەیا لاوزابوون و داكەتنا پەیڤێن سترانان، پێدڤی ب هشیاریەكا كەلتووری و جڤاكی هەیە كو د پشتەڤانیا بەرهەمێ هونەری یێ جددی دا خۆیا دبیت، و ڤەگەراندنا گرنگیێ بۆ پەیڤێ وەك بەشەكێ سەرەكی د ئاڤاكرنا ناسنامەیا سترانێدا.
