باگوردانێ مە
شیان مەهدی كانیساركی
ئەم چ جاران ژ زڤستانێ نە دترسیاین، ئەگەر خوە چەند یا دژوار ژی با، چونكی ئەم خودانێن باگوردانی و دەستكێ وی بووین. مالا مە ل سەرێ كۆلانێ بوو و بانێن مە هەمیان پێكڤەبوون، ئێك ژ ئێكی بلندتر. گەلەك جاران مالا بنێ كۆلانێ باگوردانێ مە دبر و نە دزڤڕاند.
لەوڕا دەمێ بارانێ خوەش لێدكر و ئەز بابێ خوە ب سەر وێ پێسترا مامێ جەلالی بۆ مە چێكری دكەفتین بۆ گێڕانا بانی، دا بابێ من دەستكێ ئاسنی بەت و وی باگوردانێ گران، پێنج شەش سەربانان ژێهەل ئینیت هەتا دگەهاندە سەربانێ مە و بان دگێڕا.
نەدهێلا ئەز دەستدەمە باگوردانی، جارجاران من تەلیسێ كایێ بۆ دگرت دەمێ پێوەردكر. پشتی ئەز پیچەكێ گر بوویم، ڕەخەكێ دەستكی ددەتەف من، لێ ژبەر من نەوێریت هند نێزیكی سیڤاندێ بكەت نەكو ژ دەستێ من ب ڤەسەریت و ب نیڤا حەوشێ بكەڤیت.
جاران ژی دەمێ باران نە هند یا توند با من ب تنێ دگێڕا و وی باش چاڤدێریا من ل ڕەخێ سیڤاندا پشت بانی دكر. لەوڕا من چ جاران ئەو باگوردان نە دئێخست. د نوكەدا هەتا ئەز باگوردانی ژ بانێ شەشێ دئینم سەر بانێ مە بانگێ سپێدێ ددەت و ئێدی هەرجار باگوردان ژ دەستێ من د ڤەڕەسیت و ب نیڤا حەوشێ دكەڤیت، حەوش ژی هەمیا یا دەرزاندی.
