كۆمپانیێن پترۆلی باوەری ب حوكمەتا ئیراقێ نینە بۆ مەزاختنا ماف و شایستەیێن وان
دیدار: دلۆڤان ئاكرەیی:
سەرۆكا فراكسیۆنا پارتی دیموكراتی كۆردستان ل چڤاتا نوونەرێن ئیراقێ، ڤیان سەبری ل دۆر ئەگەرێ دروستبوونا ئاستەنگان ل هەمبەر دوبارە هنارتنا پترۆلێ هەرێما كوردستانێ ب رێكا بەندەرێ جەیهان یێ توركی بۆ روژنامەیا (ئەڤرۆ) گۆت» پرسا هنارتنا پترۆلێ پرسەكا ستراتیژییە لەوما كار و رێككەفتنێن كونكرێتی پێتڤینە بهێنە كرن وهەتا نوكە ئیراقێ چو گەرەنتی نەداینە هەر هەشت كۆمپانیێن دناڤا كۆمەلا پیشەسازییا پەترۆلا كوردستانێ (ئەپیكۆر) دا بۆ چاوانییا خەرجكرنا ماف و شایستەیێن وان د بیاڤێ دەرخستن و هنارتنا پترۆلا هەرێمێ بۆ دەرڤە و ئەگەرێ نە باوەرییا وان كۆمپانیبان ژی بۆ وێ چەندێ دزڤریت ل سالا 2023 وان كۆمپانیبان پەترۆل دەرخستییە و رادەستی حوكمەتا فیدرال كریە بەلێ ژ مافێن خۆ بێ بەهر بووینە لەوما تووشی بێ باوەریێ بووینە ل گەل بەغدا».
ل دۆر دەرئەنجامێن كۆمبونێن بۆری یێن گرێدای پرسا دوبارە هنارتنا پەترۆلا هەرێمێ ڤە، ڤیان سەبری گۆت» هەر چەندە كۆمبوونێن بۆری یێن هەرسێ ئالییان ئەوژی وەزارەتا سامانێن سرۆشتی یێن هەرێمێ و وەزارەتا پەترۆلا ئیراقێ و (ئەپیكۆر) هاتینە ئەنجامدان د ئەرێنی بووینە بەلێ نەگەهشتینە چو رێككەفتنێن دوماهیێ و بڕیارە ل ڤێ حەفتیێ ژی دوبارە هەرسێ ئالی ل سەر ڤێ پرسێ كۆمببن».
سەبارەت پێگیربوونا هەرێمێ ب رێككەفتنێن د ناڤبەرا هەولێرێ و بەغدایێ دا، گۆت» حوكمەتا هەرێما كوردستانێ پێگیری قانوونا بودجەی بوویە و پێگیرییا خوە دیار كریە بۆ هنارتنا پەترۆلێ ب رێكا كۆمپانییا (سۆمۆ) كو ژ ئەگەرێ نەهنارتنا پەترۆلا هەرێمێ حوكمەتا فیدرال ب تنێ ل سالا بۆری نێزیكی 20 ملیار دۆلار زیان پێگەهشتینە و د نوكە دا ژی ل بەهانەیان دگەریێت ب رێكێن جودا مینا ئاستەنگ چێكرن ل هەمبەر هنارتنا پەترۆلا كوردستانێ ب ئاوایەكی دبێژیت بەسرا هنێرین پەترۆلا بەسرا ب رێكا بۆرییا هەرێما كوردستانێ – جەیهان هنێریت د دەمەكیدا د بنیاتدا ئەو بۆری ل گەل چو بۆریێن پەترۆلێ یێن ئیراقێ یا گرێدای نینە كو پەترۆلا ئیراقێ ب رێكا ڤێ بۆریێ بهێتە هنارتن بۆ توركیا و ب تنێ دشێن ب رێكا تانكەران پەترۆلا خوە ژ بەسرا بۆ هەرێمێ ڤەگۆهێزن و بهنێرن كو ئەڤە ژی دەم و تێچوویێن زێدە پێدڤێت:.
سەرۆكا فراكسیۆنا پارتی ل جڤاتا نوونەرێن ئیراقێ خویاكر ژی» دا ل دووڤ ئاماران رێژەیا ئاكنجیێن هەرێما كوردستانێ نێزیكی 15% ژ ئاكنجیێن ئیراقێ نە لەوما پێتڤییە حوكمەتا فیدرال رۆژانە نێزیكی 120 هزار بەرمیلێن پەترۆلێ بۆ پێتڤییا ناڤخوییا هەرێمێ دابین بكەت».
د. ڤیان سەبری سەبارەت مووچەیێن فەرمانبەرێن هەرێمێ دیاركر» بەری دو حەفتییان لیستا ناڤێن فەرمانبەرێن هەرێمێ رادەستی وەزارەتا دارایی یا ئیراقێ یا هاتیە كرن بۆ مەبەستا خەرجكرنا مووچەیێ فەرمانبەران و هیڤیدارین پەترۆلا هەرێمێ بهێتە هنارتن دا چو بەهانەیێن دی د ڕێكا نەهنارتنا مووچەیێن هەرێما كوردستانێ ژئالیێ ئیراقێ ڤە نەهێنە پێش».
