سەرۆکێ پارتا کۆماری: دڤێت ب کریار کار بۆ چارەسەرکرنا پرسا کوردی بکەین
سەرۆکێ پارتا کۆماریا گەل راگەهاند، دڤێت دەولەت ئێدی قەبوول بکەت ل تورکیا پرسا سەرەکی پرسا کوردی یە و دڤێت هەموو هێزێن سیاسی ژی بەرنامێ خوە بۆ چارەسەرکرنا پرسا کوردی پێشکێشی پەرلەمانی بکەن، هەکە نە دێ زیانێن مەزن گەهنە تورکیا.
ئوزگۆر ئۆزەل سەرۆکێ گشتی یێ پارتا کۆماریا گەل ل تورکیا د کۆمبوونا پارتا خوە دا سەبارەت ب رەوشا تورکیا و گوهۆڕینێن ل دەڤەرێ ئاخڤی و دیار کر، نها ل تورکیا هەر کەس بەحسێ ئاشتیێ دکەت، لێ دڤێت ئەم بزانین کا بۆچی شەڕ هاتە کرن، ب سالانە بۆچی تورکیا د شەڕەکێ مەزن دا بوو، چونکی ل تورکیا پرسەکا گەلەک مەزن هەیە و ئەو ژی پرسا کوردی یە و گۆت: (د کۆمبوونا ل گەل شاندێ دەم پارتی دا من ب رەنگەکێ ئاشکرا گۆتە وان وەکو پارتا کۆماری ئەم ل دژی ڤێ قۆناغێ نینین، گەلەک گرنگە کو پەکەکێ ئاگربەست راگەهاندیە، لێ دڤێت نها ل پەرلەمانێ تورکیا دەست ب کارێن مەزن بهێت کرن، دڤێت پەرلەمانێ تورکیا ب ئەرکێ خوە رابیت، دڤێت پەرلەمانێ تورکیا ببیتە ناڤەندا چارەسەرکرنا هەموو پرسێن تورکیا ب تایبەتی ژی پرسا کوردی).
سەرۆکێ گشتی یێ پارتا کۆماریا گەل ئەو یەک ژی دیار کر، نها ل رۆژهەلاتا ناڤین گوهۆڕینێن گەلەک مەزن روو ددەن، ب تایبەتی ژی رەوشا سووریێ گەلەک ئالۆزە، پیلان ل دژی تورکیا ژی هەنە، لێ مخابن دەولەتێ هەتا نها یا پێدڤی نەکریە، ل هەمبەر پیلانێن دوژمنان دڤێت تورکیا پرسێن خوە چارەسەر بکەت، دڤێت تورکیا بهێز کەڤیت، لێ سیاسەتا هەتا نها یا ئەردۆغانی تنێ مژوول کرنە و ئەو یەک ژی ناهێتە قەبوول کرن و گۆت: (ل سووریێ ب سەدان عەلەوی هاتنە کوشتن، ئەو یەک ژ بۆ تورکیا ژی گەلەک خرابە، دڤێت تاوانبار بگەهنە سزایێن خوە، نابیت ئەردۆغان و دەستهەلاتا وی ل هەمبەر کوشتنا ب سەدان وەلاتیێن سڤیل یێن عەلەوی ل سووریێ بێدەنگ بن، ئەو یەک دێ کاریگەریا خوە یا خراب بۆ پاشەرۆژا تورکیا هەبیت).
چاڤدێرێن سیاسی ل تورکیا ژی دیار دکەن، پارتا کۆماریا گەل د دو هەلبژارتنێن دووماهیێ ل تورکیا دا شیایە رێژەیەکا زێدە دەنگێ کوردان بدەستڤە بینیت و ژ بەر ڤێ یەکێ ژی نها پارتا کۆماری دڤێت د بابەتێ چارەسەرکرنا پرسا کوردی دا خودان رۆلەکێ گرنگ و سەرەکی بیت.
