چما ڤێ جارێ جیهان د هه‌وارا كوردان هاتن؟
ب درێژیا دیرۆكێ هه‌یا نها كورد كه‌تینه به‌ردرنده‌ترین هێرشێن هێزێن داگیركه‌ر، ب ده‌هان كۆمكوژی، ئه‌نفال، چه‌كێ كێمیایی، جیهاد و.. . ) ل دژی گه‌لێ كورد ئه‌نجامدانه، ب هزاران شه‌هید و قوربانی دانه، لێ هه‌موو حوكمه‌ت و گه‌لێن ئازادیخواز و وه‌لاتێن موسلمان ل جیهانێ ل هه‌مبه‌ر وان كاره‌ساتێن بێ وێنه د بێ ده‌نگ بوون، هه‌یا وێنه‌كێ وان كۆمكوژیان ب كامیرێن خوه نه‌دگرتن و ل مه‌دیایێن خوه نه دوه‌شاندن، ده‌نگێ گری و زێمارا خه‌لكێ كوردستانێ نه دبهیستن، كو هێزه‌ك ل جیهانێ د هه‌وارا وان بهێن برینێن وان بكه‌وینن و رۆندكێن وان راوه‌ستینن، سالێ جاره‌كێ ناڤێ كورد یان كوردستان د مه‌دیایێن خوه دا نه‌دئینان زمان، گه‌لێ كورد هه‌رتم د سه‌نگه‌رێ به‌رگریێ دابوویه، چ جاران كوردان هێرش نه‌دكرن سه‌ر چ گه‌ل و ملله‌تان، كورد نه ئاشقێن چه‌كی بوونه، نه‌ژی شه‌ڕخواز وداگیركه‌ربوونه، چ جاران كوردان نه خواستیه خاك و نیشتیمانێ خه‌لكه‌ك دن داگیربكه‌ن، مال و سامانێ وان تالان و وێران بكه‌ن. لێ مخابن پڕانیا خه‌لكێ جیهانێ ل هه‌مبه‌ر كاره‌ساتێن گه‌لێ كورد دبێ وژدان بوون. چما نها هێزێن هه‌ڤپه‌یمان و پڕانیا حوكمه‌ت و وه‌لاتێن جیهانێ ده‌م ل ده‌ست د هه‌وارا كوردان هاتن ده‌ما كوردستان كه‌فتیه به‌ر هیرشێن تیرۆرستێن داعشێ؟. به‌رسڤ: ژبه‌ركو هه‌رێما رۆژهه‌لاتا ناڤین ب گشتی و وه‌لاتێن عه‌ره‌بی تایبه‌تی كه‌تنه به‌ر گه‌ف و هێرشێن تیرۆرستێن داعش، ئه‌لقاعده و.. . ). یا ئاشكرایه كو ئه‌ڤرۆ تنێ كوردستان بوویه پێگه‌هه‌ك ئازاد ژبۆ په‌نابه‌رێن هه‌رێمێ ژ هه‌موو ره‌نگ و ره‌گه‌زێن جودا، ژبۆ گه‌لێن عه‌ره‌ب، كریستیان، ئۆل ومه‌زهه‌بێن دی، ئه‌گه‌ر باشوورێ كوردستانێ ژ لایێ تیرۆرستانڤه هاتبایه داگیركرن دا ئه‌من و ئاسایشا جیهانێ كه‌ڤیته د مه‌ترسیه‌ك مه‌زن دا، وی چاخی تیرۆرستێن داعش دا بیته هێزه‌ك خورت و خوه‌دی ئابووریه‌ك ب هێز ل رۆژهه‌لاتا ناڤین و ل جیهانێ، ژبه‌ركو عێراق و باشوورێ كوردستانێ جهه‌ك ستراتیژیه ل سه‌ر ده‌ریایه‌ك پترۆلێ یه، داعش ب پشته‌ڤانیا رژێما توركیا وهه‌ڤپه‌یمانێن خوه دا ئه‌من و ئاسایشا جیهانێ تێكده‌ن، ژ ناڤچوونا وان دا گه‌له‌ك ب زه‌حمه‌ت بیت. دا به‌رژوه‌ندیێن ئه‌مریكا، ئه‌ورۆپا و جیهانێ هێنه تێكدان. گه‌لێ كریستیان، ئێزدی، شیعه، كورد و.. . )، دا ل سه‌رده‌ست وان تیرۆرستان هێنه ژناڤبرن، هه‌موو بالیۆزخانه، ئۆفیسێن بیانی ل گه‌ل داموده‌زگه‌هێن وان یێن ئابووری ودیپلۆماسی و سیاسی ژناڤچن، دا پرۆژه و پلانێن وان یێن ستراتیژی ل رۆژهه‌لاتا ناڤین ڤالا ده‌رچن. ژبه‌ركو ئه‌و هێزێن تاریێ دبێ پرۆگرام و به‌رنامه‌نه، دبێ سیسته‌م و پره‌نسیپن، دوژمنێن هه‌موو مرۆڤایه‌تیێ نه، پێگیریێ ب چ یاسا و زاگۆنێن ئه‌رد و ئه‌سمانان ناكه‌ن، چ سنۆران ناس ناكه‌ن. له‌وما هه‌ر زوو وه‌لاتێن زلهێز د هه‌وارا كوردان هاتن، چه‌ك و ته‌قه‌مه‌نی پێشكێش كرن، یارمه‌تیێن مرۆڤایه‌تی و لۆجستی دانه گه‌لێ كوردكرن. ده‌نگێ كوردان بۆ سه‌دایه‌ك ب هێز د ناڤ مه‌حفه‌لا نێڤنه‌ته‌وه‌یی دا، ئه‌ڤرۆ ب هێزترین وه‌لات ل جیهانێ سه‌رخۆشیا خوه ژبۆ شه‌هیدبوونا پێشمه‌رگێن كوردان ده‌ردبرن و دلسۆزی و وه‌فاداریا خوه دئینن زمان ل هه‌مبه‌ر كاره‌ساتێن كوردان. دیسا په‌سنا هێزێن پێشمه‌رگان و شه‌ڕڤانێن كورد دكه‌ن. تنێ یا ل سه‌ر گه‌لێ كوردات ئه‌وه خوه رێكبێخن ب ئێك ده‌نگ و ئێك بریار و ئێك هێز به‌رسڤا دوست و دوژمنێن خوه بده‌ن دا د ڤێ ئه‌زموونا دیرۆكی دا سه‌ركه‌فتی ده‌ربازب بنن.
