ڕۆلـێ مەلایـەكێ قـارەمان د سەرهلدانا شێلادزێ دا
جەگەر كەمال ڕێكانی
ل هەر وەلاتەكێ دەمێ زۆلم ستووربوو و ماف هاتنەخوارن و هزر هاتنە قەدەغەكرن و هەولا ژناڤبرنا وی و نەتەوا وی هاتە دان، ل وی دەمی دێ مرۆڤێن خودان غیرەت و چاڤنەترس و نشتیمانپەروەر پەیدابن، د درێژاهیا دیرۆكێ دا مللەتێ مە یێ كورد ژی ژ لایێ نەیاران ڤە گەلەك زۆلم و ئەنفال و دەربەدەری و ئەشكەنجەدان ب سەری هاتینە، لێ كەسێن خۆدان هەستا نەتەوەیی و كوردپەروەر بەردەوام ل قادا خەباتێ دا بوینە و سەر بۆ چ نەیار و زۆرداران نەدانایە و سەرهلدان بەرپاكرینە و شیاینە گەلێ خۆ ژ بن عەڤرێن تاری بینەدەرێ و بەرەف كەنارێ سەربەستی و بەختەوەری و ئارامیێ ڤە ببەن، ئەڤ كەسێن هوسا دبنە هێما و ناڤێن گەش كو بەردەوام دیرۆك و مللەت پەسنا وان دكەت و شانازیێ پێ دبەن، ل ڤێ گۆتارا خۆ دا دێ باس ل خەبات و ڕۆلێ ئێك ژ كەسایەتیان كەین ئەو ژی ڕۆلێ كەسایەتی بەرنیاسێ بەهدینان مەلا یاسین ڕێكانی یە كو د سەرهلدانا شێلادزێ دا كارەكێ باش و ژ هەژی ئەنجامدایە و ڕۆلەكێ كاریگەر گێرایە و ل بەری سەرهلدانێ ژی بەردەوام د خزمەتا مللەتێ خۆ دا بوویە و ملكەچی فەرمانێن دوژمنی نەبوویە و د ووتارێن خۆ یێن ئەیینی دا مرۆڤەكێ وێرەك بوو و ژ دوژمنی نەدترسیا و دگەل مللەتێ خۆ یێ ڕاست و دروست بوو، زۆر جاران دا ئاماژە كەتە ئێكگرتنا كوردان ب گشتی و دیرۆكا كوردان بەحس دكر و ب شێوەكێ نەڕاستەوخۆ وەل خەلكی دكر كو بگەهنە شۆڕەشێ و خزمەتێ بكەن، دا ل ئاییندەی دا بگەهنە مافێن خۆ یێن ڕەوا، لەوما گەلەك جاران ئەڤ هەلویستێن وی دبونە ئەگەر كو ب كەفیتە ل بەر ڕەخنە و گەفێن ڕژێمێ، بێگۆمان ئەم هەمی دزانین كو ڕژێما گۆربەگۆر یا بەعس یا هۆڤانەبوو و گەلەك نەخۆشی و ئەنفال و دەربەدەرێ و كوژتن و سێدارەدان ب سەرێ مللەتێ مە دئینان، دەمێ زۆلما وان گەهشتیە گوپیتكێ ئێدی كەسێن خەباتكەر و خودان غیرەت و كوردپەروەر هزر ل هندێ كر كو ئەو دەم هات دووماهیێ ب ڤێ زۆرداری و ستەمێ بینن، ئینا ل چەندین دەڤەرێن كوردستانێ دەست ب سەرهلدانان كر و نەیار ل دەڤەرێن خۆ نەهێلان، ل دەسپێكێ سەرهلدانێ ل 5 ئادارێ 1991ێ ل (رانیە) دەستپێكر و ل دووڤ دا بەربەلاڤبوو دەڤەرێن دیتر یێن كوردستانێ ژ وان ژی دەڤەرا شێلادزێ ژی ژ وان دەڤەران بوو كو كەسێن دلسۆز و شۆرەشگێر و خودان هەستا نەتەوەیی دناڤ دا هەبوون، لەوڕا ل 13/3/1991ێ دەمێ سەرهلدان هاتیەكرن و دەست ب سەر دام و دەزگەهێن ڕژێمێ هاتیە گرتن، پێشمەرگەیێن كوردایەتیێ مابوونە گوندێ (رێنجبراخە) ل دەڤەرا ڕێكانیا ژبەر بارودوخێ دەسپێكێ نەشیان بهێتە دناڤ كۆمەلگەها (شێلادزێ)دا، وەختێ زانایێ ئایینی و كەسایەتیێ كوردپەروەرێ ناڤدارێ بەهدینان (مەلا یاسین ڕێكانی) ئەڤ چەندە زانی ئینا رابوو چەند موختار و ڕه سپییێن دەڤەرێ كۆمكرن و سەركێشیا وان كر و چوونە بەراهیا وان كو ل وی دەمی دكتۆر كەمال كەركووكی و پێشمەرگەیێن كوردایەتیێ ل وێرێ بوون و چوو پێشوازیا پێشمەرگەیان و ئینانە د شێلادزێ دا و ل مزگەفتا (شێلادزێ یا مەزن) بۆ خەلكی دانەنیاسین و پەیڤەك پێشكێشكر، دكتور كەمال كەركووكی ل 3/11/2022 ل دۆر مەلا یاسین ڕێكانی د گۆتنەكا خۆ دا دبێژیت: (وەختێ ئێكەم ڕۆژ ئەم هاتینە شێلادزێ و پاش چووینە مزگەفتا (شێلادزێ یا مەزن) مەلا یاسین ڕێكانی دگەل مەبوو و پێكڤە مە پەیڤەك بۆ خەلكی پێشكێشكر، سەیدایێ مەلا یاسین زۆر مرۆڤەكێ دلسۆز بوو بۆ كورد و كوردستانێ و هەر وەسا بۆ خەلكێ فەقیرو هەژارو بەردەوام دگەل هندێ بوو كو ئاژاوە نەبیت كو بشێت كێشەیەك هەبیت چارەسەر بكەت، هەر ژبەر هندێ یێ ل سەر هزرا مە و دلێ مە دا، ئەم چەند دووربین ل كەركووكێ بین یان هەولێرێ بین یان ژی ل هەر جهەكێ دیترێ كوردستانێ بین ئەو هەر یێ ددلێ مە دا).
دیسان ل 17/10/1991ێ ئانكۆ پشتی حەفت هەیڤان ژ سەرهلدانا بهارا 1991ێ و ئازادكرنا دەڤەر و باژێر و گوندێن كوردستانێ ژ ڕژێما بەعسا ئیراقێ، ڕێزدار (مەسعوود بارزانی) سەرەدانا شێلادزێ كر و ب ئامادەبوونا ژمارەكا زۆر یا خەلكێ دەڤەرێ سەیدایێ مەلا یاسین پەیڤەك پێشكێشكر، پشتی بخێرهاتنێ تێدا ئاماژە ب هندەك خالێن گرنگ كر و گۆت: ئەم دلخۆشین بهاتنا برایێن مە یێن پێشمەرگە و سەمیانێ موسلمانێن كورد، كو ئەڤە دەمەكێ درێژ بوو ئەم ل هیڤیا ڤێ ڕۆژێ كو برایێن موكۆم و خورست یێن پاقژ، پشتی ڤان مرۆڤا گەلەك نەخۆشیێن دەم و وەقتان دیتی نەخۆشی ل پشتی نەخۆشیێ سەر ڤێ چەندێ ئەم هەمی پێكڤە دلخۆشین ب دلەكێ زەلال.
