هه‌كه بۆ ریمه‌تی ژی بیت، هه‌ر بلا!
ئه‌ڤ شه‌ڕێ هه‌ڤرووشی مله‌تێ مه بووی، خه‌لكێ ڤێ كوردستانێ كت كته پێ دحه‌سیت كو ئه‌ڤ قه‌ومینه پشكه‌كه ژ وی، نه‌خاسمه چ مالبات نینن كو كه‌سه‌كێ وان ل به‌رۆكێن شه‌ڕی نه‌بیت. ب ره‌نگه‌كێ ته‌ڤایی خه‌لكێ كوردستانێ بزاڤێ دكه‌ن های ژ ده‌نگوبه‌حسێن شه‌ڕی بیت، چ چێدبیت بۆ وی بهێته گۆتن، ژبلی ڤێ چه‌ندێ ژی (تێشكه‌وكێ وان نا ته‌بیت) هه‌تا پتریا وان به‌رۆكێن شه‌ڕی ب خوه نه‌بینن، ڤێ چه‌ندێ ژی دو بۆچوون ل ده‌ڤ هنده‌ك ژ خه‌لكی چێكرینه، ره‌خێ ئه‌رینی و نه‌رینی تێدا دهێنه دیتن.
هنده‌ك وه‌سا دبینن كو گرێدانا خه‌لكی ب پێشمه‌رگه‌یڤه ره‌نگه‌كێ فیراندنێ (مبالغه) یا تێدا هه‌ی، نه‌خاسمه كو ئه‌و و هنده‌ك پێشمه‌رگه پرسیاره‌كێ دكه‌ن و دبێژن: پا بۆچی به‌ری نوكه كه‌سێ پێشمه‌رگه نه دنیاسی و كه‌سێ خوه تێ نه‌دگه‌هاندن و چ پووته پێ نه‌دكر. راستی ئه‌ڤ پرسیاره یا د جهێ خوه دایه، به‌لێ ئه‌ڤ شه‌ڕێ هه‌ڤرووشی مله‌تێ مه بووی، ژ ڤان ب كروبكێشا مه‌زنتره، نه‌خاسمه ڤی شه‌ڕی كورد پتر نێزیكی ئێك كرن، هه‌می پێكڤه یێ ل به‌رسینگا ڤی دوژمنێ بێ سه‌ربێن (مبدا) راوستایین، یێ شه‌ڕێ مان و نه‌مانێ دگه‌ل دكه‌ن.
ئه‌ڤرۆ پتریا خه‌لكێ كوردستانێ، ب پیر و جحێل و كچ و كۆرێن خوه‌ڤه، یێ سه‌ره‌دانا به‌رۆكێن شه‌ڕی دكه‌ن، هنده‌ك یێ زادی دگه‌ل خوه دبه‌ن، هنده‌ك ژی یێ دیاریا بۆ دبه‌ن، هه‌ر ئێك وه‌كی خوه و ل دووڤ شیانێن خوه یێن قه‌ستا به‌رۆكێن شه‌ڕی دكه‌ت و سلاڤه‌كێ ل پێشمه‌رگه‌ی دكه‌ت. پتریا ڤان چالاكیان یێ د تۆڕێن جڤاكی دا، نه‌خاسمه فه‌یسبووكێ دا به‌لاڤ دبن، هنده‌ك وه‌سا هزر دكه‌ن كو پتریا ئه‌و خه‌لكێ سه‌ره‌دانا پێشمه‌رگه‌ی دكه‌ت، بۆ مه‌دحا و فه‌یسبووكێ یه، یان ژی یا بوویه عه‌ده‌ته‌ك كو دڤێت (هه‌یلا ل وی و بابێ وی) بچیته به‌رۆكێن شه‌ڕی و شكله‌كی دگه‌ل پێشمه‌رگه‌ی بگریت و ل فه‌یسبووكێ به‌لاڤ كه‌ت.
ئه‌زێ ل هزرێ هه‌ردو ره‌خێن د ڤان سه‌ره‌دانا دا هه‌ین، به‌لێ ڤه‌رێژا وێ گه‌له‌ك تشته‌كێ هێژایه، نه‌خاسمه وه‌ختێ پێشمه‌رگه دبینیت كو خه‌لكێ كوردستانێ یێ قه‌ستا وی دكه‌ت، یێ ب ئه‌ركێ وی یێ مه‌زن د حه‌سێن، قه‌دره‌كێ مه‌زن بۆ دگرن، كه‌یفا پێشمه‌رگه‌ی هندی دنیایه‌كێ دهێت، ب دیتنا خه‌لكێ خوه كه‌له‌ژانێن وان بلند دبن، نه‌خاسمه هه‌كه د شه‌ڕه‌كی دا (له‌شكر و خه‌لك) ئێكبن، چ تشت نه‌شێن خوه ل به‌ر بگرن. ژبه‌ر ڤێ چه‌ندێ دێ بێژین: هه‌كه ئه‌و سه‌ره‌دانه بۆ ریمه‌تی و فه‌یسبووكێ بیت، هه‌ر بلا ئه‌م د رازینه.
