هەستا تە چییە؟
رەمەزان زەكەریا
دەمەكە ڕاگەهاندنا بینراو ل كوردستانێ دەستەواژەیێن نوو دروستكرینە ل دەمێ نەدروست، هەیامەكا خوەشە دەمێ روودانەك دروست دبیت ئەگەر سروشتی بیت یان دەستكرد و دەمێ كەسەك یان پتر دبنە قوربانی، نابێژین هەموو بەلێ پشكەكا مایك هەلگرێن بێ ئەزموون و نەشارەزا بلەزن بگەهن جهێن روودانێ و پێش هەموو جهێن شولەژی ڤە بریارێ بدەن و رۆنكرنا ل سەر جۆرێ روودانێ و تاوانباری و تاوانلێكری بدەن و دەست ب پرسیاركرنێ بكەن، هەر وەك ل ناڤ گەشت و سەیرانان یان ل سەر مودەرەجێن یاریگەهەكا وەرزشی هند ب ئارامی و نەزانین ڤە پرسیارا ل خۆدانێ روودانێ دكەن.
مایك هەلگرێن ب ناڤ رۆژنامەڤان دێ ل ناڤ قەرەبالغیا كەس وكارێن قوربانی گەرن كێ پتر بگەت گری و كێ پتر باخڤیت ژبەر ژان و نەخۆشیا خوە دێ بلەز مایكا خوە ل بەر سینگێ وی راگرن و دەست ب پرسیاركرنێ كەن، دووماهیك پەیڤا رەحمەتی چ بوو، بەری ژ مال دەركەڤیت چ داخوازی ل هەوە كر؟، هەستێ تە چییە؟، ژیێ رەحمەتی چەندە، هەڤالێن وی چ دبێژن، زارۆكێن وی زانن؟ دەهان پرسیارێن دی یێن بێ رامان و دوور ژ بنەمایێن راگەهاندنێ و جڤاكی دێ هێنە ئازراندن ل ناڤ نەخۆشترین گاڤێن ژیانا خێزانەكێ دا.
گەلەك گرنگە رێك ب ڕاگەهاندنێ نەهێت دان ب ڤێ بێ سەروبەریا نوكە دهێت دیتن رۆمالا روودانا بكەن تایبەت روودانێن جڤاكی، رەنگە ئەگەر رۆمال بهێتە راوەستاندن روودان ژی كێمتر ببن وەك چەوا كامیرە هاتن دانان روودانێن ترافیكێ كێم بوون ئەگەر رۆمال ژی بهێتە سانسۆركرن بیت روودان نەمینن یان كێمتر ببن.
رۆژنامەڤانێ بەرێز چ زیرەكی د وێ چەندێ دا نینە ل دەمێ بابەكێ زارۆكەكێ خۆ ژ دەست دابیت یان دایكەكێ جەگەرا خۆ یان خێزانەكێ هەڤژینێ خۆ تۆ پرسیارا هەستا و سوحبەتێن دیوانكی ئاراستە بكەی، پێدڤە بهایێن خێزانی و جڤاكی ل بەر چاڤ بگری و زێدەتر هەستێ مرۆڤێن قوربانیدەر بریندار نەكەن، روودانا وەك روودان ڤەگوهێزن نەك پێزانیێن خێزانی لبەر چاڤ نەگرتنا بهایێن مرۆڤایەتی.
دخوازم سەندیكا رۆژنامەڤانێن كوردستانێ و وەزارەتا رۆشنبیری هژمارەكا رێنمایا دگەل جهێن شۆلەژی دەربێخن كو رۆمالا روودانان ل سەر وان رێنمایان بهێتەكرن نەك ب ڤی رەنگی رۆژنامەڤان دەمێ روودانا هزر بكەت یێ ل گەشت و سەیرانان، ڕاگەهاندنێ راگرن روودان دێ كێمتر بن.
