دەڤەر و گوهۆڕینێن چاڤەڕێ نەكری ڕۆژهەلاتا ناڤەڕاست لبەر پێلێن گوهۆرینان
عەبدولرەحمان مەحموود
ڕۆژهەلاتا ناڤەڕاست یا د قووناغەكا هەستیار و گوهۆرینێن بلەز دا دەرباز دبیت، دۆخەكێ نەخوازراوە دەڤەر ب گشتی كەفتیە تێدا و باوەرناكەم چو وەلاتەكێ دەڤەرێ پێشبینیا ڤان گوهۆڕینێن ژ نشكەكێڤە كربیت و خۆ بۆ ڤان گوهۆرینان بەرهەڤكربیت تاكو شیابیت خۆ لبەر لێهمشتا ڤان گوهۆرینان ڕابگریت، هەروەكو كا چاوا ل سووریا و لبنانێ و چەند وەلاتەكێن دی یێن دەڤەرێ ڕویدای و مە دیت ب چەند ڕۆژەكێن كێم ڕژێما سووریێ گەوەرا ڤان گوهۆرینان دا، و مانا خۆ ل بەرگریێ نەما و سووریا ئەسەدی ب شێوەیەكێ چاڤەڕێنەكری و ب ئاسانی ژناڤچوو، لێ ئەڤە وێ چەندێ ناگەهینیت كو ئەڤ گوهۆرینە بێ پلان و بەرنامە بسەر دەڤەرێ دا هاتینە، ب دیتنا من بۆ ڤان گوهۆرینان پلان و بەڕنامەیەكێ توكمە بۆ هاتییە داڕێتن، بتایبەت ژلایێ چەند دەولەتێن بڕیار بدەست دا كو نەخشەكێ نوی یێ سیاسی بۆ ڕۆژهەلاتا ناڤەڕاست لپشت پەردان هاتییە كێشان و وان وەك خۆ ئەڤ نەخشە داڕێتییە و كەس نزانیت دوماهیكا ڤان گوهۆرینان دێ ل كیڤە و چاوا راستن و كی دێ ژێ مفاداربیت یانژی لسەر كێ و كیژان وەلاتێ دی ب گرانی ئەڤ گوهۆرینە ڕاوەستن، هەروەكو ئەم دبینین چارەنڤێسێ دەڤەرێ دیار نینە و لسەر پێلێن گوهۆرینان بەردەوامە و ڕەوشا دەڤەرێ نەیا ل خۆ جهە و نزانین كا سباهیا مە دێ چ گۆڕانكاری ڕوی دەن، بۆ ڤان گوهۆرینا ئاماژە وەسان بۆ دچن كو خێرا گەلێ كورد تێدابن و هەتا راددەیەكی گەلێ كورد ب مافێن خۆ شادببن و هەناسەیەكا پڕ ژ ئاشتی و ئارامی و ئازادیێ هەلبكێشن و جاردن زۆلم و ستەم ژلایێ وەلاتێن داگیركەرڤە لێ نەهێتەكرن و دانپێدانێ ب مافێن وان بكەن، بەلگەیێ ڤێ یەكێ ژی ڕێكەفتنا كوردێن ڕۆژئاڤا دگەل حوكمەتا نها یا سووریێ و هەردیسا پێڤاژویا ئاشتیێ یا كوردێن باكور د گەل حوكمەتا ئەردوغانی، ئەڤە بەلگەنە لسەر وێ ئێكێ كو ئەڤ گوهۆرینە پتر دێ د خزمەتا دۆزا گەلێ كورد و مافێن وانێن ڕەوا دابن و ئێدی ئەو نەهامەتی و دەردەسەریێن گەلێ كورد تووشبوویێ دوبارە نەبن، یاگرنگ دگەل ڤان گوهۆرینێن بلەز، پارتێن زورینەیا دەنگێن پەرلەمانی بدەستخۆڤە ئیناین لەزێ د پێكئینانا حكۆمەتەكا بهێز دا بكەن و بۆ هەر گوهۆرینەكێ بەرهەڤیێن خۆ بكەن و ئێكبوونەكا نەتەوەیی ل هەرچار پارچێن كوردستانێ درستبكەن و هەروەكو مە دیتی د ئاهەنگێن ڤێ نەورۆزێ دا ئەڤ چەندە دهاتە پێشچاڤ و دلێ هەر كوردەكی ل هەر جهەكێ لێ پڕی هیڤی و ئومێدێن گەش كرن.
