ئاخ دلۆ
خەلات محەمەد
ئاخ دلۆ..
ئاخ و نالینێن تە
بوونە سترانا هەوارێ
د وەرزێ دوماهی تۆنێ ماندیبووی دا
ئاسێ ما و جاردن كرە غارێ
ئاواز ئاواز
ب دەنگێ تە یێ غەوارەبووی ڤە دچوو
ل ڤێرە بوو
قرچە قرچا پیانۆیا شكەستنێ
و ئاگر یێ ب گڕنژین ڤە
كۆرسێ دیدارێ.
ئاخ دلۆ..
د شكەستنا تە دا
بووم میۆزیكژەنێ
ل سەردەمێ بێدەنگییا بهارێ
و حرامبوونا دیدارێ.
ئاخ دلۆ ..
پەیڤ و ئاوازێن من دیدارن
ل مەملەكەتا عاشقان ب ئاشۆپی
ژ دەهمەنێن من عەشق
دفڕیت و دڕەڤیت
ب هەمیا هەیی ڤە بۆ كەسێ ئەز نە مام؟!
بۆ كێ یێ شكەستی؟ بۆ كیڤە مری دلۆ؟
د شەرەفمەندیا خوە دا
تو پارێزەرێ عەشقی بووی.
ئاخ دلۆ ..
سەد كراس و كفن ژ تە كێم بوون
ئاخ و دەریا ژ توند و هەوارا تە درەڤین
رەنگێ پاییزێ ل تەمەنێ تە هەلدوەریا دلۆ
ژ خوە تێدگەهشتم لێ ژ تە تێنەگەهشتم
ل كیژ دیدارێ ل كیژ مەحشەرێ
دێ كۆم بن تو و ئەو دلۆ.
ئاخ دلۆ ..
رەقس و سەمایا تە دەنگێ بریسیایە
دویراتی و كویربوونا تە شەڤ ڕەشا تاری یە
ئاخ، ئەزم بارانەك غۆبارێ د غەرقینم دل
ل كیژ ڕێ سپیبوونا بەفرێ ب حەلینم
سەرمایێ زمانێ من شكاند
هەوار بگەهن كێ؟
خوایێ ل مەحشەرا ئاخرەتێ یە دلۆ.
