مری
سەگڤان ئیسماعیل
هەر دەم دگۆت: «هوون هەمی مرینە بتنێ ئەز یێ زیندی مە د ئەڤێ دووزەخێدا». هەر دەمێ ل بەر دوكان و مالێن خەلكێ ڕا دچوو ئەڤ پەیڤە دوبارە دكرن بێ كو ئەو ب هیچ شێوەیەكێ بوەستیت و ماندی بیت، لسەر ئێكودویا خوە یێ بەردەوام بوو، پشتی ئەڤێ چەندێ دناڤا تاخیدا دەنگڤەدایی، جار جار هەڤالێ وی دگۆتێ ئەرێ ما ئەم مرینە، ژ ڕاست تو هەر ئەڤێ چەندێ دوبارە دكەی، لێ ئەم ژی وەكی تە یێ دژین و وەكی تەیێ بڕێڤە دچین بێ هیچ كێماسەیەكێ.. ب هەستەكێ گۆمانێ بەرێ خوەدا هەڤالێ خوە و لێ زڤری و گۆتێ: ئەرێ ڕاستە هوون هەمی مرینە بتنێ دەنگێ مرییا ژ هەوە دهێت، ئەرێ بتنێ هوون دشێن بێژن ئەم زیندینە وەكی (دارەكا بێ بەرهەم و بێ خەمل) د ئەڤێ دووزەخێدا. ب دەنگەكێ گەلەك نزم و هێدی هێدی بەرێ خوەدا هەر چار ئالیێن خوە و گۆت: ڕاستە ئەوا تو دبێژی ڕاستیەكا گەلەك ڕاستە ئەم هەمی د ئەڤی باژێری دا یێن مرینە بتنی مستەكا ئاخێ بەسە بكەڤیتە سەر سینگێ مە. لێ ئەم نەشێن ئەوێ بێژین ئەوا تو دبێژی من.. تو بتنێ یێ زیندی د ئەڤێ دووزەخێدا.
بێهنەكا خوەش چوو بێ كو هیچ لێدوانەكێ بدەت و بەرێ خوەدا ئاسمانی ب چاڤەكێ گۆمانێ و پشتی هەناسەیەكا كۆیر كێشایی هێدی هێدی ئەزمانێ خوە لڤاند و لێڤێن خوە بلند كرن و ب هەستەكێ گەلەك خوەش و بێ ترس گۆت:
هوون هەرن ب ڕێكا خوە…چونكی مرۆڤێن مری چ ژێ ناهێت و چ ژ تاما ژیانێ نزانیت و دێ هەر ب گازییا بێ ئارمانج ژین، هوون دێ خەما خوون هەر ڕۆژ سەد جاران د ناخێ خوە دا ب گۆمان ڤە ڤەگێڕن، بتنێ ڕۆژەكێ بژین وەكی من، لێ ئەڤ هیڤییە چ جارا ناهێتە ئەنجامدان گەلی مرییان.
ئەز ژی دێ چم ب ڕێكا خوە.. دێ گازییا مرییان گەهینم ئالیێ دی یێ گۆڕستانێ چونكی مریشۆیەكێ هەی ل ئالیێ دی یێ گۆڕستانێ، هەمی ئارمانجێن مرییان بجهـ دئینیت دێ یێن هەوە ژی گەهینم وی.
