بەرەڤ كویڤە ؟
رێزان جەعفەر
دەما ئەسمان لژێر پێن مە
و عەور ب ملێن مەڤە
كێ دزانی ئەم بەرەڤ كیڤە دچووین؟
دەما هەناسەیێن مە مرۆڤێن بووین دەریا، هشككرین
و مرۆڤان ژینگەهـ وێرانكرین،
گیاندارێن دی بێ جهـ و وار كرین
كێ دزانی ئەم بەرەڤ كیڤە دچووین؟
مە چەند ڕێ ب كەربێ ئاڤا كرن
چەند گاڤ ژ عشقێ جوداكرن
چەند نەهات گۆری هاتنا كرن
ما كێ دزانی ئەم بەرەڤ كیڤە دچووین؟
دەمێ ئەم بۆ سوبەهییا خۆ دئێشاین
و ڕۆژگارێ ل دویڤ خۆ دكێشاین
كێ دزانی ئەم بەرەڤ كیڤە دچووین؟
دەمێ بڕینێن مە، ئەم دگڤاشتین
ژیانێ كەلەخێن مە یێن ساخ، ب خوینێ شویشتین،
دناڤ ئاخێ دا بشاڤتین
كێ دزانی ئەم بەرەڤ كیڤە دچووین؟
نۆكە ژی
فرینەكا بێ چەنگ،
چەنگێن بریندار شوینا خوینێ ئاگری دڕژینن
دلەك مری، ژیانەك بێ روح
جارەكا دی مە دسۆژینن
تو دبینی ئەم یێن بەرەڤ كیڤە دچین؟
ئەڤینەك بێ دل،
دەنگەك تژی ئازار،
ئازارەكا سەر بڕی، لبەر پێن ژیانێ ڤەدشێرین.
تو دبینی ئەم یێن بەرەڤ كیڤە دچین؟
ئەزمانەك شكەستی،
شكەستنەكا تامدایی ب پەیڤان
پەیڤێن ستری دایی
كو لەشان پێ دبڕین
تو دبینی ئەم یێن كیڤە دچین؟
دەستێن قەید كری
برینێن ڤەكری
گوهێن ڤەچنی، ئەم یێن سەد دەردا ماچی دكەین
هەوە دیت؟ ئەم بەرەڤ كیڤە چووین؟
