كرێكار و دەستێن ڤالا
نزار عیسا نۆردینی
ئەڤرۆ ئێكی گولانێ بوو(جەژنا كرێكاران) لێ ژبۆ ئۆمێدی ڕۆژەكا دی یا كارێ گران بوو، چل سالێن ئەوی د كارگەها جلكاندا، دەستێن وی وەك دارێن هشك لێكربوو. چاڤێن وی ژ گریێ ب دزیڤە وەستیای بوون. زارۆكێن ئەوی ل مال برسی بوون، پارەیێن وی كێم بوون ژبۆ كرینا نانەكی و خوارنا شیڤێ؛ ئەڤرۆ كەسێن دی ل مال دڕونشتی بوون یان ل سەیران و جهێن دی شاهی دكرن، دەنگێ سترانان بلند دبوو، لێ د دلێ نەوزادیدا چ تشت نەما ژبلی ژانێ.
كاغەزەك د دەستێ ئەویدا، نڤیسیارەكا دەركرنێ ژ كاری بوو، چونكی ئەوی نەشیا كار بكەت و د رۆژانێن بۆریدا دەمێ نەخۆشییێ ئێخستبوو ل ناڤ نڤینان.. ل بەر دەرگەهێ كارگەهێ، ئۆمێدی چاڤێن خۆ بەرزە كرن، ئالایێ سۆر یێ ل سەر سەرێ كارگەهێ دیت. رۆندكێن ئەوی هاتن خوارێ و گۆت «ئەڤە جەژنا من نینە» ئەرێ كا مافێ من!
ب دەستێن خۆ یێن وەستیای، ئۆمێدی كاغەزەك بچویك ژ بەرویكا خۆ دەرئێخست، وێنەیێ كوڕێ وی یێ د جەنگێ ماف و بەرگریكرنا وەلاتیدا چووی؛ نها ئەو ژی نەما! د ئەوێ رۆژا جەژنا كرێكاراندا، هەمی كەسان كەیف و شاهی دكر، ئۆمێد تنێ ڕاوەستییا و بێدەنگ گری! و ب دەستێن خۆ یێن لەرز و تەزیڤە بۆ كۆلانا مالا خۆ یا تاری بێهیڤی زڤڕی.
