ئیراق و پـابەندنـەبوون ب ڕێكەفتنان
عەبدولرەحمان مەحموود
ئیراق پشتی سالا ٢٠٠٣ و هێرڤە كەفتییە د دەستێن هندەك كەسانێن هزر ئایدولۆجی و تائیفی دا و ب ئەقلەكێ داخستی حوكمڕانی و سیاسەتێ دكەن. ئیراقێ وەك خۆ بڕێڤە دبەن و كەسانێن وەسانن ب هیچ ڕەنگەكی باوەری ب دیموكراسیەت و پێكڤەژیانا نەتەوەیی و ئۆلی نینە و هەمی دەمان خۆ بزل دزانن لسەر كێم نەتەوە و وان ئالیێن نە دگەل ئایدولۆجی و هزركرنا وانا بەرتەنگ دا و هێشتا ل سەر عەقلیەتا شۆفینی و ب كراسەكێ دیموكراسیێ سەختە وەلاتی بڕێڤە دبەن، گەلێ كورد قەدەرا وان وەها چێبوویە ژیانێ دگەل ڤان توخمە مرۆڤان بڕێڤە ببەت و خۆ دگەل كاودانا بگونجینن، ژ پێخەمەت ئیراقەكا فیدرال و فرە نەتەویی و ئۆلی كو هەمی مافێن گەلێ كورد تێدا دپاراستی بن. لێ مخابن سەرانێن ئیراقێ ڤێ یەكێ ناخوازن و ژ نییەتێن وان یێن ڤەشارتی هەردەم وێ ئێكێ دخوازن ڤێ قەوارەیی نەهێلن و وەك خۆ و وەك وان بڤێت سەرەدەریێ دگەل مە بكەن و مافێن مە ژ مە بستینن، ئەڤ چەندەژی د وان هەمی ڕێكەفتن و سۆز و پەیمانێن وانێن كو پێگری پێ نەكری دگەل حوكمەتا هەرێمێ دا دیاردبیت و دیارە ئەڤە چەندەها سالە هەر ژ دەستپێكا حوكمەتێن ئێك ل دویڤ ئێكێن ئیراقا فیدرال، حوكمەتا هەرێمێ دگەل بەغدا چەندین ڕێكەفتن ئیمزا كرینە، لێ بەغدا پێگیرنەبوویە ب پتریا وان ڕێكەفتن و درز و ئالۆزیێن مەزن دروستكرینە ل هەمبەر ژین و ژیارا خەلكێ كوردستانێ، ئەڤە ژی نەك تشتەكێ سەیرە بۆ وان سەرانێن كو پێگریێ ب دەستوورێ وەلاتێ خۆ نەكەن كو مافێ تەڤایا ئۆل و نەتەوەیان تێدا دپاراستینە، پێگر و پابەندی وان ڕێكەفتنان نەبن یێن ل گەل حوكمەتا هەرێمێ ئیمزاكرین و نیازێن خراب ل هەمبەر هەرێما كوردستانێ هەنە، نموونە ئەڤە چەندین جاران حوكمەتا هەرێما كوردستانێ ڕێكەفتن ل گەل حوكمەتا ئیراقێ ئیمزاكرن سەبارەت بودجا هەرێما كوردستانێ و هنارتنا مووچەیێ فەرمانبەرێن هەرێمێ، لێ هەرجارەكێ و ب هەر بەهانەیەكا هەبیت گرێكان ل هەمبەر وان ڕێكەفتنان دروست دكەن و ناخوازن پابەندی وان ڕێكەفتنا ببن. بتنێ وان دڤێت شەڕێ دەرۆنی دگەل گەلێ مە بكەن و ژماف و شایستەیێن دارایی بێ بەهربكەن و حوكمەتا هەرێمێ نەچاربكەن هەر تشتێ ئەو ژێ داخوازبكەن بۆ بكەن. ئەڤ نەپێگریا حوكمەتا ئیراقێ ب ڤان ڕێكەفتنان دێ ڕەوشا سیاسیا ئیراقێ بەرەف ئاسۆیێن نەدیارڤە بەت و دێ بیتە ئەگەرێ وێ ئێكێ هەرێما كوردستانێ چ دی باوەری ب وان ڕێكەفتنێن ل گەل حوكمەتا بەغدا دا ئیمزا كرین نەمینیت.
