ئەمریكا فشاران دكەت بۆ هشككرنا ژێدەرێ پارەداركرنا حەشدا شەعبی
هەژمارەكا رۆژنامەیێن عەرەبی بەلاڤكر، ئەمریكا فشارێن خوە یێن دەستپێكرین تاكو ژێدەرێ پارەداركرنا میلیشیێن حەشدا شەعبی هشك بكەت و ب ڤێ رێكێ هەژموونا ئیرانێ ل ئیراقێ دۆرپێچ بكەت. رۆژنامەیا (ئەلعەرەب) دبێژیت: هەر جۆرە خوەڤەدزینەك ژ دۆرپێچكرنا حەشدا شەعبی، دێ كاریگەری ل سەر هەڤبەندیێن د ناڤبەرا حوكمەتا فیدرال و واشنتۆنێ دا هەبیت، هەروەسا رۆژنامەیا (شەرقولئەوسەت) بەلاڤكر: بەنكا فیدرالییا ئەمریكی، حەشدا شەعبی و بەنكا رافیدەین ئاگەهدار كرینە ل دۆر پێدڤییا راگرتنا كۆمپانییا سەرپەرشتییار ل سەر بەلاڤكرنا مووچەیێ چەكدارێن حەشدا شەعبی
رۆژنامەیا (ئەلعەرەب) د راپۆرتەكێدا ئاماژە ب وێ چەندێ كر» ئەو فشارا ئەمریكا كریە سەر حوكمەتا فیدرالی ب دروستكرنا ئاستەنگان ل پێشبەری خەرجكرنا مووچەیێ زێدەتر ژ 250 هزار چەكدارێن حەشدا شەعبی، حوكمەتا فیدرالی ئێخستییە پێشبەری هەڤكێشەیەكا گران، د ناڤبەرا بجهئینانا وان فەرمانێن ئێكلاكەرێن دژی میلیشیان ژ ئالیێ ئیدارەیا دۆنالد ترەمپی هاتینە دەركرن، ل گەل بزاڤكرنێ بۆ وێ چەندێ ئیرانێ و وێ هەڤپەیمانیێ تۆرە نەكەت كو حوكمەتا فیدرالی پێ هاتیە پێكئینان».
رۆهنكر ژی» رەوشا نوكە ل گەل پێشتر یا جودایە، چونكە ئیدارەیا ترەمپی ب هووری پێداچوونێ ب هەموو تشتەكی دكەت و دوور نینە حوكمەتا فیدرالی ب (پاشكۆیەتییا ئیرانێ) یان بجهئینەرا ئەجیندایێن ئیرانێ ل وارێن سیاسی و ئەمنی و ئابۆری تۆمەتبار بكەت، لەوما هەر جۆرە خوەڤەدزینەك ژ دۆرپێچكرنا حەشدا شەعبی، دێ كاریگەری ل سەر هەڤبەندیێن د ناڤبەرا حوكمەتا فیدرال و واشنتۆنێ دا هەبیت» .
رۆژنامەیا ناڤبری ژ زاردەڤێ چاڤدێران ئاماژە ب وێ چەندێ كر كو دروستكرنا ئاستەنگان بۆ بەلاڤكرنا مووچەیێ چەكدارێن حەشدا شەعبی فشارەكا ئەمریكییە ب ئارمانجا هشككرنا ژێدەرێ پارەداركرن و پشتەڤانیكرنا میلیشییان و رێكگرتن ل وان میلیشیا ل كاركرنێ بۆ بەرژەوەندیێن وەلاتێن دی».
رۆژنامەیا (ئەلعەرەب) باس ل وێ چەندێ ژی كر كو پشتی وێ زیانا ئەمریكا و ئیسرائیلێ ب حەماس و حزبوللا گەهاندی، یا چاڤەڕێكرییە ئەمریكا بزاڤا لاوازكرنا میلیشیێن پاشكۆیێ ئیرانێ ل ئیراقێ بكەت.
ژ ئالییەكێ دیڤە رۆژنامەیا (شەرقولئەوسەت) ژ زاردەڤێ بەرپرسەكێ دیارێ حەشدا شەعبی بەلاڤكر» سزایێن ئەمریكا، چەكدارێن دەستەیا حەشدا شەعبی ژ مووچەیێن وان بێبەهر دكەت».
هەمان رۆژنامە ئاماژە ب ئاخڤتنێن مەیسەم زەیدی، فەرماندەیێ فیرقەیا عەباس ژ هێزێن (حەشدا عەتەباتا) كریە و دبێژیت» زەیدی سەربخوەییەكا زۆر ژ حەشدا شەعبی هەیە، ژ ئەگەرێ وێ چەندێ سەر ب لێڤەگەرێ ئایینیە ل نەجەف».
ل دووڤ ئاخڤتنێن زەیدی» بەنكا فیدرالییا ئەمریكی، حەشدا شەعبی و بەنكا رافیدەین ئاگەهدار كرینە ل دۆر پێدڤییا راگرتنا كۆمپانییا سەرپەرشتییار ل سەر بەلاڤكرنا مووچەیێ چەكدارێن حەشدا شەعبی».
رۆژنامەیا (شەرقولئەوسەت) دیاركر ژی» پێشتر مەیسەم زەیدی ل چەندین هەلكەفتاندا راگەهاندبوو، مەزنترین دۆسێییا گەندەلیێ د پلەیێن فەرمانبەریێ یێن حەشدا شەعبیدا هەیە، ئەڤە ژی وەك ئاماژەیەك بۆ چەكدارێن بندیوار. وەك د دەمێ بۆریدا سەجاد سالم، پەرلەمانتارێ سەربخوە ژی گۆتی (حەشدا شەعبی دەوروبەرێ دو ملیار دۆلاران بێی چاڤدێری و سەرپەرشتی وەردگریت».
