میلیشیایێن ئیراقێ مەزنترین ئاستەنگن ل پێشبەری بەرهەمئینانا غازێ
كۆڤارا (ئاتالایار) یا ئیپانی د راپۆرتەكێدا بەلاڤكر» ئیراق د قۆناغەكێدایە، روو ب روویێ ئاستەنگێن مەزن دبیت د بزاڤێن خوەدا بۆ وەبەرئێنانێ د سامانێ غازێدا.
وێ كۆڤارا ئیسپانی د راپۆرتا خوە دا بەلاڤكر» نوكە ئیراق بەر ب كۆمپانیێن ئەمریكی یێن مەزن چوویە بۆ بجهئینانا پرۆژەیەكێ كو مەبەست ژێ كێمكرنا ب هەدەردانێ و بەرهەمئینانا وزەیە، گەهشتن ب ڤێ ئارمانجێ گرێدایە ب شیانێن ئیراقێ د روو ب رووبوونا میلیشا و كێمكرنا دەستهەلاتێن وان، كو ئاستەنگەكا مەزنن ل پێشبەری راكێشانا وەبەرئێنانا بیانی».
كۆڤارا ناڤبری د راپۆرتا خوە دا رۆهنكر ژی» ئیراق پشكەكا مەزن یا غازا گرێدای ب بەرهەمئینانا پەترۆلێڤە دسۆژیت. هەروەسا ل سالا 2023 ئیراقێ رۆژانە نێزیكی (1،2) ملیار پێ سكێر پیڤانەیی ژ غازێ سوتینە كو ب هەدەردانەكا مەزنە بۆ وزەی و دبیتە ئەگەرێ پەیداكرنا كارەساتێن ژینگەهی».
هەروەسا ئاماژە ب وێ چەندێ كر» ئیراق پشتبەستنێ
ب كڕینا غازێ ژ ئیرانێ دكەت، كو سەرجەمێ گشتی نێزیكی ملیار پێیێن سكێر تێكرایێ رۆژانەیە، ئەڤە ژی كڕینەكا پشتڕاستكری نینە، ب تایبەتی پشتی نە ئارامییا دەڤەرێ كو ژ ئەنجامێ شەڕێ ڤێ دووماهیێ د ناڤبەرا ئیرانێ و ئیسرائیلێدا دروست بووی».
هەروەسا باس ل وێ چەندێ ژی كریە» بریارا ئیدارەیا دۆنالد ترەمپی ل مەها ئیدارێ بۆ راگرتنا نوونەكرنا مۆلەتان كو ئێدی رێكێ ب ئیراقێ نادەت غازێ و كارەبێ ژ ئیرانێ بكڕیت، بوویە ئەگەرێ وێ چەندێ ئیراق تووشی بڕینا درێژخایەن یا كارەبێ ببیت».
د پشكەكا دی یا وێ راپۆرتێدا، ئەو كۆڤارا ئیسپانی رۆهن دكەت» ئیراق ل رێزبەندێدا د ناڤ پێنج وەلاتێن سەرەكی یێن بكارئینانا غازێ ل جیهانێ دهێتە نیاسین، ژ روویێ هەبوونا غازا سرۆشتی پلەیا دوازدێ ل جیهانێ هەیە، بەلێ پشكەكا مەزن یا ڤێ غازێ ب هەروە دچیت و سۆتن».
كۆڤارا ناڤبری هەروەسا ئاماژە ب وێ چەندێ كر» هەر بزاڤەك ل ئیراقێ كو بخوازیت وەبەرئێنانا بیانی رابكێشیت و مفای ژ شیانێن مەزن یێن ئیراقێ د وارێ وزەیدا وەربگریت، پێدڤییە ئەولەویەت و كارێ بەراهیێ دابینكرنا ئاسایش و ئارامیێ بیت».
دیاركر ژی» ئیراق دێ بەر ب روویێ دو ئاستەنگێن سەرەكی بیت، ئەوژی شەركرن دژی توندرەویێ و توندوتیژیێ، هەروەسا دەستهەلاتا میلیشیێن نێزیكی ژ ئیرانێ كو هێشتا ل دەرڤەی كوۆنترۆلا دەولەتێدا كار دكەن».
