شكـەفت و دوومـاهـی روودان
مــوسەدەق تـۆڤـی
د ڤان رۆژاندا دو بۆیەرێن گرنگ ل باشوورێ كوردستانێ روودان هەردووان پتر ژ هەرجهەكی پەیوەندی ب باكوورێ كوردستانێ و وەلاتێ تركیاڤە هەبوون. د بۆیەرا ئێكێدا بەری چەند رۆژەكان ل شكەفتەكا باشوورێ كوردستانێ چەند لەشكەرەكێن ترك ژەهراوی بوون و پێنج ژ وانا مرن و چەندەك نەخۆش كەفتن. د بۆیەرا دووێدا كو رۆژا 11 تیرمەها 2025 هاتییە ئەنجامدان و هەتا نڤیسینا ڤان پەیڤان تەڤایی سازیێن میدیایی پێڤە مژوولن 30 شەرڤانێن PKK ل دووڤ بانگەوازا بەرێز ئەبدولڵا ئۆجەلان ل بەرامبەری شكەفتا جاسەنە دەڤەرا سۆرداش – سلێمانیێ د رێورەسمەكێدا چەكێن خوەدانان و هەر وان ب خوە ئاگر بەردایێ ئەڤە ژی وەك دەسپێشخەرییەك بۆ پرۆسەیا (ئاشتیێ) وەك ئەو ناڤدكەن و پرۆسەیا (تركیا بێ تەرۆر) وەك دەولەتا تركان ناڤدكەت.
پرسیار ل ڤێرێ دهێتەكرن هەردو بۆیەران راستەخوە پەیوەندی ب تركیا ڤە هەیە، كاراكتەرێن هەردووان وەلاتیێن تركیا نە و رەگەزنامەیە تركی هەیه، چما گەهشتنە باشوورێ كوردستانێ و چما باكوور و تركیا نەبوونە مەیدانا ڤان دو بۆیەران و سەدان بۆیەرێن دی كو ب دەهان سالە ل باشوور رووددەن و باشوور ب خاك و وەلاتیڤە بووینە قوربانی. لەشكەرێن ترك ل چیایێن باشوور چ دكەن..؟ بەرسڤەك دێ بێژیت بۆ راوەدونانا گەریلایێن PKK هاتینە..! ئەرێ گەریلایێن PKK كو خەباتێ ژ بۆ تركییایەكا دیموكراتیك و مافێ مرۆڤی ل تركیا و ب هەڤرا ژیانا گەلێن تركیا دكەت چما خەباتا خوە یا دیموكراتیك ل سەر گۆرەپانا باكوور و تركیا نەدكر، چما شەڕێ خوەیێ پارتیزانی د ناڤا ئەردنیگارییا تركییا نە د دۆماند..؟ ئەرێ ب ڤالاكرنا باكوورێ كوردستانێ بۆ لەشكەرێ تركان و كونترۆلكرنا پشكەك مەزن ژ باشوور و بێ باهركرنا خەلكێ وێ پشكا باشوور ژ وار و خێروبێرێن وارێ خوە و دەربەدەركرن و مشەختكرنا وان ژ جهێ باب و باپیرێن وان چ گەهشتە PKK و چ دەستڤەئینا..؟ ئەرێ تێكۆشینا شەڕڤانان بۆ خوەسەرییا باكوورێ كوردستانێ بوو یان بۆ رادەستكرنا پشكەكا باشوور بوو بۆ لەشكرێ داگیركەرێ تركان..؟ ئەرێ ئەو هەموو زێدەگاڤیێن بەرامبەری خەلك و حكومەتا هەرێما كوردستانێ كرین پتر د بەرژەوەندییا تركان و دەولەتێن دژە كورد دا نەبوون…؟ ئەو هەموو هێز و دژواری و چەكێن PKK دژی هەرێما كوردستانێ بكارئیناین تێرا هندێ نەبوون دەولەتا تركان ناچاركەت بێنە دانوستاندنێ و هندەك مافێن خەلكێ باكوورێ كوردستانێ بپەژرینیت..؟ ئەرێ ئەگەر بارەگایێن PKK ل شوونا قەندیلی و هەفتەنینێ و نێروەرێكان ل چیایێن جودی و گابارێ و هەكاری و ئاگری و دێرسیمێ… بانە هەلوەستێ رێبەر و گەریلایان د دەمێ دانوستاندناندا بهێزتر نەدبوو..؟ ئەرێ هەكە چەكدانانا وان یا سەمبۆلیك شوونا شكەفتا جاسەنە ل بنارا چیایێ جودی یان ل گەلیێ زیلانێ و دەشتا ئامەدێ با سەرفرازتر نەدبوو..؟ ئەڤە هەموو چەند پرسیارەكن ئەگەر رەوشا سیاسییا وەلات و پەیوەندیێن د ناڤبەرا حزبێن سیاسی د دەمێ نهادا هاریكار نەبیت بۆ بەرسڤدانا وان، رۆژەكێ دێ دیرۆك ل بەرسڤا ڤان پرسیاران دەت و ئێك ئێكە دێ هۆكار و كاراكتەر و ئەگەر و ئەنجامێن وان دەسنیشانكەت.
ب هەر ئاوایەكی بیت، نها رەوش گەهشتییە ڤی ئەنجامی PKK ل دووڤ بانگەوازێن رێبەرێ خوە بریارا خوە هەلوەشاندنێ دایە و ل دووڤ پرۆسەیا ل 11 تیرمەهێ ل جاسەنە هاتییەكرن دەست ب چەكدانینێ ژی كر. ئەرێ بەرامبەری ڤێ پێگیریێ تركیا پەیمانەك نڤیسكی یان زارەكی دایە..؟ نها دێ پرۆسەیا ئاشتی یان (تركیا بێ تیرۆر) كیڤە چیت.. هەتا كەنگی دێ خەلكێ باكوورێ كوردستانێ چاڤەرێ بن..؟ سەرەنجامێ ب هزاران شەرڤانان ب سەركردەڤە دێ چ بیت..تنێ 30 چەكێن داناین دێ كەنگی هەموو چەكان دانن و دێ كەنگی هەلوەشاندنا یەكجارییا پارتییا خوە راگەهینن، هەروەك وان ب خوە بریار پێدای.. بەرامبەری ڤان هەموو پێنگاڤان دێ دەولەتا تركان چ پێنگاڤ هاڤێت..؟ یان دێ مینتە ل هیڤییا لیژنێن ناڤ پەرلەمانی و دێ ب سالا پێڤە مژوول بن..
یا پەیوەندی ب خەلك و دەستەلاتێ هەرێما كوردستانێڤە هەی، ئەرێ PKK ب دەستبەردان و دەركەتنێ ژ خاكێ باشوور دێ رێخوشكەر بیت بۆ دەركەتنا لەشكرێ داگیركەرێ تركیا ژ هەرێمێ..؟ یان بەروڤاژی.. ئەرێ دێ رۆژەكێ PKK دەڤەرێن ژێردەستەلاتێ خوە رادەستی حكومەتا فەرمییا هەرێمێ كەت..؟ یان پلانەك دی بۆ ڤێ چەندێ هەیە.. ئەرێ دێ خەلكێ مە دێ شێت بزڤریتەڤە بۆ سەر وارێ باب و باپیران و گوندێن خوە ئاڤاكەت و مفای ژ سامانێن خوە وەرگریت.. گەلەك پرسیارێن دی یێن پەیوەندیدار ب هەرێما كوردستانێ ڤە هەی بەرۆكا ڤێ پرۆسەیێ دگرن و بەرسڤ ژی تنێ ل جەم PKK یە..! ل داویێ ئەز دبینم دەم هاتییە PKK بەرامبەر هەموو ئەڤا ل باشوور كری نیازپاكیێ دیاركەت و بێژیت: فەرموون ئەڤە مال و وارێن هەوە و هەوە پیرۆز بن و خێرێ ژێ ببینن و ئەم براینە بەلێ هەر ئێك ل مالا خوە.
