ژێدەر كی یە؟
رەمەزان زەكەریا
ژێدەر،مصدر،source ، ئەڤ پەیڤە پتر د ڤەكۆلینێن زانستی دا دهێتە ب كارئینان، جاران ژی بۆ هندەك بابەتێن تایبەت یێن راگەهاندنێ، بەلێ نوكە راگەهاندنا كوردی یا فێربووی بۆ پتریا بابەتان ب كاردئینیت و ئەڤێ چەندێ نە شیایە بینەری و خواندەڤانی پشت راست بكەت و تێربكەت ژ وی بابەتێ هاتیە بەلاڤكرن .
گەلەك جاران وەزیر یان بەرپرسەكێ پلە بلند دێ رۆهنكرنەكێ بەلاڤ كەت وبێژیت ئەو دەنگوباسێ هاتیە بەلاڤكرن راست نینە و مەچ لێدوان نە داینە بۆ چ دەزگەهێن راگەهاندنێ، د دەمەكی دا دەزگەهێن راگەهاندنێ بەلاڤدكەن بێی دووڤچۆنێ ل سەر بابەتی بكەن، ژبەر كو ئێك ژ گرنگیا بابەتێ دهێتە بەلاڤكرن دووڤچوونا رۆژنامەڤانی یە، بەلێ دەمێ ژێدەرێ وی یێ سەرەكی یێ نەدیار بیت پێدڤی ب چ دووڤچوونێن مەزن ناكەت.
ژێدەر پتریا جاران كو بۆ ڤەكۆلینێن زانستی دهێتە ب كارئینان هندەك جاران ژی بۆ بابەتێن تایبەت ب ئاسایشا نەتەوەیی ڤە دهێنە ب كارئینان ، بەلێ راگەهاندنا كوردی خۆ روودانەك ل سەرێ كولانێ روو دەت دێ بێژیت ژێدەرەكێ گۆت: هەموو جاران ژێدەر نابیتە پیڤەر بۆ تەمامبوونا راپۆرت و بابەتێن رۆژنامەڤانی .
ژێدەر كی یە؟ هەر كەسێ ل سەر روودانەكێ باخڤیت پێزانێن وی د دروست بن یان شاش ب ژێدەر دهێتە هژمارتن ل چایچیێ فەرمانگەهەكێ هەتا رێڤەبەرێ گشتیێ وێ فەرمانگەهێ ب ژێدەر دهێتە نیاسین .
پەیڤا ژێدەر گرنگ و پێدڤیە ب تنێ بۆ بابەتێن ئاسایشا نەتەوەیی و دەزگەهێن ئێمناهی ب هێتە كار ئینان، هاتنا مووچەی یان گیرۆبوون ژێدەر نەڤێت راستەوخۆ ناڤێ ئاخفتنكەری بەلاڤ بكەن دا خواندەڤان بینەر بزانیت كێ پێزانین بەلاڤكرینە.
راگەهاندنا كوردی پێدڤی ب رێكخستنێ هەیە نە ب تنێ بۆ بابەتێ ژێدەران ب رەنگەكێ گشتی، ژێدەر ئێكە ژ خالێن سەرەكی و گرنگ كو خواندەڤان و بینەر باوەریێ ب وی بابەتی بینن كو بەلاڤ بووە ، ئەو دەزگەهێن ئاخفتنكەری ب ناڤ و نیشان بەلاڤ دكەن پتر دووڤچوون كریە و د شیان دایە پتر باوەریا جەماوەری بۆ خۆ راكێشن كو بابەتێ مە بەلاڤكری ژ بابەتێن راست و دروستە.
