ژ ترسا ئەمریكا، میلیشیا ژ پڕۆژە قانوونا حەشدا شەعبی پاشڤە زڤڕین
د دەمەكی دا فەرماندە و سەركردەیێن حەشدا شەعبی بانگەشەیا وێ چەندێ دكر كو جلكێن هێزێن خوە دێ ل بەركەن و چنە د ناڤ ئاڤاهیێ جڤاتا نوونەرێن ئیراقێدا و پڕۆژە قانوونا حەشدا شەعبی دەربازكەن، بەلێ سەرەرای دەستپێكرنا روونشتنێن جڤاتا نوونەرێن ئیراقێ، تنێ دو پەرلەمانتاران جلكێن حەشدا شەعبی كرنە بەرخوە و تمامی ژی بێدەنگی ل پرسا دەربازكرنا پڕۆژە قانوونا ناڤبری كر.
سەبارەت ڤێ پرسێ رۆژنامەیا (المدی) یا ئیراقی د راپۆرتەكێدا ئاماژە ب وێ چەندێ كر كو روونشتنێن چەند رۆژێن بۆری یێن جڤاتا نوونەرێن ئیراقێ ب زەحمەت بوون، چونكە نەشیان سۆزێن خوە بۆ دەربازكرنا پڕۆژە قانوونا حەشدا شەعبی بجهبینن و تنێ كرنە روونشتنێن وێنەگرتنێ.
رۆژنامەیا ناڤبری د راپۆرتا خوە ئاماژە كر ژی كو ل روونشتنێن رۆژێن بۆری یێن جڤاتا نوونەران هەتاكو نەرازیبوون ژی ل دژی پشت گوه هاڤێتنا پڕۆژە قانوونا حەشدا شەعبی نەهاتە دەربڕین، ئەگەر ژی ئەوە كو هێزێن حەشدا شەعبی د ناڤ خوە ژی دا دابەش بوون و ل سەر دەربازكرنا وێ پڕۆژە قانوونێ د ئێكدەنگ نینن.
سەبارەت ڤێ پرسێ ئەندامەكێ جڤاتا نوونەرێن ئیراقێ كو نەخواست ناڤێ وی بهێتە ئاشكراكرن بۆ رۆژنامەیا (المدی) گوت» هێزێن حەشدا شەعبی ل جڤاتا نوونەرێن ئیراقێ گەرم و گوڕییەكا مەزن بۆ دەربازكرنا وێ پڕۆژە قانوونێ هەبوو، بەلێ نوكە ئەو گەرم و گوڕییە نەمایە، ئەگەری ژی بۆ گەفێن ئەمریكا دزڤریت».
ب گۆڕەی هەمان راپۆرت» هەرچەندە ل حەفتییا بۆری میلیشیێن چەكدار یێن حەشدا شەعبی بانگەشەیا وێ چەندێ دكر كو پیتەی ب گەفین ئەمریكا نادەن ودێ ب جلكێن حەشدا شەعبی چنە دناڤ ئاڤاهیێ جڤاتا نوونەرێن ئیراقێ وپڕۆژە قانوونا حەشدێ دەربازكەن، بەلێ تنێ دو پەرلەمانتاران جلكێن حەشدا شەعبی ل بەرخوەكرن د دەمەكی دا پێشتر رێكخراوا بەدر كو هادی عامری سەرۆكایەتییا وێ دكەت و میلیشیا عەسائیب ئەهلولحەق كو قەیس خەزعەلی سەرۆكایەتییا وێ دكەت بەردەوام داخواز ژ پەرلەمانتاران دكر وەك پشتەڤانی بۆ دەربازكرنا وێ پڕۆژە قانوونێ، جلكێن حەشدا شەعبی بكەنە بەرخوە».
رۆژنامەیا ناڤبری ئەوژی ئاشكراكر كو هەتا ئەو هەردو پەرلەمانتارێن جلكێن حەشدا شەعبی كرینە بەرخوە، تنێ ل كافیتیرییا جڤاتا نوونەرێن ئیراقێ وێنە ب وان جلكان گرتن و ل تۆرێن جڤاكی بەلاڤكرن.
ئەڤە د دەمەكی دایە كو پێشتر ئەمریكا ب چەندین رێكا گەفا وێ چەندێ ل ئیراقێ كربوو هەكە پڕۆژە قانوونا حەشدا شەعبی ل جڤاتا نوونەرێن ئیراقێ بهێتە دەربازكرن، دێ هەلوەستێ توند ل بەرامبەر وەرگریت.
