ئیراق د پاشڤەچوونێ دایە و شیانێن ب هێزكرنا یەدەكێ زێرێ نەماینە
وەزیرێ داراییا ئیراقێ یێ پێشتروئ ێك ژ سەركردەیێن عەرەبێن شیعە راگەهاند: حوكمەتا ئیراقێ د نیڤا ئێكێ یا ئەڤسالەدا هیچ رێژەیەكا زێری نەكریە و ئەڤە وێ چەندێ د سەلمینیت كو پەترۆل تنێ خەرجییان ڤەدگریت و ئێدی شیانێن ب هێزكرنا یەدەكێ زێری و بۆندێن ئیراقێ نینە .
باقر جەبر ئەلزوبەیدی، وەزیرێ داراییا ئیراقێ یێ پێشتر د بەیاننامەیەكێدا بەلاڤكر» مخابن، جڤاتا جیهانییا زێری راگەهاند كو د نیڤا ئێكێ یا سالا 2025 ئیراقێ هیچ رێژەیەكا زێری نەكریە. سەرەرای وێ چەندێ ئیراق نەشیایە ژی یەدەكێ خوە یێ زێری ب هێز بكەت، بەلێ شیایە پلەیا خوە ل سەر ئاستێ جیهانێ بپارێزیت د لیستا وەلاتێن خودان مەزنترین یەدەكێ زێری».
گوت ژی» ئیراق ل پلەیا 29 ل سەر ئاستێ جیهان دهێت ژ سەرجەمێ 100 وەلاتان د لیستا مەزنترین یەدەكێ زێری. ئیراقێ ل سالا 2022 رێژەیا (33,9)تەنێن زێری كڕیبوون و ل سالا 2023 رێژەیا (12،3) تەن و ل سالا 2024 رێژەیا (20،1) تەن كڕیبوون ب ڤێ چەندێ ژی یەدەكێ زێری گەهشتە (162) تەنان.
وەزیرێ پێشتر یێ داراییا ئیراقێ رۆهنكر ژی» راگرتنا كڕینا زێری ژ ئالیێ ئیراقێڤە د دەمەكیدایە كو بهایێ پەترۆلێ یێ جهگیرە و هیچ نزمبوونەكا بەرچاڤ ب خوەڤە نەدیتییە، ئەڤە ژی وێ چەندێ د سەلمینیت كو پەترۆل تنێ خەرجییان بخوەڤە دگریت و ئێدی شیانێن ب هێزكرنا یەدەكێ زێری و بۆندێن ئیراقێ نینن. رامانا وێ چەندێ ژی ئەوە دەولەتا ئیراقێ ل پاشەڕۆژێ د پرسا دابینكرنا یەدەكێ زێریدا دێ پاشڤەچیت، ئەڤ چەندە ژی دێ قەیرانەكا دی بۆ نڤشێن داهاتی دروست كەت».
باقر جەبر ئەلزوبەیدی، دوپاتكر ژی» یەدەكێ زێری گرنگترین چەكێ ئابۆریێ نیشتمانییە و پیڤەرەكە بۆ گەلەك ژ كۆمپانیێن مەزن و پۆلینكرنێن جیهانی دەربارەی هەر وەلاتەكی. پاشڤەچوونا ئیراقێ د ڤی واریدا رامانا وێ ئەوە كو وەبەرئێنانا بیانی دێ راوەستیت و د گەلدا پۆلینا ئابۆرێ ئیراقێ ب گشتی دێ پاشڤەچیت».
ئەلزوبەیدی ب پێدڤی دزانیت» داهاتەكێ نیشتمانی بهێتە دیتن كو خەرجییان دابین بكەت، بۆ وێ چەندێ دەولەت بشێت پشكەك ژ داهاتێ پەترۆلێ ڤەگوهێزیت بۆ یەدەكی، ئەڤجا چ بۆندێ دارایی بیت یان یەدەكێ زێری و ئەڤە كارەكێ گونجایە، ب تایبەتی ل گەل وان شیانێن مەزن یێن ئیراقێ هەین و رەوشا ئەمنی ژی یا جهگیرە، ب مەرجەكی گەندەلی و ئەو لژنەیێن ئابۆری بهێنە بنبڕكرن كو دەست ب سەر سامانێ ئیراقییان دا گرتی و هەموو خێری و بێرێن وەلاتی قۆرخكرین».
