راپۆرتەك: كێمئاڤی ل ئیراقێ دێ توندوتیژیێ د دووڤ خوە ڕا ئینیت
جڤاتا هاریكارییا ئاڤ، ئاشتی و ئاسایش (WPS) نووترین راپۆرتا خوە یا چارێك سالانە بەلاڤكر و تێدا ئاماژە ب دەڤەرێن گەرم یێن جیهانێ كریە، كو ژ ئەگەرێ كێمئاڤیێ روو ب روویێ مەترسییا توندوتیژیێ دبن. راپۆرتا ناڤبری ب هووری باس ل كاریگەریێن گوهۆڕینا سەقای، بڕێڤەبرنا خراب و كێمییا ئاڤێ دكەت ل سەر نەئارامیێ ل وەلاتێن وەك ئیراق، ئەفغانستان، ئیران، هندستان و پاكستانێ، ل گەل چەندین دەڤەرێن دی.
ب گۆرەی راپۆرتێ، ئیراق نوكە روو ب روویێ دژوارترین قەیرانا ئاڤێ بوویە د دەمێ 80 سالێن بۆریدا، داتایێن فەرمی دیاردكەن، ئاستێ یەدەكێ ئاڤا ئیراقێ گەهشتییە نزمترین ئاستێ خوە د 80 سالاندا.
حوكمەتا ئیراقێ دەستپێشخەرییەكا نوو یا ئاڤێ راگەهاندیە بۆ پاراستنا رووبارێن دیجلە و فوراتێ، ئەڤ دەستپێشخەرییە چەندین پێرابوونێن سەرەكی بخوەڤە دگریت، ژوان زێدەكرنا شیانێن شرینكرنا ئاڤێ، ب كارئینانا سیستەمێ زیرەك یێ بڕێڤەبرنا ئاڤێ وەكو پیڤەرێن زیرەك و سیستەمێ دیتنا دزەكرنێ.
بەلێ، ئەو راپۆرتە ئاماژە ب وێ چەندێ دكەت، كێشەیا جدی یا بەردەوامە ژ ئەگەرێ سنوورداركرنا رێڕەوێن سەری یێن رووباران ژ ئالیێ توركیاڤە، كو زێدەتر دەستڕاگەهشتنا ئیراقێ ب ئاڤا رووباران كێم دكەت.
جڤاتا هاریكارییا ئاڤ، ئاشتی و ئاسایش (WPS) پێشبینییا بەردەوامییا ململانێ ل پترییا دەڤەرێن ئیراقێ دكەت. پێشبینیێن كورتخایەن ژی ئاماژێ ب زێدەبوونا توندوتیژیێ ل پارێزگەها میسان د كەن، ب تایبەتی ل باژێرێ عەمارە.
داتایێن هەیڤێن دەستكرد ل هەردو مەهێن نیسان و گۆلانا 2025 دیاردكەن كو ئاستێ ئاڤێ ل بەنداڤان ل بن ئاستێ ئاساییە، ئەوژی وێنەیەكێ رۆهن ژ خراپبوونا ئاسایشا ئاڤا ئیراقێ نیشا ددەت.
د راپۆرتێدا هۆشداری ل دۆر قەیرانا ئاڤێ ل تەهرانا پایتەختێ ئیرانێ ژی هاتیە دان و ئاماژە ب وێ چەندێ هاتیە كرن دبیت د چەند حەفتیێن داهاتیدا، تەهران بێ ئاڤ ببیت.
كاربەدەستێن وی باژێری پێشتر پێدانا ئاڤێ بۆ نێڤی كێمكربوو، ئەڤ چەندە ژی ببوو ئەگەر گەلەك ژ ئاكنجیێن وی باژێری پشتبەستنێ ب تانكەر و تانكێن كۆمكرنا ئاڤێ بكەن، حوكمەتا ئیرانێ ژی چەند جاران ژی ژ ئەگەرێ كێمییا كارەبێ و ئاڤێ ل تەهرانێ، بێهنڤەدان راگەهاندیە.
