هێشتا ئیراق وەلاتەكێ دیموكراسی نینە
ناڤەندا نەخیل بۆ ماف و ئازادیێن رۆژنامەڤانی، شكەستنا دەولەتا ئیراقێ د دابینكرنا ماف و ئازادییان و سیستەمێ دیموكراسی راگەهاند.
وێ ناڤەندێ بەلاڤكر» ل رۆژا جیهانییا دیموكراسیێدا، ب گۆڕەی بنەما و هەمبەركرنان، هەتا نوكە ئیراق دەولەتەكا ستەمكار و دیكتاتۆرییە و ل رێزبەندا 167 دەولەتاندا ل پلەیا 128 هاتیە، ژ 10 نمرەیان ژی تنێ 2,8 ب دەستڤەئینایە».
وێ ناڤەندێ دیاركر ژی» پشتی پتر ژ 20 سالێن گوهۆڕینا رژێمێ ل ئیراقێ، ئەڤ ئەنجامە یێ شەرمزاركەر و سكەستییە، ب جۆرەكی كو هیچ پێنگاڤەك بەر ب سەركەفتنا دیموكراسیێ نەهاتییە هاڤێتن».
هەر د وی چارچۆڤەیدا، یاسر حوسەینی، ئەندامێ جڤاتا نوونەرێن ئیراقێ د داخۆیانییەكا رۆژنامەڤانیدا بۆ كەنالێ (وەن نیوز) گوت» ب مخابنییەكا مەزنڤە، ئەوێن ل 20 سالێن بۆری ئیراق بڕێڤەبری، دوماهی ب هەموو بنەمایێن دیموكراسیێ و بڕێڤەبرنا باش ئینایە، لەوما ئەڤ حوكمڕانییەكا ئیراقێ، ژ ئەنجامێ گەندەلیێ و خرابكاریێ ب دووماهی هاتیە».
ب گۆڕەی پێزانینێن دەزگەهێ زەلالییا نێڤدەولەتی، ژ 180 دەولەتان، ئیراق ل پلەیا 180 دهێت د روو ب رووبوونا گەندەلیێ و نەشیایە ب ئەركێ خوە رابیت.
ل سالا 2024، پەیمانگەها نۆرماندی بۆ ڤەكۆلینان ل پەرلەمانێ ئۆرۆپا، راپۆرتەك ل سەر وان دەولەتان بەلاڤكر كو مەزنترین گەفن ل سەر دیموكراسیێ ل جیهانێ، د وێ رێزبەندیێدا سویسرا وەك ئێكەم دەولەتا دیموكراسی هاتیە دیاركرن و ئیراق ژی وەك دەولەتەكا كو گەفە ل سەر دیموكراسیێ ل پلەیا 130 هاتیە.
