ریكلاما بەلاش
محسن عەبدولرەحمان
ل باژارێ سلێمانیێ چالاكییەكا هونەری ب ناڤی (هونەرگەها وەلات) ل زانكۆیا ئەمریكی هاتە گێڕان، وەكو د مالپەراندا بەلاڤبووی د برگەیەكێ دا شەش كچێن كورد ب كاروكوكێ داعش ل سەر خوانەیێ ئەو عەبا و پێچە هاڤێتن و ب چلكێن كوردی برگەیا خۆ تمامكر، دیارە ئەڤێ ئیسلامیێن كوردستانێ گەلەك ئێشاندینە، لەو كارلێكرن و دژكار گەلەك د دژواربوون! وەسا دیاربوو هاڤێتنا كچێن كورد بو راپێچا داعش ئەوان ب دژی دینی ناسكرییە، دزانین كو چ ئیسلامیێن كوردستانێ چ هەلویستێن نەتەوەیی و مرۆڤی هەمبەر هۆڤاتییا داعش دژی مللەتێ كورد نەبوون، ئەگەر ئیسلامییا ب وێ دژواریێ بەحسنەكربا هەر كەسێ ئاگەهـ ژ بابەتێ نە بوو! لەورا ئەوان مەزنترین ریكلاما بەلاش بو چالاكیێ كر.
ئەڤێ هەلویستێ ئیسلامیێن كورد بیرا من ل دژوارە سەرەدەریا (چورچ ئویول) ی دكەل زركێتكەكێ ئینا، دەمێ زركێتكێ هنگڤین دخوار و ئەوی ب چەقویێ كرییە دوو پارچە، زركێتك بەردەوامبوو ل سەر خوارنا هنگڤینێ ژ سكی بڕی دەردكەفت، لێ دەما ڤیای بفڕیت، ژنوو ب بلارەساتێ زانی!
ئەڤەیە یا ب سەرێ مە دهێت، بێ جوداهی هەموویان ژ ئەرەب، ترك، فرس، ئیرس، ئینگلیز، فرەنسی، ئەمریكا…، پارچە ژ مە ڤەكرینە ژ گیان و بێرێن مە خواری یە، د دەمەكی دا ئەم د هنگڤینی دا د خەندقینە و پتریا مە هەر كارەساتا مە تێبینی ناكەن، تاكو (بار دهێتە سەر شاخێن گای) و پێدڤی فڕینێ دبین.
پرسیارا من وەكو كوردەك ئەرێ بۆچی ئیسلامێ پێچان سەپاند، ما هینگێ ژنێن د رویسبوون؟ دیسان جلك و راپێچا ژنا كورد یا بێستارەیە، ما كورد بو مرۆڤێ ئازان نابێژن (سەربەست) و بو مرۆڤێ بەرەللا و سەربەردای (سەركول، سەرتراشی)؟ یا زانایە دەرسۆك/ جەمەدانی پشكەكە دانەبڕایە ژ راپێچا ژن و مێرێ كورد، لێ حیجابا و پێچە (نیقاب) ژ كاكلا دینێ ئیسلامێ نە و ئەركە یان هێمایەك سیاسی یە، مەبەست پێ خۆ دیاركرن و جوداكرنە و حاشابوونە ژ كوردبوونێ.