دڤێت ئیراق بەرەڤ بجهئینانا دەستووری بچیت
سندس سالح سلێڤانەیی:
ئەندازیار نور خالد شاكر بەربژارێ ژمارە (1) ل سەر لیستا پارتی ل بازنەیێ نەینەوا دیار كر، پەیرەوێ مە كاركرنە بۆ پاراستنا ئەزموونا هەرێما كوردستانێ و بەرگریكرن ژ مافێن كوردان ل سەرانسەری عیراقێ، هەروەسا بەرگریكرن ژ مافێ هەموو ئیراقیان وەك عەرەب و توركمان و هەموو پێكهاتەیێن دی ل دووڤ راسپاردێن سەرۆك بارزانی.
ئەندازیار نور خالد شاكر بەربژارێ ژمارە (1) ل سەر لیستا پارتی دیمۆكراتی كوردستان ل بازنەیێ نەینەوا د دیدارەكێ دا بۆ رۆژنامەیا ئەڤرۆ گۆت: ب دیتنا من ئیراق یا بەرەف قۆناغەكا دی دچیت، قۆناغەك كو تێدا برگێن دەستووری دڤیا بهێنە جیبەجێكرن، لەورا یا گرنگە هەموو لایەن ب رۆحەكا نوی بهێتە د وارێ كاركرنا سیاسی دا، بۆ دانانا خالان ل سەر پیتان، لەورا گرنگە لایەنێن كوردستانی پێكڤە كار بكەن بۆ چەسپاندنا دەستووری و پەرلەمان ببیتە جهێ دەرئێخستنا یاسا و بریارێن گرنگ.
هەروەسان گۆت: پارتی خودانا جەماوەركێ زۆرە ل دەڤەرا رۆژئاڤا دیجلە، ئەڤ دەڤەرە خودانا چەندین كادر و سەركردە و پێشمەرگەهێن دێرین بوویە د ناڤ رێزێن پارتی دیموكراتی كوردستان و پشكدارییەك بەرچاڤ هەبوویە د شۆرەشێن كوردستانێ دا، لەورا وەك گەنجەك ب فەرمانا سەركردایەتیا پارتی مە خۆ بەربژێر كرییە وەك بنەمالەك دیار ل دەڤەرا رۆژئاڤا دیجلە و ل بەغدا ئەم ل دووڤ فەرمان و رێنمایێن سەركردایەتیا خۆ دچین ژ بۆ چەسپاندنا مافێن خەلكێ كوردستانێ و دێ رۆلەكێ سەرەكی بینین بۆ چارەسەركرنا كێشێن خەلكێ دەڤەرێن كێشە لسەر ل دووڤ شیانێن خۆ.
ئەو یەك ژی دیار كر، ئاڤەدانی و ئارامی دبیتە هۆكارێ پەیداكرنا ئاڤەدانیێ ل عیراقێ ب گشتی و ب تایبەت ل هەرێما كوردستانێ، پشتی چەندین سالێن شەر و تیرۆریزمێ خەلكێ عیراقێ ب هەرێما كوردستانێ ڤە شایەنی ژیانەكا باشترە، پارتی دێ كار كەت بۆ پەیداكرنا ڤێ ئاڤەدانیێ، ب تایبەت ل دەڤەرا رۆژئاڤا دیجلە و زۆمار و سازان ژی یێ پێتڤی یە ژ بۆ چارەسەركرنا كێشەیێن سیاسی یێن هەلاویستی وەك مادێ (140) ژ دستۆرێ ئیراقێ و یاسا پەترۆل و غازێ و ئەم وەك ئەندام پەرلەمانێن پارتی دكاركەین ژ بۆ گۆهۆرینا ڤان دروشمان بۆ بەرنامە و پرۆژە یاسایێن پێتڤی ل دووڤ راسپاردەیێن سەركردایەتا خۆ.
ل دووماهیێ گۆت: دێ ب هەموو شیانان پاڵپشتیا چارەسەریێن بنەرەتی د ناڤبەرا حۆكمەتا ئیتحادی و حۆكمەتا هەرێما كوردستانێ كەین و هەموو شیانان مەزێخین بۆ پاڵپشتیا ڕێككەفتنێن د نێڤبەرا حۆكمەتا ئیتحادی و حۆكمەتا هەرێما كوردستانێ ل دۆر بابەتێن گڕێدایی خەلكێ كوردستانێ، ب تایبەت بابەتێن دارایی و كێشا مووچێ.
