ئه‌م دشێین ژیریا چێکری بۆ دۆزا نه‌ته‌وەیی و مرۆڤاتیێ بکاربینین
دلڤین ره‌شید:
ماموستایا زانكۆیێ دلین سه‌ردار زوهدى، به‌رپرسا سه‌نته‌رێ خواندنێن یه‌كسانیا جینده‌ری ل زانكویا دهوك دیار كر، ژێریا ده‌ستكرد (AI) دهێته هژمارتن ئێك ژ گرنگترین ئالاڤێن ته‌كنو‌لۆژیایێ د چه‌رخێ بیست و ئێكێ دا، ژبه‌ركو به‌رنامێ وێ دكه‌ڤیته د خزمه‌تا هه‌موو بوارێن ژیانێ دا، مینا خواندن و راگه‌هاندن و سیاسه‌ت و ئابور.
ماموستا دلینێ دیار کر کو بكارئینانا ژیریا ده‌ستكرد روژ بۆ رۆژێ لسه‌ر ئاستێ جیهانێ یا به‌رفره دبیت و گۆت؛ ئێدی ئه‌م دشێین ژێریا دەستکرد ژبۆ دۆزا نه‌ته‌وایه‌تی و مرۆڤایەتی بکاربینین، وەکی دۆزا گه‌لێ كورد، ئه‌و دۆزا بەردەوام بزاڤێ دکەت ژ بۆ گه‌هاندنا ده‌نگێ خۆ بۆ جیهانێ و بهێزكرنا پاشخانه‌یا خۆ یا كه‌لتۆری و سیاسی و مرۆڤایه‌تی .
به‌رپرسا سه‌نته‌رێ خواندنێن یه‌كسانیا جینده‌ری ل زانكویا دهوك گۆتژی؛ ئه‌م دشێین ژێریا ده‌ستكرد وه‌كو ئامیره‌ك بۆ دانه‌ناسینا دۆزا گه‌لێ كورد ب جیهانێ بكاربینین، هه‌روه‌سا بۆ به‌لاڤكرنا هشیاریێ ده‌رباره‌ی مێژو و كه‌لتۆرێ كوردی ب رێیا ئامیرێ وه‌رگێرانا ئۆتوماتیك یێ زیره‌ك و دروستكرنا ناڤه‌رۆكێ ب چه‌ندین زمانان.
مامۆستایا زانکۆیێ د بەردەوامیا ئاحفتنێن خۆدا گۆت؛ لایه‌نگرێت راگه‌هاندنێ دشێن ڤێ خزمه‌تێ پێشكێش بكه‌ن لسه‌ر داتایێن مێژوی و كه‌لتوری یێن كوردی بهێته راهێنان كرن بۆ به‌رهه‌مئینانا ڤیدیۆیان یان تێكستان كو دۆزا گه‌لێ كورد ب ره‌نگه‌كێ بابه‌تی و سه‌رنجڕاكێش شرۆڤه بكه‌ت داکو كه‌سێن بیانی ب ئاسانی لێ تێبگه‌هن .
به‌رپرسا سه‌نته‌رێ خواندنێن یه‌كسانیا جینده‌ری دیاركر ژی كو پاراستنا زمان و كه‌لتۆرێ كوردی ب رێكا پێشخستنا به‌رنامه‌یێن زیره‌كیا ده‌ستكرد یێن فێربونێ یان روبۆتێ ئاخفتنێ كو ب زارێ كوردی بئاخڤیت ژ گرنگترین خزمه‌تایه کو ئه‌م دشێین ب ڕێیا ژێریا ده‌ستكرد پێشكێش بكه‌ین و گۆت؛ هه‌روه‌سا ئەم دشێین ڤی به‌رنامه‌ی بكاربینین ل سه‌ر ئه‌ده‌بێ كوردی مینا سترانێن فولكلۆری ب مه‌ره‌ما دیجیتالكرنا كه‌لتۆر و گه‌ره‌نتیكرنا ڤه‌گوهاستنا وێ بۆ نڤشێ نوو .
ماموستایا زانکۆیێ دیار کر کو بكارئینانا ژێریا ده‌ستكرد ژ بۆ خزمه‌تكرنا دۆزا گه‌لێ كورد پێنگاڤه‌كا ستراتیژییه بۆ گه‌هاندنا ده‌نگێ كوردان ژبۆ جیهانێ ب ره‌نگه‌كێ زانستی و سه‌رده‌میانه و گۆت؛ هه‌رده‌مێ شیانێن كوردان د ڤی بواریدا پێشكه‌فتن دێ ده‌لیڤێن وان ژبۆ به‌رگیریكرنێ ژ مافێن خۆ زێده‌تر بیت و سه‌پاندنا ئاماده‌بونا وان یا مرۆڤایه‌تی و كه‌لتۆری ل سه‌ر ئاستێ نیڤده‌وله‌تی دێ ب هێزتر بیت.
