مرۆڤێن نەرجسى خودان کەساتیەکا لاوازن
بێوار حەمدی:
ڕاهێنەرەکا گەشەپێدانا كەسایەتى، د دیدارەکێ دا بۆ رۆژنامەیا ئەڤرۆ دیار کر کو کەسێن نەرجسی پتر د جڤاکى دا هەنە و ڤان کەسا ئاریشە د کەسایەتیا خوە دا هەیە و ئەگەر مرۆڤی کەسایەتیەکا ناڤنجی هەبیت دێ باشتر بیت، ژبەرکو خودانێن کەسایەتیا ناڤنجى پتر دشێن جڤاکی ڕاگرن.
د.ئاواز حەجی جەعفەر راهێنەرا گەشەپێدانا کەسایەتى دیار کر کو کەسایەتیا ناڤنجی کەسایەتیەکا هەڤسەنگە و خالێن خوە یێن هێزێ و لاوازیێ دزانیت و کارتێکرنەکا باش لسەر جڤاکی هەیە و گۆت: کەسایەتیا سادە ئەون یێن خودان کەسایەتیەکا لاواز و نەشێن مافێن خوە وەربگرن، بەلکو بتنێ خالێن خوە یێن لاواز دزانن، کەسایەتیا دفن بلند نەرجسی ژی ئەون کو ئاریشە د کەسایەتیا خوەدا هەنە و جڤاکی دهەڕفینن.
راهێنەرا گەشەپێدانا کەسایەتیێ د بەردەوامیا ئاخفتنێن خودا گۆت: کەسایەتیا نەرجسی پتر د جڤاکێ کوردەواریدا هەیە و ئەڤە ژی دزڤڕیت ژبۆ نە هشیارى و پەروەردەیا دایک و بابان و گۆت: لێ بدیتنامن ئەگەر مرۆڤی کەسایەتیا ناڤنجی هەبیت دێ گەلەک باشتر بیت، چونکو ئەڤ کەسایەتیە پتر دشێن جڤاکی ڕاگرن ودەروونێ وان ژی ئارامترە .
سەبارەت کەسایەتیا نەرجسی د. ئاوازێ گۆت: ئەم نەشێین بێژین خودانێن ڤێ کەسایەتیێ نەخۆشێن دەروونی نە، بەلکو ئاریشە دناڤ کەسایەتیا وان داهەیە و ئەڤ جورە کەسە دڤێت چارەسەریێ وەربگرن، داکو نەبنە ئەگەرێ وێ چەندێ خەلکێ دەوروبەرێن خوە تووشی نەخوشیێن دەروونی بکەن.
