هـەکە قانوونا لێبۆرینا گشتی بهێته دهركرن سێ هـزار زیندانی دێ هێنه ئازادكـرن
رێڤهبهرێ گشتی یێ چاكسازیێن ههرێما كوردستانێ د دیدارەکێ دا بۆ ڕۆژنامەیا ئەڤرۆ دیار کر، پڕۆژه قانوونا لێبۆرینا گشتی یێ بهرههڤه و پشتی ژلایێ پهرلهمانێ كوردستانێ دهێته پهسهندكرن، سێ هزار زیندانی دێ هێنه ئازاد كرن و گۆت؛ ل ههرێما كوردستانێ 500 كهسان سزایێ سێدارەدانێ لسەر هەیە، لێ هاتیە راگرتن.
ئیحسان بابان، رێڤهبهرێ گشتیێ چاكسازیێن ههرێما كوردستانێ دیار كر، ل سهرانسهری ههرێما كوردستانێ شهش هزار كهس دناڤا چاكسازیاندا هاتینه حوكم کرن و هژمارا كهسێن هاتینه حوكم کرن دناڤا چاكسازیاندا زۆره، ژبهر نهبوونا ئاڤاهیێن پێدڤی و گۆت؛ لهورا مه هزر د ڤێ چهندێ دا كریه و بۆ ڤێ مهرهمێ پڕۆژه قانوونا لێبۆرینا گشتی هاتیه بهرههڤكرن و ب دووماهی هاتیه، دگهل دهست بكاربوونا پهرلهمانێ كوردستانێ دێ پڕۆژه قانوونا لێبۆرینا گشتی پێشكێشی پهرلهمانی كهین ههتا بڕیار لسهر بهێته دان و ببیته قانوون.
ئیحسان گۆتژی؛ ههرچهنده بهری عێراقێ مه پڕۆژه ههبوو، بهلێ ژبهر بڕیارا دادگهها فیدڕالی بۆ راگرتنا خۆلا پهرلهمانێ كوردستانێ عێراق پێش مه كهفت و پڕۆژێ مه چاڤهڕێی كارابوونا پهرلهمانیه.
ئیحسان دا زانین، مهرجێ سهرهكی یێ مفاداربوونا كهسێن هاتینه حوكم کرن ئهوه مافێ كهسێ لسهر نهمابیت تنێ مافێ گشتی بیت، ههروهسا ئهو كهس دێ هێنه ئازادكرن یێن چاكسازی تێدا هاتینه كرن و چو مهترسی بۆ سهر جڤاكی نهبن و گۆت؛ ئهز پێشبینی دكهم ئهگهر قانوونا لێبۆرینا گشتی بهێته دهركرن و پهرلهمان دهنگی لسهر بدهت دێ نیڤا كهسێن هاتینه حومکرن مفاداربن.
رێڤهبهرێ گشتیێ چاكسازیێن ههرێما كوردستانێ د بەردەوامیا ئاخفتنێن خۆدا دیار کر کو شهش هزار كهس ددهمێ نوكهدا دناڤا چاكسازیان سزایێ خوه یێ دهرباز دكهن، ئێك هزار و 700 كهس ئهون یێن ب تۆمهتا بكارئینان و بازرگانیا ماددێن هوشبهر هاتینه سزادان، ئانکو پتریا كهسێن دناڤا چاكسازیان لسهر ماددێ هوشبهر هاتینه حوكم کرن و گۆت؛ 500 كهسێن دیژی ههنه سزایێ سێدارەدانێ لسەر ههیه، بهلێ ژبهر راگرتنا سزایێ سێدارەدانێ حوكمێ وان نههاتیه ئهنجامدان و دناڤا چاكسازیان ماینه.
ئیحسان بابان ئاماژه بڤێ چەندێ ژی كر، دادگههێن ههرێما كوردستانێ سزایێ سێدارەدانێ دانایه سهر تاوانباران و دهێنه رهوانهكرن بۆ ناڤا چاكسازیان، بهلێ لایهنێ جێبهجێكار سهرۆكایهتیا ههرێما كوردستانێ یه، ژبهر پێگیریا ههرێما كوردستانێ بۆ بنهمایێن مافێن مرۆڤی ددهمێ نوكهدا سزایێ سێدارەدانێ ناهێته ئهنجامدان و هاتیه راگرتن و گۆت؛ چونكه ههرێما كوردستانێ ژبهر رێكخراوێن نیڤدهولهتی و پێگیریكرن ب هندهك پرهنسیپان سێدارەدان راگرتیه، بهلێ ههر سزایێ سێدارەدانێ دهێته دهركرن و كهسێن ئهو سزا ژی بسهردا دهێته سهپاندن دهێنه رهوانهكرن بۆ چاكسازیان.
