جلكێن كوردی قەدەغەیە !
محسن عەبدولڕەحمان
زانكۆیا كوردستان ل هەولێرێ رۆژا سێشەمبی بۆ بەركرنا جلكێ كوردی دەستنیشانكر، ئەڤ بڕیارە ل رۆژا 3/12 هاتە راگەهاندن، وەكو دەستپێك دەستپێشخەرییەك باشە هەر بكێمی بۆ شكاندنا بڕیارا شلەییا وەزارەتا پەروەردێ لدور قەدەغەكرنا بەركرنا جلكێ كوردی، د بەرامبەردا دەستنیشانكرنا رۆژا 10ئادارێ وەكو رۆژا جلكێ كوردی ل دامودەزگەهێن میری.
بەری بیست سالانە رۆژەكێ وەكو ماموستا چوومە قوتابخانەكێ ب جلكێن كوردی، بەری دەركەفتنێ رێڤەبەری گۆتە من: تكایە جارەكا دی ب جلكێن كوردی نەهێ دەوامێ، هەر باشە چ سەرپەرشتیار ئەڤرۆ نەهاتینە، هەكە داكەنە كێشە!
براست ژ ڤێ گۆتنێ حێبەتیبووم، مللەتێن دونیایێ شانازیێ ب جلكێ خۆ یێ نەتەوەیی دبەن، ئەڤە هندستان و میرگەهێن كەنداڤی ب دشداشەی و عەگالێ ل هەموو دامودەزگەهان فەرمی و میرینە، یا ژ هەموویێ بالكێشتر جەنابێ سەرۆكی هەردەم ب جلكێن كوردییە!
كێ و بۆچی ئەڤ بڕیارە دایە و هەكە بۆ دەمەك دەستنیشانكری یا پێدڤی بیت، ئەرێ ما ئەو بڕیار یا پیرۆزە دا هەتا نها یا بەردەوام بیت.
رۆژ بۆرین و رۆژا جلكێ كوردی نێزیكبوو، كو مخابن دەوام ناهێتەكرن، رێڤەبەری د كومبوونێ دا گۆت: گەلی ماموستا فەرە ل رۆژا جلكێ كوردی بگەرمی ئامادەبین و ڤیابیت هەموو ماموستا ب جلكێن كوردی بهێن و دەستووری وی رۆژێ ب ئێكجاری نینن!
رۆژا جلكێن كوردی هات و ژ رێڤەبەری هەتا بەردەستكی دگەل قوتابیان، ژبلی من هەموو ب جلكێن كوردی ئاهەنگ دگێڕان ! من دگۆتێ ئەڤە رۆژەكا دی ژی پویچ و بێبەرهەم بۆری.
د ناڤ ماموستایان دا یێ ناوازە بووم چنكو پێشوەخت من بڕیاردابوو، كو ئازادانە ب جلكێ كوردی بهێمە دەوامێ یان وێ رۆژێ ژی ل بەرخۆنەكەم، بیست سال بۆرین هەر سال رۆژا جلكێ كوردی بتنێ ئەز یێ جودا بووم !
لەو ب بڕیارا زانكۆیا كوردستان كەیفخۆشم، بهیڤییا قەدەغەكرن ل سەر جلكێ كوردی راببیت و ئەو بڕتیار بهێتە رسواكرن، لەو هەر من داخوازدكر ل شوینا قەدەغەكرنێ یان سەپاندنێ، ببیتە بژاردەیا كەسی، یێ بڤێت ب جلكێ كوردی بچیتە دەوامێ و یێ نەڤێت ل سەر نەهێتە سەپاندن.
