تـوندوتیژی بەرانبـەر زهلامـان زێدهبوویـه
ههولێر، قائید میرۆ:
سهرۆكێ ئێكهتیا زهلامێن كوردستانێ د دیدارەکێ دا بۆ ڕوژنامەیا ئەڤرۆ دیار کر کو ل گورهی ئەوان ئامارێن هاتینه كۆم كرن رێژهیا توندوتیژیێ ههمبهری زهلامان زێدهبوویه و گۆت؛ هندهك ژن خۆ لسهر پاشهكیهكا زۆر مههر دكهن و زهلام ئێخسیر كرینه.
بورهان عهلی، سهرۆكێ ئێكهتیا زهلامێن كوردستانێ دیار كر، ل گورهی ئامارێن بهردهست توندوتیژیا ل ههمبهر زهلامان ئهڤ ساله زێده بۆیە و پشتی سهرێ سالێ دێ ئامارێن كوشتن و خۆ كوشتن و دهرئێخستنا زهلامان بهلاڤ كهین و گۆت؛ بهلێ مخابن ل گورهی ئەوان ئامارێن هاتینه كۆم كرن توندوتیژی بهرامبهری زهلامان یا بهر ب زێدهبوونێ ڤه دچیت.
بورهان عەلی دیار کر ژی کو بێگومان زێدهبوونا توندوتیژیێ ژی ئهگهرێن خوه ههنه و سالانه دهێنه دیار كرن، قهیرانا دارایی و زێدهبوونا پێدڤیێن ژیانێ ئهگهرێن سهرهكی یێن پهیدابوونا ئاریشهیانە.
بورهان د بەردەوامیا ئاخفتنێن دیار کر کو ئهگهرهكێ دیژی یێ زێده بووی ئهوژی جڤاكێ مه یێ بهرهب هندێ دچیت تاكێن دناڤا جڤاكی بتنێ بژین، واته ژن ل جههكێ ئاكنجیبوونێ بتنێ بژیت و زهلام ژی هەروەسا و گۆت؛ یانژی ئهندامێن خێزانێ نوكه دخوازن بتنێ بژین و یهكهیا سهربخۆ ههبیت یا ئاكنجیبوونێ مینا وهلاتێن ئهورۆپا ئهڤهژی بۆیه ئهگهرێ پهیدابوونا ئاریشهیان دناڤا خێزانێ و جڤاكی.
سهرۆكێ ئێكهتیا زهلامێن كوردستانێ د بەردەوامیا ئاخفتنێن خۆدا دیار کر ئاریشهیهكا دی ڤان سالێن دووماهیێ پهیدابوویه ئهوژی ل دهمێ مههركرنا ژنێ پاشهكیهكا زۆر لسهر زاڤای دهێته تۆماركرن.
بورهان دیار کر ژی، گەلەک نموونه هەنە نوكه خهلك فێری هندێ بوویه دهمێ كچ دچیته دناڤا پرۆسا ههڤژینیێ ئهگهر پێشهكیا مههركرنێ گەلەک ژی نهبیت لسهر پاشهكیهكێ دهێته مههر كرن هیچ دهمهكی زهلام نهشێت ئهڤێ چهندێ سهرخۆ راكهت، یانژی بشێت دهستان ژ ههڤژینا خۆ بهردهت دهمێ ئاریشهیهك دناڤبەرا وان پەیدا دبیت و گۆت؛ چونكه پاشهكی هند گەلەک هاتیه دانان هەکە زەلام ل ههموو تهمهنێ خوه كار بكهت نهشێت ئهڤی پارهی بدەتە ژنێ یان ئهڤی زێڕی بۆ ههڤژینا خۆ بكڕیت.
بورهان عەلی، سهرۆكێ ئێكهتیا زهلامێن كوردستانێ زێدەتر گۆت؛ لەوما ئهڤه دبیته ئهگهر دهست و پێت زهلامی بهێنه گرێدان و چهند گڤاشتن لسهر زهلامی ههبن و ههڤژینا وی چهند یا خراب ژی بیت نهشێت چ لڤینان بكهت، ئهڤهژی كارهساته بڤی شێوهی زهلام بهێته ئێخسیركرن بڤێ رێكێ.
