ههر تاوانهكا دهێته ئهنجامدان ئاشكرا دبیت
ههولێر، قائید میرۆ:
پهیڤدارێ پۆلیسێن ههرێما كوردستانێ د دیدارەکێ دا بۆ رۆژنامەیا ئەڤرۆ دیار کر، ئامیرێن پێشكهفتی بۆ ئاشكرا كرنا تاوانان ههنه و ههر تاوانهكا بهێته ئهنجامدان دێ هێته ئاشكرا كرن و گۆت؛ وهلاتی ب رێكێن جودا دهێنه سهردابرن و تاوانێن ب رێیا سۆشیال میدیایێ زێده بووینه.
عهقید كارزان غهفوری، پهیڤدارێ پۆلیسێن ههرێما كوردستانێ گۆت؛ ئەز دناڤا رێڤهبهریا بهلگهو تاوانێن ههرێما كوردستانێ مه تاقیگهههك ههیه بۆ ئاشكراكرنا وان تاوانێن دهێنه ئهنجامدان، ههروهسا مه تاقیگهههكا تایبهت ب ئاشكراكرنا تاوانێن ئهلكترۆنی ژی ههیه و گۆت؛ زۆربهیا تاوانێن دهێنه تۆماركرن دهێنه ئاشكرا كرن، بهلێ مهرج نینه ههموو تاوانێن دهێنه ئهنجامدان ل دهزگههێن پۆلیسان بهێنه تۆماركرن، چونكه ژبهر رهوشت و تیتالێن جڤاكی هندهك تاوان دهێنه ئهنجامدان و دهێنه ڤهشارتن یان ژی سكالا ناهێنه تۆماركرن ژبهر رهوشا خێزانێ یان عهشیرهتێ.
عەقیدی دازانین، هندهك كهسان ئاریشه ههنه و نادهنه پۆلیسان، حوكمهتا ههرێما كوردستانێ و وهزارهتا ناڤخۆ زۆر یا رژده لسهر بكارئینانا تهكنهلۆژیا سهردهم بۆ گههشتن ب راستی و دروستیا ئهنجامدانا تاوانان، ئامیرێن پێشكهفتی ههنه و نوكه وهك بهرێ نینه، لهوڕاژی ههر تاوانهكا دهێنه ئهنجامدان پشتی دگههیته پۆلیسان ئێكسهر دهێته ئاشكرا كرن و گۆت؛ رێژا ئاشكراكرنا تاوانان بوویه ١٠٠% ئانکو چو تاوانهك نهمایه بهێته ئهنجامدان و نههێته ئاشكرا كرن.
پهیڤدارێ پۆلیسێن ههرێما كوردستانێ ئەو چەندە ژی دیار کر کو ژ ئهگهرێ ههبونا تاقیگههێن پێشكهفتی هەر تاوانهكێ تاقیگهها خوه ههیه بۆ نموونه تاقیگهههک یا تایبهته ب ئاشكراكرنا ماددێن هوشبهر تاقیگهههكا دی بۆ تاوانێن ئهلكترۆنی، ههروهسا تاوانێن سهختهكاریێ.
ناڤهاتى زێدهتر گۆت؛ ژلایهكێ دیڤه ههبوونا كامیرێن چاڤدێریێ چ ئهڤێن ژلایێ حوكمهتێ ڤه هاتینه دانان یانژی ئهڤێن وهلاتی و جهێن بازرگانی ددانن زۆر هاریكارن بۆ ئاشكراكرنا تاوانان، كهسهك تاوانهكێ ئهنجام بدهت قهت قورتال بوون نینه، ژبهركو ههر دێ د وێنه و ڤیدیۆیێ دا دهركهڤیت و ئاشكرا بیت.
عهقید كارزان غهفوری د بەردەوامیا ئاخفتنێن خۆدا دیار کر کو ل ئهڤان سالێن دووماهیێ تاوانێن خراب بكارئینانا سۆشیال میدیایێ و خیانهت كرن ل ئهمانهتی و خۆشباوهریا خهلكی و گهفكرن ل بهلاڤكرنا وێنهیان و تاوانێن ئهلكترۆنی زێده بووینه، پێدڤیه وهلاتی د هشیار بن و زوی بسهردا نهچن.
عهقيدى ديار كر ژى، مخابن زۆر جارا وهلاتی دكهڤنه داڤا هندهك تاوانباران ب نهزانینا خوه و گۆت؛ خهلكێ مه یێ خۆشباوهره و نابیت ب ساناهی ببیته نێچیرا كهسێن خرابكار داکو تووش نهبیت، مهرهما من ئەوە ب هشیاری سهرهدهریێ دگهل سۆشیال میدیایێ و تۆڕێن جڤاكی بكهن و ههتا پشتڕاست نهبن پهیوهندیێ دگهل كهسێن بهرامبهر نهكهن.
