لێبۆرین ئیرادەیە
عزەت یوسف
بزانە دێ چەوا ژیان یا بەردەوام بیت، ئاشتیێ ل گەل بیرهاتنێن ئازاربەخش دا بكەی و ژیانەكێ دروست بكەی كو ژ ئالیێ رابردوو ڤە پێناسە نەكری بیت و رۆناهیێ بەردەتە سەر هێزا چاكبوونا لێبۆرینێ، تایبەت د رەوشەكێ دا كو دبیت لێبۆرین یا ب زەحمەت و مەحال بیت.
لێبۆرین هەڵبژاردنە نەكو هەست، لێبۆرین تشتەك نینە كو بتنێ دەمەكی روو بدەت كو هەست ب بەرهەڤیێ دكەین، بڕیارەكا ئاگادار كرنێ یە بۆ دەستبەردان ژ تاڵیی و نەرازیبوونێ، هەتا هەكە هەستێن مە ئێكسەر ل گەل ئەوێ بڕیارێ دا نەگونجن ژی، ئانكو لێبۆرین كریارەكا ئیرادەیی یە نەكو هەست.
پێدڤی ناكەت ژبیر بكەی، لێ دكاری لێخۆشبی لێبۆرین ڕامانا ژێبرن و سڕینا رابردوو نینە یان وەسا نیشا بدەت كو هیچ ئازار روی نەدایە، لێ ئازاد بوونە ژ وی ئازارا ب سەر تە دا هاتی و هەڵبژاردنەكا چاكبوونێ یە، پێتدڤی ناكەت ل بیرا تە بیت، لێ دكاری هەلبژێری و بەرەڤ پێشڤە بچی بێی كو رابردوو پێناسە تە بكەت.
لێنەبۆرین پتر ژ كەسێ دی تە ئازار ددەت، نڤیسەرەك ب ناڤێ (لیزا) دیاردكەت كو دەمێ دەست ب لێبۆرینێ نە كەین دنالی، گەلەك جاران هەر ئەم ب خۆینە پتر خەما دخۆین، لێنەبورینا مە، مە دكەتە دیل و دامایێ رابردوو، ل دەمەكی ئەو كەسێ ئەم ئازار داین هەر ئاگاداری ئەوێ ژیانێ نینە یا ئەم تووش بووین و كەفتینێ، هەڵبژاردنا لێبورینێ مە ژ وێ بارگرانییا هەستیاری رزگار دكەت.
لێبۆرین ڤەدكێشیت، چێ بوون ژ لێبۆرینێ پرۆسەیە، نە بوویەرەكا دەملدەستە، لێبورین دناڤبەرا شەڤ و رۆژەكان دا روو نادەت، ئانكو نە ئێكسەرە، دەم ژ بۆ كاری دناڤا سوز و شوكێن گرێدایی و ئێشان دڤێت، لێبۆرین ب رامانا لهەڤهاتن و پێكهاتن نینە، پەیوەندی ب چارەسەریا نەفسا مرۆڤی ڤە هەیە، لێ لهەڤهاتن ئاڤاكرنا تێكهەلیێ یە، دبیت ل كەسەكی ب بۆری بێی پێدڤی ڤەگەراندنا پەیوەندییان بیت، تایبەت ئەگەر ئەڤ كارە ببیتە ئەگەرێ مەتڕسی و ئێشاندنا تە.
لێبۆرین دبیت رێكەك بیت ژ بۆ ئازادیێ (لیزا) بەحسا وێ یەكێ دكەت كا چەوا لێنەبورین مە وەك كۆیلە دهێلیت و ناهێلیت ئەم ب تەواوی ب ئاشتی و ئازادی بژین. لێبۆرین ژ كەسانێن دی، چ داخاز بكەن یان نە، دشێت ببیتە سەدەما هەستكرنەكا كویرا ئازادیێ، رێ ددەتە مە د ژیانێ دا بەر ب پێشڤە بچین.
