كوردێن رۆژئاڤا و پەهلەڤانێن دژی تیرۆرێ
بینەر محەمەد
د دەمێ چەند سالێن دەربازبووی دا، كوردێن سووریێ (ڕۆژئاڤا) د ناڤ دژوارترین كاودانان دا ژیاینە، ئەو ملەتێ كو ب سینگەكێ بەرفرەهـ و ب چەكەكێ سڤك ڕوو ب ڕوویێ مەزنترین ڕێكخستییا تیرۆرستی یا جیهانی (داعش)ێ بووی و ئەفسانەیا وان شكاندی، ئەڤرۆ ئەو ب خۆ دبنە ئارمانجا هێرش و پیلانان. ئەڤا كو نوكە رووددەت، دیمەنەكێ دلتەزینە كو ویژدانا مرۆڤاتیێ دهەژینیت.
دوهی شەڕڤان، ئەڤرۆ قوربانی
هەمی جیهان دیدەڤانە كو كوردان ل كۆبانی و باكورێ سووریێ چ داستان تۆماركرینە. وان نە تەنێ بەرەڤانی ژ ئاخا خۆ كرینە، بەلكو بەرەڤانی ژ هەمی جیهانێ دكر ل دژی مەترسییا تیرۆرێ. ب هزاران گەنج و كچ و كوڕێن كورد گیانێ خۆ كرە قوربانی، لێ مخابن، ل شوینا وێ چەندێ پاداشت و ڕێز لێ بهێتە گرتن، ئەم دبینین كو هێزێن جودا جودا (چ ڕژێما سووریێ بیت یان هێزێن دی) ب شێوازەكێ دڕندانە ڕەفتارێ ل گەل دكەن و هێرشی وان دكەن، ئەڤەیە خەلاتێ دژی تیرۆرێ و خەلاتێن شەهیدان ژ بۆ ئازادییا مرۆڤاتیێ؟ نها تیرۆڕستێن داعشێ مینا هۆڤان ب كوردانڕا بەرداینە..
تشتێ هەرە ب ئازار ئەو دیمەن و ڕەفتارن یێن كو دژی خەلكێ سڤیل دهێنە ئەنجامدان. ئەو شێوازێ كوشتن، گرتن و ئاوارەكرنێ كو ل دژی كوردان دهێتە بكارئینان، گەلەك جاران ئەو ڕۆژێن ڕەش دئینیتە بیرا مە دەمێ تیرۆرستان دەسهەلات هەبووی. وێرانكرنا مالان، گوهۆڕینا دیمۆگرافیا دەڤەرێن كوردی (وەك عەفرین و سەرێ كانیێ)، و بكارئینانا هێزەكا زێدە، نیشانا وێ ئێكێ یە كو هزرەكا توندڕەو ل دژی ڤی ملەتێ مە یێ هەژار و ئازادیخواز و ئاشقێ ژیانێ هەیە. ئەڤە تشتەكێ ب تمامی ڕەتكری یە و دڤێت نەهێتە قەبوولكرن، لێ مخابن، وەكی دبێژن د سیاسەتێ دا هەڤالینی مرۆڤاتی نین، بتنێ بەرژەوەندی هەیە و خەلكێ سڤیل؛ زارۆك، ژن و پیرەمێر، باجەیا ئەڤان شەڕان ددەن. ئەو د ناڤبەرا بەرئاشێن سیاسەتا نێڤدەولەتی و بەرژەوەندیێن وەلاتان دا دهێنە هێران. پرسیارا سەرەكی ئەوە: بۆچی جیهان بێدەنگە؟ ئەرێ مافێ ڤی خەلكی نینە ل سەر ئاخا خۆ ب ئارامی بژیت؟ ئەرێ گونەها وان چییە ژبلی وێ ئێكێ كو وان بەرگری ژ كەرامەتا خۆ كریە؟. ل دووماهیێ دێ بێژم كو:
ڕەوشا كوردان ل سووریێ نە تەنێ كێشەیەكا سیاسی یە، بەلكو كێشەیەكا مرۆڤاتی و ئەخلاقی یە. نابیت ئەو ملەتێ كو بوویە سیمبۆلا ئازادیێ و دژاتیا تیرۆرێ، ب ڤی شێوەی بهێتە تێكشكاندن. پێدڤیە دەنگێ نەڕازیبوونێ بلند ببیت ل دژی هەر جۆرە زولم و هێرشەكێ. كورد ل سووریێ حەزژێكەرێن ئاشتیێنە و مافێ وانە كو ب سەربلندی و دوور ژ ترسێ بژین.
